Kaponda Lukas 21:1-38

  • Mutued’a mukusa ma muto nu ta nu be̱ne̱ kapa iba (1-4)

  • EYEMBAN A MAMBO MA ME̱NDE̱ BOLANE̱ (5-36)

    • Bila, Soa la mińangadu dinde̱ne̱, maboa, njai (10, 11)

    • “Yerusalem e dingabe̱le̱ na milo̱ṅ ma bila” (20)

    • “Ponda ni te̱se̱be̱le̱ matumba” (24)

    • “Mun’a moto a mawa” (27)

    • Eyembilan a bwele ba figue (29-33)

    • ‘Bińo̱ ja epe̱ńe̱’ (34-36)

  • Yesu a malee̱ o tempe̱l (37, 38)

21  Na mo̱ a mama miso̱, e̱ne̱ bam’bwaṅ bena ba ta ba we̱le̱ mabea mabu o belimbi ba njangi. 2  Nde e̱ne̱ pe̱ mutued’a mukusa ma muto mō̱ a mawe̱le̱ kapa iba,* 3  na mo̱ a kwala ná: “Na mbale̱, na malangwea bińo̱ ná nun mutued’a mukusa ma muto a we̱le̱ buka be̱se̱. 4  Ebanja babo̱ be̱se̱ ba we̱le̱ nde mabea ma tut’abu, nde mo̱ ńena ńe tue, a we̱le̱ nje ye̱se̱ a tano̱ a be̱ne̱ o bongwa mo̱me̱ne̱.” 5  Ombusa ponda, ke̱ bō̱ be o kwalea ońola tempe̱l, ne̱ni e tano̱ e bo̱tisabe̱ na madale ma mpesa, na mabea mena ma bolabe̱ Loba, 6  na mo̱ a kwala ná: “Man mambo mena bińo̱ leno̱ o je̱ne̱ tatan, mińa mi me̱nde̱ po̱ mena dale to̱ diwo̱ di si me̱nde̱no̱ dia omo̱ń a dine̱ esibe̱ ná di kwesabe̱ wase.” 7  Na babo̱ ba baise̱ mo̱ ná: “A Mulēdi, njika ponda ma mambo ma me̱nde̱no̱ bolane̱, njika eyemban pe̱ e me̱nde̱ lee̱ ná ma mambo ma me̱nde̱ bolane̱ e?” 8  Na mo̱ alabe̱ ná: “Bińo̱ no̱ngo̱ jangame̱ye̱ ná lo si dengabe̱le̱, ebanja jita ba me̱nde̱ po̱, ba bolane̱ dina lam, ba kwala ná: ‘Mba nde ne mo̱,’ na ná ‘Ponda ńe be̱be̱.’ Lo si bupe̱ babo̱. 9  Ponda pe̱ lo me̱nde̱no̱ senga ońola bila na mpungu, lo si bwa bo̱ngo̱. Ebanja ma mambo mangame̱n se̱le̱ bolane̱, nde su di si me̱nde̱ po̱ dibokime̱ne̱.” 10  Na mo̱ a kwalane̱ babo̱ ná: “Tumba di me̱nde̱ te̱me̱ te̱nge̱ne̱ tumba, janea pe̱ te̱nge̱ne̱ janea. 11  Soa la mińangadu dinde̱ne̱ di me̱nde̱ be̱, njai ninde̱ne̱ na maboa pe̱ wuma na wuma; mambo ma mabwesane̱ bo̱ngo̱ pe̱ ma me̱nde̱ je̱ne̱ne̱, na byemban bende̱ne̱ be mawe̱ o mo̱ń. 12  “Nde obiana man mambo me̱se̱ ma mabolane̱, bato ba me̱nde̱ we̱le̱ bińo̱ mā o ńolo na takise̱ bińo̱, ba bake̱ bińo̱ o mandabo ma ndongame̱n ba we̱le̱ pe̱ bińo̱ o beboa. Ba me̱nde̱ pe̱ walane̱ bińo̱ oboso ba kiṅe̱ na go̱bina ońola dina lam. 13  Nik’e me̱nde̱ tindea bińo̱ epolo o bola mboṅ. 14  Bińo̱ domse̱ so̱ o milema mańu ná lo si boṅsane̱ o lingea bińo̱me̱ne̱ oboso ba ponda, 15  ebanja na me̱nde̱ bola bińo̱ byala na dibie̱ bena bate̱nge̱ne̱ bińo̱ be̱se̱ mwemba ba si me̱nde̱no̱ we̱le̱ te̱nge̱ne̱ to̱ jalabe̱. 16  Lo me̱nde̱ na mo̱me̱ne̱ bakabe̱* na bayedi bańu, bonańango ańu, belongi ba mbia mańu na mako̱m mańu, ba me̱nde̱ pe̱ bwa bō̱ bańu, 17  lo me̱nde̱ singabe̱ na be̱se̱ ońola dina lam. 18  Nde ńo̱ ańu ńa mulopo to̱ po̱ e si me̱nde̱ pimbea. 19  Ońola titimbe̱ ńanu lo me̱nde̱ sunga longe̱ lańu.* 20  “Nde ponda lo me̱nde̱no̱ je̱ne̱ Yerusalem e dingabe̱le̱ na milo̱ṅ ma bila, bińo̱ bia ná dibumbe lao lā be̱be̱. 21  Ba bena be o Yudea ba boteye ńa mīla o midongo, ba be o Yerusalem ba buse, ba pe̱ bena be o beyidi ba s’ingea o mundi, 22  ońolana mi mińa me nde mińa mena te̱me̱ la sim langame̱nno̱ be̱,* ná mambo me̱se̱ mena ma tilabe̱ ma londe. 23  Mbeu a ńolo na bito ba meme̱, na ba bena ba me̱nde̱ ńo̱ngise̱ bana o mi mińa! Ebanja ndutu ninde̱ne̱ e me̱nde̱ be̱ o ekombo, malinga pe̱ omo̱ń a din tumba. 24  Ba me̱nde̱ bwabe̱ na po̱, ba me̱nde̱ pe̱ walane̱ babo̱ mukoma o matumba me̱se̱; nde Yerusalem e me̱nde̱ dakabe̱le̱ na matumba natē̱ ponda ni te̱se̱be̱le̱ matumba* e londa. 25  “Byemban pe̱ be me̱nde̱ be̱ o wei, o mo̱di na o ngengeti, o wase pe̱ matumba ma me̱nde̱ tabilane̱, ma si bie nje bola ońola njumb’a munja na pungwea lao. 26  Bato ba me̱nde̱ wo̱ na bo̱ngo̱, ba pane̱ pe̱ milema ońola mambo ma me̱nde̱ ko̱ye̱ wase, ebanja ngiń’a mo̱ń i me̱nde̱ sousabe̱. 27  Ba me̱nde̱ so̱ je̱ne̱ Mun’a moto a mawa o diwindiwindi na ngińa n’edube ende̱ne̱. 28  Nde man mambo ma nibotea te̱ bolane̱, bińo̱ te̱se̱ ńolo ná sim, lo mame pe̱ milopo mańu ebanja jongise̱ lańu di másisea be̱be̱.” 29  Na mo̱ a bola babo̱ eyembilan ná: “Bińo̱ ombwa bwele ba figue na mine̱ myele mye̱se̱. 30  Mi nike̱ke̱ te̱, lo me̱ne̱ mo̱, lo bia pe̱ ná pond’a loe̱ ńe be̱be̱. 31  Mulemlem pe̱, ponda bińo̱ lo me̱nde̱no̱ je̱ne̱ man mambo ma nibolane̱, bińo̱ bia ná Janea la Loba le be̱be̱. 32  Na mbale̱ na malangwea bińo̱ ná nin ńo̱ṅo̱n e si me̱nde̱ tomba tom, natē̱ mambo me̱se̱ ma bolane̱. 33  Mo̱ń na wase ba me̱nde̱ tomba, nde byala bam be si me̱nde̱ tomba tom. 34  “Nde bińo̱ angame̱ye̱ ná milema mańu mi si dilisabe̱ na mudesi na muńo̱si na mutaka ma longe̱, ná bo buńa bo si po̱ye̱ bińo̱ epańpań, 35  ka lambi. Ebanja bo me̱nde̱ po̱ye̱ baje̱ o wase be̱se̱. 36  Bińo̱ ja so̱ epe̱ńe̱, lo so̱so̱me̱ye̱ pe̱ ponda ye̱se̱ ná lo we̱le̱ jonga o man mambo me̱se̱ mangame̱n bolane̱, na te̱me̱ oboso ba Mun’a moto.” 37  Mwese a ta a lee̱ o tempe̱l, nde bulu ala ko̱ iyo̱ o mudongo* mu belabe̱ ná mudongo ma Njabi. 38  Nde mesanedi, tumba le̱se̱ di ta di po̱ sengane̱ mo̱ o tempe̱l.

Maki

^ Na eyem’a Grikia, “lepta iba,” yena ye nde kradrans po̱.
^ To̱ “jandisabe̱.”
^ To̱ “tombwane̱ midī mańu.”
^ To̱ “mińa mena makunako mangame̱nno̱ be̱.”
^ To̱ “basibi.”
^ Nika ńe nde ná Yesu a ta ala nanga o mundi musadi mō̱ oteten a mi mena mi ta o mudongo.

Wonja ni kombabe̠ ońola kalati