Marka 7:1-37
7 Farasi mi le phungbia cawnpiaktu cheukhat cu Jerusalem in Jesuh sinah an ra i,
2 a zultu cheukhat nih a thiang lomi an kut in, phundang cun kut ṭawl loin* rawl an eimi kha an hmuh.
3 (Farasi mi le Judah mi hna cu hlanlio pupa phungphai ning in an kiu tiang an kut an i ṭawl hnu lawng ah rawl an ei tawn.
4 Dawr in an ṭin tikah i kholhṭawl hmasa loin rawl an ei lo. Pupa phungphai ning in hrai, um le darkheng hna kha ti chung ah hnim in an ṭawl tawn.)
5 Cucaah Farasi mi le phungbia cawnpiaktu hna nih Jesuh kha “Zeicah na zultu pawl nih pupa phung kha an buar? A thiang lomi an kut in zeicah rawl an ei?” tiah an hal.
6 Jesuh nih hitin a leh hna: “Mi depde hna, nan kong he aa tlaiin Isaiah nih a rak chimchungmi cu a hmaan taktak: ‘Hi mi hna nih hin an kaa lawng in an ka upat, an lungthin in cun an ka hlat ngaingai.
7 Annih nih minung sermi phungphai kha keimah bia bantuk in an cawnpiak hna caah an ka biaknak cu pakpalawng a si’ tiah a rak ṭial.
8 Nannih nih Pathian nawlbia kha nan hlawt i minung sermi phungphai tu kha nan zulh.”
9 Cun Jesuh nih “Nanmah phungphai zulh awkah Pathian nawlbia merh cu nan thiam ngai.
10 Tahchunhnak ah, Moses nih ‘Na nu le na pa kha upat hna,’ ‘Nulepa puarhrangpi in a chawnbiami* cu thihdan pek a si lai’ tiah a ti.
11 Asinain nannih nih cun ‘Nulepa sinah “Nanmah bawmh dingmi thilri cu korban (Pathian sinah pekchanhmi laksawng) a si cang” tiah a timi cu,
12 nulepa caah zeihmanh tuahpiak a hau ti lo’ tiah nan ti.
13 Nan rak i chanh chinmi phungphai zulh awkah Pathian bia kha zei ah nan rel lo. Cu bantuk in nan tuahmi thil tampi a um rih” tiah a ti.
14 Mibu kha a pawng ah a auh hna i “Nan dihlak in ka chimmi kha ngai u law a sullam hi hngalthiam tuah u.
15 Kaa chung i a lutmi nih mi cu a thurter lo, lungthin chung in a chuakmi tu nih mi cu a thurter” tiah a ti.
16 * ——
17 Jesuh cu mibu sinin a chuak i innchung a luh tikah mah tahchunhnak kong kha a zultu hna nih an hal.
18 Jesuh nih “Nannih zong anmah bantuk in nan hngalthiam ve rih lo hi ta. Kaa chung ah a lutmi nih mi cu a thurter kho lo ti kha nan hngal lo maw?
19 Kaa chung ah a lutmi cu lungthin ah a phan lo, paw ah a phan i leng ah a chuak ṭhan” tiah a ti. Mah cu Jesuh nih rawl vialte cu a thiang a ti duhnak a si.
20 Cun hitin a ti: “Lungthin chung in a rami tu nih mi kha a thurter.
21 Lungthin chung in a rami a ṭhalomi ruahnak nih nupa sualnak,* firnak, lainawnnak,
22 zuanzamnak, hakkauhnak, ṭhatlonak, hlennak, zah hngal loin thil tuahnak,* nahchuahnak, thangchiatnak, porhlawtnak le khuaruat loin thil tuahnak hna a chuahter.
23 Cu bantuk thil ṭhalo vialte cu lungthin chung in a rami an si i mi a thurter.”
24 Jesuh cu cuka in Tair le Sidon peng lei ah a kal. Ahohmanh nih ka hngal hna hlah seh ti a duh caah inn pakhat ah a lut nain mi nih an rak hngalh.
25 A fanute khuachia nih a tuahmi nu nih Jesuh kong a theihle cangka a ra i a kehram ah a bawk.
26 Mah nu cu Siria ram, Foinisia ah a ummi Greek miphun a si i a fanu chung ah aa hrolhmi khuachia kha ṭhawlpiak ding in a nawl lengmang.
27 Asinain Jesuh nih “Mah fale kha khim tein rawl pek hmasa awk a si. Fale rawl cu uifa tete kha pek awk a si lo” tiah a ti.
28 Mah minu nih “A si ko, Bawipa, asinain fale i rawl ṭilṭawt kha cabuai tang i uifa tete zong nih an ei tawn ko” tiah a leh.
29 Jesuh nih “Inn ah va ṭin cang; atu bantuk in na chim caah na fanu chung in khuachia cu a chuak cang” tiah a ti.
30 Cucaah mah minu cu inn ah a ṭin i a fanu cu ihkhun cung ah a rak ih komi kha a hmuh, khuachia nih a rak chuahtak cang.
31 Jesuh cu Tair peng in a kir tikah Sidon peng in Galili Rili lei ah a kal i Dekapolis* peng kha a tan pah.
32 Cuka ah a hna a chet i a holh kho lomi pa pakhat kha Jesuh sinah an ratpi i a cung ah kut chuan ding in an nawl.
33 Jesuh nih mibu sin khan amah lawng in a chuahpi i a hnakhaw pahnih chung ah a kutdong kha a sawh, cun a cil a chak i a lei kha a tawngh.
34 Cun van a cau i a thaw fakpi in a chuah i mipa kha “Eph′pha·tha” tiah a ti. A sullam cu “I hung tuah” tinak a si.
35 Cu caan te ah mah mipa cu a hna an awng, a lei kha a hman khawh i ṭha tein a hun holh khawh.
36 Jesuh nih mah kong kha aho sin hmanh ah chim lo ding in a thlauh hna, asinain a thlauh deuh hna paoh ah tam deuh in an chim chin ve.
37 Mi pawl cu an khuaruah a har tuk i “A tuahmi vialte hi a ṭha tuk. A hna a chetmi kha khua a theihter hna, a holh kho lomi zong a holhter hna” tiah an ti.
Footnotes
^ Phungphai ning in kut i ṭawl lo kha a si.
^ Asiloah “a volhpamhmi.”
^ Mah cacaang hi Baibal lehnak cheukhat ah a um nain hlanlio kut in ṭialmi, zumhawk a tlakmi Greek Baibal hna ah a um lo. Thlaihhlei A3 ah zoh.
^ Biafang Fianternak ah zoh.
^ Biafang Fianternak ah zoh.
^ Asiloah “Khua Hra Peng.”
