Isaiah 60;1-22
60 “Daha ke enyọn̄,+ O n̄wan, nọ un̄wana,+ koro un̄wana fo emedi,+ ubọn̄ Jehovah omonyụn̄ ayama ọnọ fi.+
2 Koro, sese! ekịm+ oyofụk isọn̄, ọkpọsọn̄ ekịm oyonyụn̄ ofụk mme idụt; edi Jehovah ayayama ọnọ fi, ẹyenyụn̄ ẹkụt ubọn̄ esie ke idemfo.+
3 Ndien mme idụt ẹyeka ẹbịne un̄wana fo,+ ndidem+ ẹyenyụn̄ ẹka ẹbịne uyama un̄wana fo.+
4 “Menede enyịn fo se kanade nyụn̄ kụt! Ẹmetan̄ kpukpru mmọ ẹbon ọtọkiet;+ mmọ ẹmedi ẹbịne fi.+ Nditọiren fo ke ẹto anyan ebiet ẹdi, ye nditọiban fo emi ẹdimende ẹfak ke n̄kan̄ ẹbọk.+
5 Ke ini oro afo oyokụt onyụn̄ adat esịt,+ esịt fo eyenyek onyụn̄ atara, koro inyene inyan̄ibom ẹyedi ẹbịne fi; inyene mme idụt ẹyenyụn̄ ẹdi ẹbịne fi.+
6 Akwa udịm camel ẹyefụk fi, abak nyara camel Midian ye Ephah.+ Kpukpru mmọ oro ẹtode Sheba+ ẹyedi. Mmọ ẹyebiom gold ye frankincense ẹdi. Mmọ ẹyenyụn̄ ẹtan̄a itoro Jehovah.+
7 Ẹyetan̄ kpukpru otuerọn̄ Kedar+ ẹbon ọtọkiet ẹnọ fi. Mme okukịm erọn̄ Nebaioth+ ẹyenam n̄kpọ ẹnọ fi.+ Nyenyịme mmọ ẹdọk ẹdi itieuwa mi,+ ndien ami nyabana ediye ufọk mi.+
8 “Mmanie ẹdi mmọ emi ẹfede ẹdi mi nte obubịt enyọn̄,+ ye nte mme ibiom emi ẹfede ẹka ndudu ufọkinuen mmọ?
9 Koro mme isuo ẹyedori enyịn ke ami,+ mme nsụn̄ikan̄ Tarshish+ kpa nte ekedide ke akpa n̄ko, man ẹda nditọiren fo ẹto anyan ebiet ẹdi,+ silver ye gold mmọ ẹdu ye mmọ,+ ẹdinọ enyịn̄+ Jehovah Abasi fo ẹnyụn̄ ẹda ẹdinọ Edisana Abasi Israel,+ koro enye ayabana fi.+
10 Ndien mbon esenidụt ẹyebọp mme ibibene fo,+ ndidem mmọ ẹyenyụn̄ ẹnam n̄kpọ ẹnọ fi;+ koro n̄kpeyịbi fi ke iyatesịt mi,+ edi nyatua fi mbọm ke ntak mfọnido mi.+
11 “Ndien ẹyeberede inuaotop fo ẹnịm kpukpru ini;+ owo idiberike mmọ idem ke uwemeyo m̀mê ke okoneyo, man ẹda inyene mme idụt ẹsọk fi,+ ndidem mmọ ẹdinyụn̄ ẹda iso.+
12 Koro idụt ekededi ye obio ubọn̄ ekededi oro mîdinamke n̄kpọ inọ fi ẹyetak; owo idinyụn̄ itreke ndisobo mme idụt oro.+
13 “Ubọn̄ Lebanon eyedi ebịne fi, eto juniper, eto ash ye eto cypress ẹyedi ẹbịne fi kpa ke ukem ini oro,+ man ẹbana edisana ebiet mi;+ ndien ami nyọnọ ebiet ikpat mi ubọn̄.+
14 “Ndien nditọ mbon oro ẹtụhọrede fi ẹyedi ẹbịne fi ẹdinụhọ ẹnọ fi;+ ndien mbon oro ẹnamde n̄kpọ ye afo ke unana ukpono ẹyenụhọ ke ekaikpat fo,+ mmọ ẹyenyụn̄ ẹkot fi obio Jehovah, Zion+ Edisana Abasi Israel.
15 “Utu ke afo ndidi enye emi ẹkpọn̄de ofụri ofụri ẹnyụn̄ ẹsuade, emi baba owo kiet mîsan̄ake ibe,+ ami nyenịm fi nte n̄kpọ inemesịt ke nsinsi, nte n̄kpọ idara ke ofụri emana.+
16 Ndien afo ayawap mmọn̄eba mme idụt,+ oyonyụn̄ awap eba ndidem;+ ndien afo ọyọfiọk ete ke ami Jehovah+ ndi Andinyan̄a fi,+ ye nte ke Ọkpọsọn̄ Abasi+ Jacob edi Andifak fi.+
17 Nyada gold ndinịm ke itie okpoho,+ nyonyụn̄ nda silver ndinịm ke itie ukwak, nda okpoho ndinịm ke itie eto, nda ukwak ndinịm ke itie itiat; ndien nyemek emem nte mme esenyịn+ mbufo nnyụn̄ mmek edinen ido nte mme edeme-utom mbufo.+
18 “Owo idikopke aba afai ke isọn̄ fo, mbụme m̀mê n̄wụre idinyụn̄ idụhe aba ke esịt adan̄a fo.+ Ndien afo oyokot mme ibibene fo Edinyan̄a+ onyụn̄ okot mme inuaotop fo Itoro.
19 Koro utịn ididịghe aba un̄wana fo ke uwemeyo, un̄wana ọfiọn̄ idinyụn̄ iyamake aba inọ fi. Ndien Jehovah ayakabade edi nsinsi un̄wana fo,+ Abasi fo oyonyụn̄ edi uyai fo.+
20 Utịn fo idisopke aba, ọfiọn̄ fo idinyụn̄ iwahake; koro Jehovah ayakabade edi nsinsi un̄wana fo,+ ndien mme usen emi afo ofụhọde ẹyekụre.+
21 Ndien amaedi ikọt fo, kpukpru mmọ ẹyedi ndinen;+ mmọ ẹyeda isọn̄ ẹnyene ke nsinsi,+ nsehe emi ntọde,+ utom ubọk mi,+ man ẹbana mi.+
22 Ekpri ayakabade edi tọsịn, esisịt oyonyụn̄ akabade edi ọkpọsọn̄ idụt.+ Ami Jehovah nyanam enye awara ke ekem ini esie.”+
