Ihih, Obio Ubọn̄ Abasi idịghe nte esịt Christian etiede. a Bible ndikot Obio Ubọn̄ Abasi “Ubọŋ Heaven” anam ẹdiọn̄ọ ebiet emi enye odude. (Matthew 4:17, Edisana Ŋwed Abasi Ibom) Se nte Bible owụtde ke enye edi ata ukara emi ifụm ukara esie odude ke heaven.

•   Obio Ubọn̄ Abasi enyene mme andikara, mbon emi enye akarade, ibet, onyụn̄ aduak ndinam ẹnam uduak Abasi ke isọn̄ nte ẹnamde ke heaven.—Matthew 6:10; Ediyarade 5:10.

•   Ukara Abasi m̀mê Obio Ubọn̄ Abasi edikara “kpukpru owo ye mme idụt ye usem” ke isọn̄. (Daniel 7:13, 14) Odudu ukara emi itoho mbon emi enye akarade, edi oto Abasi nnennen nnennen.—Psalm 2:4-6; Isaiah 9:7.

•   Jesus ama ọdọhọ mme apostles oro ẹkesọn̄ọde ẹda ye enye ke mmọ ẹyetiene “ẹtie ke mme ebekpo” ke Obio Ubọn̄ heaven.—Luke 22:28, 30.

•   Obio Ubọn̄ emi enyene mme asua, emi enye edisobode.—Psalm 2:1, 2, 8, 9; 110:1, 2; 1 Corinth 15:25, 26.

 Bible Idọhọke ke Obio Ubọn̄ heaven odu owo ke esịt. Edi owụt ke “ikọ obio ubọn̄” m̀mê “eti mbụk obio ubọn̄” ekeme ndidụk owo esịt, ke akpana inyụn̄ iyak enye odụk nnyịn esịt.—Matthew 13:19; 24:14.

Nso ke ikọ oro “ubọŋ Abasi odu ke otu mbufo” ọwọrọ?

 Ndusụk owo idiọn̄ọke ebiet emi Obio Ubọn̄ Abasi odude, ke ntak se mmọ ẹkotde ke Luke 17:21 ke ndusụk Bible. Ke uwụtn̄kpọ, Edisana Ŋwed Abasi Ibom ọdọhọ ke “ubọŋ Abasi odu ke otu mbufo.” Ana idiọn̄ọ se ẹketịn̄de ẹban̄a man itie Bible emi enen̄ede an̄wan̄a nnyịn.

 Jesus eketịn̄ ikọ emi ye mme Pharisee, mbon emi mîkamaha enye, ẹkenyụn̄ ẹdiomide ẹwot enye. (Matthew 12:14; Luke 17:20) Ndi emekere ke Obio Ubọn̄ Abasi okpodu ke utọ esịt mbon ibak oro? Jesus ama ọdọhọ mmọ ete: “Esịt mbufo ẹyọhọ ye mbubịk ye ubiatibet.”—Matthew 23:27, 28.

 Ndusụk Bible ẹnam ikọ Jesus ke Luke 17:21 enen̄ede an̄wan̄a ete: “Obio Ubọn̄ Abasi mmọ mi ye mbufo.” (Contemporary English Version) “Obio ubọn̄ Abasi odu ke otu mbufo.” (Edikabade Eke Obufa Ererimbot) Obio Ubọn̄ heaven ama odu ke otu mme Pharisee, sia Jesus, emi Abasi ekemekde ete akara Obio Ubọn̄ oro mmọdo akada ke otu mmọ.—Luke 1:32, 33.