Isaiah 62;1-12
62 Ndidopke uyo ke ntak Zion,+ ndinyụn̄ ndopke nda ke ntak Jerusalem+ tutu edinen ido esie ọwọrọ aka nte un̄wana,+ edinyan̄a esie onyụn̄ ọwọrọ aka nte nsadan̄ eke asakde ikan̄.+
2 “Ndien mme idụt ẹyekụt edinen ido fo,+ O n̄wan,+ kpukpru ndidem ẹyenyụn̄ ẹkụt ubọn̄ fo.+ Ndien ẹyekot fi obufa enyịn̄,+ emi inua Jehovah edisiakde.
3 Afo ayakabade edi anyanya uyai ke ubọk Jehovah,+ onyụn̄ edi mbọbọ ibuot edidem ke ekaubọk Abasi fo.
4 Owo ididọhọke aba ke afo edi n̄wan emi ẹkpọn̄de ofụri ofụri;+ owo idinyụn̄ idọhọke aba ke isọn̄ fo edi ndon;+ edi ẹyekot fi Idatesịt Mi Odu ke Enye,+ ẹnyụn̄ ẹkot isọn̄ fo Enye emi Ẹnyenede nte N̄wanndọ. Koro Jehovah ayadat esịt ye afo, ẹyenyụn̄ ẹda isọn̄ fo ẹnyene nte n̄wanndọ.+
5 Koro kpa nte akparawa adade eyenan̄wan emi mîfiọkke erenowo ọdọ nte n̄wan esie, nditọiren fo ẹyeda fi ẹnyene nte n̄wanndọ.+ Ndien kpa nte ebendọ adatde esịt aban̄a n̄wanndọ esie,+ kpa ntre ke Abasi fo edidat esịt aban̄a fi.+
6 Mmobon mbon ukpeme ke ibibene fo, O Jerusalem.+ Yak mmọ ẹkûdop uyo kpukpru ini ke ofụri uwemeyo ye ke ofụri okoneyo.+
“Mbufo emi ẹtịn̄de ẹban̄a Jehovah,+ ẹkûdop uyo,+
7 ẹkûdop nditịn̄ mban̄a enye tutu enye ọsọn̄ọ owụk, ih, tutu enye enịm Jerusalem nte n̄kpọ itoro ke isọn̄.”+
8 Jehovah amada ubọk nnasia esie+ ye ọkpọsọn̄ ubọk+ esie ọn̄wọn̄ọ ete: “Ami ndidaha aba wheat fo nnọ mme asua fo nte udia,+ mbon esenidụt idinyụn̄ in̄wọn̄ke obufa wine fo,+ emi afo akpade utom ke esịt.
9 Edi mmọ oro ẹtan̄de enye ẹdidia enye, mmọ idinyụn̄ itreke nditoro Jehovah; ndien mmọ oro ẹkade ẹkebọ enye ẹyen̄wọn̄ enye ke edisana okụre mi.”+
10 Mbufo ẹsan̄a ẹbe, ẹsan̄a ẹbe mme inuaotop. Ẹdiọn̄ usụn̄ mme owo.+ Ẹkịbi ntan, ẹkịbi ntan ke ọkpọusụn̄. Ẹtan̄ mme itiat ẹsion̄o.+ Ẹmenede idiọn̄ọ ẹnọ mme owo.+
11 Sese! Jehovah amanam ẹkop emi ke ata nsannsan ikpehe isọn̄:+ “Mbufo ẹdọhọ eyenan̄wan Zion+ ẹte, ‘Sese! Edinyan̄a fo ke edi.+ Sese! Utịp oro enye ọnọde odu ye enye,+ n̄kpọ eyenutom oro enye ọnọde onyụn̄ odu enye ke iso.’”+
12 Ndien mme owo ẹyekot mmọ ndisana owo,+ mbon oro Jehovah afakde;+ ẹyenyụn̄ ẹkot fi Enye Emi Ẹyomde, Obio Emi Owo Mîkpọn̄ke Ofụri Ofụri.+