Marka 9:1-50

  • Jesuh mui thlennak (1-13)

  • Khuachia aa hrolhmi ngakchiapa a damter (14-29)

    • Zumhnak a ngeimi caah a si kho lomi zeihmanh a um lo (23)

  • Jesuh nih a thihnak kong a chim ṭhan (30-32)

  • Ahodah a ngan bik tiah zultu pawl an i al (33-37)

  • A kan ralchanh lomi cu kanmahlei mi an si (38-41)

  • Tlukrilhtertu (42-48)

  • “A almi cite bantuk si u” (49, 50)

9  Mah hnuah Jesuh nih “Biatak kaan chimh hna lai, hika ah a dirmi cheukhat cu ṭhawnnak in a ra cangmi Pathian Pennak kha an hmuh hlanah an thi lai lo” tiah a ti hna. 2  Niruk a rauh hnuah Jesuh nih Peter, Jeim le Johan kha a auh hna i anmah lawng in tlang sangpi ah a kaipi hna, mah hnuah Jesuh cu an hmaiah a mui aa thleng. 3  Jesuh hnipuan cu a tleu i a raang ngaingai, mah tluk raang in a su khomi ahohmanh an um lo. 4  Elijah le Moses zong an hung lang i Jesuh he bia an i ruah. 5  Mah tikah Peter nih “Saya,* hika ah kan ummi hi tinvo sung a si. Hika ah thlam pathum in ka sak lai. Nangmah caah pakhat, Moses caah pakhat, Elijah caah pakhat” tiah a ti. 6  A tak ti ahcun Peter cu zeihmanh chim awk hngal loin a um. Zeicahtiah annih cu an thin a phang tuk. 7  Cutin a chim lioah minmei a hung zam, annih kha a zelh hna i “Amah hi ka dawtmi ka Fapa a si. Amah bia kha ngai u” timi aw thawng minmei chung in a hung chuak. 8  An pawngkam an zoh tikah Jesuh dah ti lo cu ahohmanh an hmu hna lo. 9  Tlang cung in an ṭum tikah Jesuh nih mi Fapa cu thihnak in thawhter a si hlan tiang an hmuhmi kong kha ahohmanh chimh lo ding in a thlauh hna. 10  Ahohmanh an chim hna lo, asinain thihnak in thawh ṭhan timi cu zeidah a si hnga tiah an i ceih. 11  Mah hnuah “Zeicah phungbia cawnpiaktu pawl nih Elijah cu a rat hmasa awk a si an ti?” tiah an hal. 12  Jesuh nih “Elijah cu a ra hmasa lai i zeizong vialte kha a hmasa bantuk in a si nakhnga a remh ṭhan lai. Asinain mi Fapa cu harnak tampi a ing lai i zei rel loin pehtlaih a si lai timi Cathiang bia he zeitindah aa pehtlaih? 13  Kaan chimh hna lai, a tak ti ahcun Elijah cu a ra cang. Amah he aa tlaiin Cathiang ah aa ṭial bantuk te khan mi nih amah cu an duh ning paoh in an rak tuah” tiah a ti. 14  A dang zultu pawl sin an phak tikah phungbia cawnpiaktu hna he bia an rak i al lenmi le an pawngkam ah mi tampi an rak ummi kha an hmuh. 15  Mi nih Jesuh kha an hmuh tikah an khuaruah a har tuk i an va tli i an va don. 16  Jesuh nih “Zeidah nan i al?” tiah a hal hna. 17  Mibu lakin mi pakhat nih “Saya, khuachia aa hrolh caah a holh kho lomi ka fapa kha na sinah ka ratpi. 18  Khuachia aa hrolh fatin ka fapa cu vawlei ah a tlu, a kaa in a buanbara a chuak, a hacang a rial i a tha a dih tawn. Khuachia kha ṭhawlpiak awkah na zultu pawl bawmhnak ka hal hna nain an ṭhawl kho lo” tiah a ti. 19  Mah tikah Jesuh nih “Zumhnak a ngei lomi hna,* nan sinah zei can tiang dah ka um rih lai, zei can tiang dah kaan in rih hna lai? Ngakchiapa cu ka sinah ratpi u” tiah a ti hna. 20  Cucaah ngakchiapa kha a sinah an ratpi. Jesuh a hmuh tikah khuachia nih ngakchiapa cu a hnuhdawhter caah vawlei ah a tlu. A kaa in a buanbara a tawh i a ril len ko. 21  Jesuh nih “Hitin a umnak hi zei can dah a si cang?” tiah a hal tikah a pa nih “A ngakchiat tein a si. 22  Khuachia nih mei chung le ti chung ah a tlukter tawn i ka fapa kha a thih nakhnga atu le atu a tuah. Saya, na si khawh ahcun kan zaangfah law kan bawm hram ko” tiah a nawl. 23  Jesuh nih “‘Na si khawh ahcun’ tiah zeicah na ti? Zumhnak a ngeimi caah cun a si kho lomi zeihmanh a um lo” tiah a leh. 24  Cu cangka a pa nih “Ka zumh ko! Ka zumhnak a der rih ahcun a feh nakhnga ka bawm!” tiah a ti. 25  Mibu nih an rak naih chinmi kha Jesuh nih a hmuh tikah “Hna chet ding in le holh kho lo ding in a tuahtu khuachia, nawl kaan pek. A chung khan chuak tuah, zeitik hmanh ah lut ṭhan ti hlah!” tiah mah khuachia kha fakpi in a sik. 26  Khuachia cu aw thangpi in a au i ngakchiapa kha fakpi in a hnuhdawhter hnuah a chuak. Ngakchiapa cu mithi bantuk a si caah “A thi cang!” tiah mi nih an ti. 27  Asinain Jesuh nih ngakchiapa kha a kut in a tlaih i a thawh tikah a hung dir. 28  Jesuh cu inn pakhat chung i a luh tikah a zultu hna cu anmah lawng in an ra i “Kannih tah zeicah khuachia kha kan ṭhawl khawh lo?” tiah an hal. 29  “Hi bantuk khuachia phun hi cu thlacamnak lawng in ṭhawl khawh a si” tiah Jesuh nih a leh hna. 30  Cuka cun an chuak i Galili ram kha an tan pah, mah kong kha Jesuh nih ahohmanh hngalhter a duh hna lo. 31  Mah cu a zultu pawl kha cawnpiak a duh hna caah a si, “Mi Fapa cu rawi a si lai i mi pawl kut ah chanh a si lai, an thah lai i nithumnak ni ah a tho ṭhan lai” tiah a zultu pawl kha a chimh hna. 32  Asinain a chimmi kha a zultu pawl nih an hngalthiam lo, a hal zong an hal ngam lo. 33  Cuticun Kapernaum khua kha an rak phan, innchung i an um lioah Jesuh nih “Lampi ah khan zeidah nan i al?” tiah a hal hna. 34  Ahohmanh nih an let lo, zeicahtiah kan lakah ahodah a ngan bik timi kong kha an i al caah a si. 35  Jesuh cu a ṭhu, lamkaltu 12 kha a auh hna i “Pakhatnak si a duhmi cu hmanung bik a si lai, mi vialte sal a si lai” tiah a ti. 36  Mah hnuah ngakchia pakhat kha a auh i an laifang ah a dirter, a liang kha a tlaih i, 37  “Ka min ruang ah hi ngakchia bantuk mi pakhat kha a cohlangmi cu keimah a ka cohlangmi a si, keimah a ka cohlangmi cu keimah lawng si loin a ka Thlahtu kha a cohlangmi a si” tiah a ti. 38  Johan nih “Saya, na min hmang in khuachia a ṭhawlmi pa pakhat kha kan hmuh, anih cu kan mi a si lo caah kan thlauh” tiah a ti. 39  Jesuh nih hitin a ti: “Thlauh hlah u, zeicahtiah ka min in khuaruahhar thil a tuah dih cangka in ka min a chiatter colh khomi an um lai lo. 40  A kan ralchanh lomi cu kanmahlei mi a si. 41  Biatak kaan chimh hna, Khrih zultu nan si ruang ah ti hraikhat aan pemi hna cu laksawng hmu loin a um lai lo. 42  Zumhnak a ngei i ngakchia he aa lomi hi bantuk mi hna a tlukrilhtertu cu a hngawng ah facang rialnak lungtum* thlaih in rili ah thlak cu a caah a ṭha deuh lai. 43  “Na kut nih aan tlukrilhter ahcun tan law hlonh ko, a mit kho lomi Gehenna* ah kut pahnih he tlak nakin cun kut tling loin nunnak chung i luh cu a ṭha deuh. 44 * —— 45  Na ke nih aan tlukrilhter ahcun tan law hlonh ko, Gehenna* ah ke pahnih he tlak nakin cun ke tlamtling loin nunnak chung luh cu a ṭha deuh. 46 * —— 47  Na mit nih aan tlukrilhter ahcun khoih law hlonh ko, Gehenna* ah mit pahnih he tlak nakin cun mit pakhat in Pathian Pennak chung luh cu a ṭha deuh. 48  Gehenna* cu tholung pawl an thih lonak, mei a mih lonak hmun a si. 49  “Cite phulh bantuk in mikip cung ah mei ruah a sur lai. 50  Cite cu a ṭha ko, asinain cite cu a alnak a loh ahcun alter ṭhan khawh a si ti maw? Nannih zong a almi cite bantuk si u law pakhat le pakhat rem tein um u.”

Footnotes

^ A hrampi, “Rabbi.”
^ A hrampi, “chan.”
^ Asiloah “laa nih a hnuhmi facang rialnak lungtum.”
^ Mah cacaang hi Baibal lehnak cheukhat ah a um nain hlanlio kut in ṭialmi, zumhawk a tlakmi Greek Baibal hna ah a um lo. Thlaihhlei A3 ah zoh.
^ Mah cacaang hi Baibal lehnak cheukhat ah a um nain hlanlio kut in ṭialmi, zumhawk a tlakmi Greek Baibal hna ah a um lo. Thlaihhlei A3 ah zoh.

Hi cauk i Copyrights