Luka 3:1-38
3 Sizar* Tiberius a bawi kum 15nak ah Pontius Pilat cu Judea ram uktu a si, Herod cu Galili peng uktu a si, Herod a upa Filip cu Iturea le Trakhonitis peng uktu a si, Lisanias cu Abilen peng uktu a si,
2 Annas cu tlangbawi upa a si i Kaiafas cu tlangbawi ngan a si. Mah lio caan ah ramcar ah a ummi Zekhariah fapa Johan sinah Pathian bia cu a phan.
3 Cucaah Johan nih nan i ngaihchihnak langhternak caah tipil ing u, mah lawng ah sual ngaihthiam nan si lai tiah Jordan Tiva pawngkam i ram hna sinah a kal i phung a chim.
4 Amah kong he aa tlaiin profet Isaiah cauk ah “‘Jehovah* lam cu sialpiak tuah u! A lam a tluan nakhnga sialpiak tuah u’ tiah ramcar ah mipa pakhat cu a au.
5 A kuarhnak paoh cu chilh an si lai i fing le tlang paoh cu chimh an si lai. A kawimi lam hna cu dinter an si lai i a bingbomi lam hna cu remter an si lai.
6 Pathian khamhnak kha mi vialte nih an hmuh lai” tiah aa ṭial.
7 Johan nih tipil in awkah a rami mibu kha “Rul tefa hna, a ra laimi thinhunnak in nan zam awk a si tiah aho nih dah ralrin aan pek hna?
8 Nan i ngaihchih taktak ahcun nan tuahsernak in langhter ngat u. ‘Kannih cu Abraham tefa kan si’ tiah i ruat hlah u. Kaan chimh hna lai, Pathian nih hi lung hna hmanh hi Abraham tefa ah a ser khawh ko hna.
9 Hreitlung cu thingkung hram ah a um cang. Thei ṭha a tlai lomi kung paoh cu hau an si lai i mei ah paih an si lai” tiah a ti.
10 Mibu nih “Cu a si ah zeidah kan tuah kun lai?” tiah an hal tikah,
11 “Angki zunhnih a ngeimi nih a ngei lomi kha ṭhen hna seh. Ei awk a ngeimi zong nih a ngei lomi kha pe hna seh” tiah Johan nih a leh hna.
12 Ngunkhuai kholtu hna hmanh tipil in awkah an ra i “Saya, zeidah kan tuah lai?” tiah an hal.
13 Johan nih “Ngunkhuai khiahmi leng in khol hna hlah u” tiah a ti hna.
14 Ralkap pawl zong nih “Kannih tah zeidah kan tuah lai?” tiah an hal tikah “Mi kha hramhram in le tlerhkhonh buin tangka va hal hna hlah u. A ding loin sualphaw hna hlah u, nan hmuhmi nihlawh man ah khan i lungsak ko u” tiah a ti hna.
15 Mi nih Khrih kha an i ruahchan caah Johan kha “Amah hi Khrih a si hnga maw?” tiah an ruah.
16 Johan nih “Kei nih cun ti in tipil kaan pek hna. Asinain keimah nakin a ngan deuhmi a ra cang lai. A phanat hri phoihtu ding hmanh ah kaa tlak lo. Anih nih cun thiang thlarau le mei in tipilnak aan pek hna lai.
17 A kut ah facang zahnak cawhlek kha aa put i phuhri kha a thianh cang lai. A fang cu buk ah a rawn hna lai. A hi kha cu a mit kho lomi mei in a khangh hna lai” tiah a ti.
18 Johan nih mi kha a phunphun in thazaang a pek hna i thawngṭha a chimh peng hna.
19 Asinain peng uktu Herod kha cu a upa nupi Herodias a ṭhit ruang ah le a ṭhalomi a tuahsernak ruang ah a mawhchiat.
20 Mah ruang ah Herod nih Johan kha thong ah a thlak. Mah cu a ṭhalo bikmi sualnak a tuahmi a si.
21 Mi pawl tipil an in tikah Jesuh zong tipil a ing ve. Thla a cam lioah van aa hung i,
22 thiang thlarau cu ṭhuro bantuk in a cung ah a rung ṭum. Cun vancung in aw pakhat a thang i “Nang cu ka dawtmi ka Fapa na si, na cung ah ka lung a tling” tiah a ti.
23 Kum 30 hrawng a si ah Jesuh nih mi kha cawnpiak hram a thawk, mi hmuhnak ah cun,Jesuh cu Josef fapa a si,Josef cu Heli fapa a si,
24 Heli cu Matthat fapa a si,Matthat cu Levi fapa a si,Levi cu Melkhi fapa a si,Melkhi cu Jannai fapa a si,Jannai cu Josef fapa a si,
25 Josef cu Mattathias fapa a si,Mattathias cu Amos fapa a si,Amos cu Nahum fapa a si,Nahum cu Esli fapa a si,Esli cu Naggai fapa a si,
26 Naggai cu Maath fapa a si,Maath cu Mattathias fapa a si,Mattathias cu Semein fapa a si,Semein cu Josek fapa a si,Josek cu Joda fapa a si,
27 Joda cu Joanan fapa a si,Joanan cu Rhesa fapa a si,Rhesa cu Zerubbabel fapa a si,Zerubbabel cu Shealtiel fapa a si,Shealtiel cu Neri fapa a si,
28 Neri cu Melkhi fapa a si,Melkhi cu Addi fapa a si,Addi cu Kosam fapa a si,Kosam cu Elmadam fapa a si,Elmadam cu Er fapa a si,
29 Er cu Jesuh* fapa a si,Jesuh cu Eliezer fapa a si,Eliezer cu Jorim fapa a si,Jorim cu Matthat fapa a si,Matthat cu Levi fapa a si,
30 Levi cu Simeon fapa a si,Simeon cu Judas fapa a si,Judas cu Josef fapa a si,Josef cu Jonam fapa a si,Jonam cu Eliakim fapa a si,
31 Eliakim cu Melia fapa a si,Melia cu Menna fapa a si,Menna cu Mattatha fapa a si,Mattatha cu Nathan fapa a si,Nathan cu David fapa a si,
32 David cu Jesse fapa a si,Jesse cu Obed fapa a si,Obed cu Boaz fapa a si,Boaz cu Salmon fapa a si,Salmon cu Nashon fapa a si,
33 Nashon cu Amminadab fapa a si,Amminadab cu Arni fapa a si,Arni cu Hezron fapa a si,Hezron cu Perez fapa a si,Perez cu Judah fapa a si,
34 Judah cu Jakob fapa a si,Jakob cu Isak fapa a si,Isak cu Abraham fapa a si,Abraham cu Terah fapa a si,Terah cu Nahor fapa a si,
35 Nahor cu Serug fapa a si,Serug cu Reu fapa a si,Reu cu Peleg fapa a si,Peleg cu Eber fapa a si,Eber cu Shelah fapa a si,
36 Shelah cu Kainan fapa a si,Kainan cu Arpaksad fapa a si,Arpaksad cu Shem fapa a si,Shem cu Noah fapa a si,Noah cu Lamek fapa a si,
37 Lamek cu Methuselah fapa a si,Methuselah cu Enok fapa a si,Enok cu Jared fapa a si,Jared cu Mahalaleel fapa a si,Mahalaleel cu Kainan fapa a si,
38 Kainan cu Enosh fapa a si,Enosh cu Seth fapa a si,Seth cu Adam fapa a si,Adam cu Pathian fapa a si.
Footnotes
^ Asiloah “Rom Siangpahrang.”
^ Thlaihhlei A5 ah zoh.
^ “Joses,” hlanlio kut in ṭialmi cathiang cheukhat ning in.
