Ndi Idotenyịn Ekededi Odu Kaban̄a Edinyan̄a?

Ẹkot ọyọhọ isua ikie 20 kiet ke otu mme isua ikie oro ẹduọkde iyịp ẹkan emi akanam ubonowo okụtde. Ubiatibet, ekọn̄, en̄wan ekpụk, edida ibọk ke idiọk usụn̄, unana edinam akpanikọ, ye afai ẹyọyọhọ ke akpatre iduọk isua ifan̄ emi. Ubiak ye ndutụhọ oro ẹtode udọn̄ọ, usọn̄, ye n̄kpa ẹdiana ye mmọ emi. Anie mîyomke ndibọhọ ikpọ mfịna oro ẹdude ke ererimbot mfịn? Nte nnyịn isede ini iso, ndi idotenyịn ekededi odu kaban̄a edinyan̄a?

KERE ban̄a n̄kukụt oro apostle John okokụtde ke n̄kpọ nte isua 2,000 emi ẹkebede. Enye ekewet ete: “Sese, ebiet idụn̄ Abasi omodu ye owo. Enye oyonyụn̄ odụn̄ ye mmọ; ndien mmọ ẹyedi ikọt Esie, Abasi ke Idem Esie oyonyụn̄ odu ye mmọ, onyụn̄ edi Abasi mmọ. Enye ọyọkwọhọde kpukpru mmọn̄eyet ke enyịn mmọ efep. N̄kpa idinyụn̄ idụhe aba; eseme ye ntuan̄a ye ubiak idinyụn̄ idụhe aba; koro ebe-iso n̄kpọ ẹma ẹbe ẹfep.” (Ediyarade 21:3, 4) Ukem ntre prọfet Isaiah ama ebem iso etịn̄ ete: “Enye eyemen n̄kpa ke nsinsi; Ọbọn̄ Jehovah onyụn̄ ọkwọhọde kpukpru iso mmọn̄eyet efep; oyonyụn̄ osio esuene ikọt esiemmọ ke ofụri ererimbot efep: koro edi Jehovah ọdọhọ.”—Isaiah 25:8.

Kam kere se mme un̄wọn̄ọ Abasi ndisu ediwọrọde! Ẹyenyan̄a, m̀mê ẹyenam ubonowo ọbọhọ ufịk ye afai, ọbọhọ mme ntak ndutụhọ ye mfụhọ. Kamse, idem udọn̄ọ, usọn̄, ye n̄kpa idinọmọke nnyịn! Ikọ Abasi, kpa Bible, ọn̄wọn̄ọ nsinsi uwem ke mfọnmma idaha ke isọn̄. (Luke 23:43; John 17:3) Ndien enye odu ọnọ kpukpru mbon oro ẹyomde. ‘Abasi oyom kpukpru owo ẹnyene edinyan̄a, ẹnyụn̄ ẹsịm ifiọk akpanikọ.’—1 Timothy 2:3, 4.

Nte ededi, man ibọ ufọn ito mme un̄wọn̄ọ Abasi, ana nnyịn ifiọk udeme oro Jesus Christ enyenede ke nnyịn ndinyene edinyan̄a inyụn̄ ibuọt idem ye enye. Jesus ke idemesie ọkọdọhọ ete:  “Abasi akamama ererimbot ntem, tutu Enye osio ikpọn̄-ikpọn̄ Eyen emi Enye obonde ọnọ, man owo ekededi eke ọbuọtde idem ye Enye okûtak, edi enyene nsinsi uwem.” (John 3:16) Ke owụtde akpan udeme oro Jesus Christ enyenede ke n̄kpọ emi, apostle Peter ọkọdọhọ ete: “Edinyan̄a inyụn̄ itoho ke baba owo kiet efen: koro enyịn̄ baba kiet efen inyụn̄ idụhe eke ẹnọde ke otu owo ke idak ikpa-enyọn̄, eke ẹnyenede ndida nnyan̄a nnyịn.” (Utom 4:12) Apostle Paul ye Silas nsan̄a esie ẹma ẹteme owo oro okobụpde mbụme ke esịt akpanikọ, ẹte: “Buọt idem ye Ọbọn̄ Jesus, ndien ẹyenyan̄a fi ye ufọk fo.”—Utom 16:30, 31.

Ih, Jesus Christ edi “Ọbọn̄ uwem,” ndien edinyan̄a ebe ke enye kpọt. (Utom 3:14) Edi didie ke owo kiet ekeme ndidi n̄wọrọnda ntre ke ndinyan̄a nnyịn? Ndinyene nnennen ifiọk mban̄a udeme esie ke n̄kpọ emi ekpenyene ndisọn̄ọ idotenyịn edinyan̄a nnyịn.

 [Ebiet Ẹdade Ndise Ẹto ke page 2]

Page 3: Mme ubomofụm ẹduọkde bọmb: Foto USAF; nditọwọn̄ ẹtiede biọn̄: UNITED NATIONS/J. FRAND; nsụn̄ikan̄ ekọn̄ emi ikan̄ atade: Foto U.S. Navy