Daizeze Bedʼeaba panʉbʉ

 Daizeze Bedʼeabara ũdubibʉ Daizezera wãrĩnuchuta. Maʉ̃ awuara jaradiabʉ dayirãba Daizezeta ĩjãibʉrʉ dayi krĩcha biata zokʼaibarata, mawũã religionʼraba jara diabʉa iyi edebi ẽ baita (1 Juan 5:20; Romanos 12:1). Daizeze Bedʼeaba ũdubibʉ nekʼãrẽbʉdeba Daizezera wãrĩnubʉta, maʉ̃ta akʉdayi.

•   Nekʼãrẽ jõma parãnabʉba akʉza nekʼãrẽ jõma zokʼaibʉba ũdubibʉ bʉta yi parãnara. Daizeze Bedʼeaba jarabʉ: «De jõma bʉra ẽbẽraba parãsi, abarika nekʼãrẽ jõmabʉra Daizezeba parãna» (Hebreos 3:4). Naʉ̃ra zare ẽ daya ũrĩra adewara ẽbẽrarã yibia estudiabʉrabida mawũã krĩchapanʉ. a

•   Ẽbẽra jõmaʉ̃ta iyi toda ewarideba ʉ̃ta kãgabʉ sobia bʼaita, maʉ̃ta neẽbʉrʉ bia senti ẽ. Mamina dayi bia bʼai awabʉ kãgabʉ ẽ awuarabʉrʉ nesidabʉ Daizeze ũdukʼawuaita mawũã iyaʼa yiwidʼita, maʉ̃ta Daizeze Bedʼeaba jarabʉ Daizeze kʼawuai kʼarea zʉbʉriabʉta (Mateo 5:3; Apocalipsis 4:11). Daizezeba dayirã parãside, parãsi dayi krĩchade erbamarẽã iyi ũdukʼawuaita, mawũãtrʉ sobia panamarẽã (Mateo 4:4).

•   Propesiara jõma aripe berabarisi, poaga mejãcha berabarida tẽã iyi bʉdadeba. Maʉ̃ jõma aripe berabaridaba ũdubibʉ ẽbẽrarã krĩcha ẽãta (2 Pedro 1:21).

•   Yi Daizeze Bedʼea bʉdarabara ãyara audre kʼawuabasi siensiaba jarabʉta wuabema ãyi ewaridebema ẽbẽrarãira. Bari jaraita wuabemarabara krĩchapanasi naʉ̃ drʉara elepante ʉ̃rʉ edaʉnʉmʉta mawũã ẽ bʉrʉ bidowe ʉ̃rʉ akʉza toro ʉ̃rʉ, adewara nedʉwʉrʉ ʉ̃rʉ. Mamina Daizeze Bedʼeabara jarabʉ naʉ̃ drʉara «ewarade jirabʉ kʼãrẽ» (Job 26:7). Adewara Daizeze Bedʼeabara jarabʉ naʉ̃ drʉara borokoabʉta (Isaías 40:22). Ẽbẽra bioʉba krĩchapanʉ ẽbẽra Daizeze Bedʼea bʉdarabara naʉ̃ ʉ̃rʉra kʼawuapanasita Daizezeba ãyaʼa jaradiasi baera.

•   Daizeze Bedʼeabara panʉbʉ ẽbẽra Daizeze ĩjãbʉ ẽãraba widibʉta, bari jaraita ãya widipanʉ: Daizezeta ẽbẽra biabʉrʉ akʉza jõmaʉ̃ra ʉ̃ta zarea barabʉbʉrʉ ¿Kʼãrẽa Daizezebara iduaribibʉ zʉbʉriara akʉza kayiruara? ¿Kʼãrẽa religionʼrabara mejãcha ũdubibʉ bedʼea zromata? (Tito 1:16). Daizeze Bedʼeaba naʉ̃ ʉ̃rʉ panʉbʉba kʼarebaseabʉ ĩjãita Daizeze ʉ̃rʉ.