Marka 16:1-8
-
Jesuh a tho ṭhan (1-8)
16 Sabbath ni a dih tikah Mary Magdalin, Jeim a nu Mary le Salome cu Jesuh ruak thuh awkah zihmui an caw.
2 Zarh i a nikhatnak ni* zingkate, ni a chuahka ah thlan an rak phan.
3 “Thlan khar lung kha aho nih dah a kan hrilhpiak lai?” tiah anmahle anmah an i ceih.
4 Asinain an zoh tikah mah lungpi cu a rak i thawn cangmi kha an hmuh.
5 Thlan chung ah an va lut i puan raang aa aihmi mino pakhat cu orhlei kam ah a rak ṭhutmi kha an hmuh tikah an khuaruah a har tuk.
6 Mah pa nih “Nan khuaruahhar hlah u. Thingtung cung ah thah a simi, Nazareth mi Jesuh nan kawl ti kha ka hngalh ko. Anih cu a tho ṭhan cang. Hika ah a um ti lo. A ruak an chiahnak hmun hi rak zoh hmanh u.
7 Va kal u law a zultu hna le Peter kha, ‘Amah nih aan chimh cang hna bang in Galili peng ah nan hlanah a kal chung cang. Cuka ah nan hmuh te lai,’ tiin va chim hna u,” tiah a ti hna.
8 An thin a phan tuk caah a therh hna i thlan chung in an chuak i an tli. An ṭih tuk caah ahohmanh an chim ngam hna lo.*
Footnotes
^ Mah cu Zarhpi Ni tiah kan auh [asiloah “atu ah auh a si”]. Judah mi hna caah cun zarh i a nikhatnak ni a si.
^ Zumhawk a tlakmi, hlanlio kut in ṭialmi cathiang hna ning in Marka Thawngṭha cu caang 8nak bia in a dong. Thlaihhlei A3 ah zoh.
