Luka 17:1-37
17 Jesuh nih a zultu kha hitin a ti hna: “Tlukrilhtertu thil hna cu hrial khawh an si lai lo. Asinain midang a tlukrilhtertu cu thil ṭhalo a tong lai.
2 Ngakchia he aa lomi hi mi hna tlukrilhter nakin cun a hngawng ah facang rialnak lungtum thlaih in rili ah thlak cu a caah a ṭha deuh lai.
3 Nannih zong i ralring u. Nan unau pakhat nih sualnak pakhatkhat a tuah ahcun chimhhrin u. Aa ngaihchih ahcun ngaithiam u.
4 Nikhat ah nan cung ah voi sarih palhnak a tuah nain voi sarih ning in a ra i ‘Ka ngaithiam’ tiah aan nawl hna ahcun va ngaithiam u.”
5 Lamkaltu hna nih “Kan zumhnak hi a ṭhawn deuh nakhnga kan bawm” tiah an ti.
6 Mah tikah Bawipa Jesuh nih “Anṭam ci tia zumhnak nan ngeih ahcun hi thingtheihmung kung hi ‘A hram in i phawi law rili ah va phun’ tiah ti u law nan chim ning in a si ko lai.
7 “Lei thuannak in siseh, tuu cawnghnak in siseh a rak tlungmi sal kha ‘Ra law cabuai ah rawl rak ei colh ve’ tiah a timi nan lakah nan um maw?
8 A tak ti ahcun ‘Na thil i thleng law zanriah ka timhpiak. Ka ei dih tiang rak ka bultawl. Mah dih hnuah nang cu ei ve te’ tiah nan ti tawn a si ko lo maw?
9 Fialmi ning in a tuahmi a si caah a bawipa nih sal sinah cun lawmhnak bia a chim lai maw?
10 Cu bantuk in nannih zong fialmi vialte nan tuah dih tikah ‘Kannih cu santlai lomi sal kan si ko. Kan tuah awk a simi lawng pei kan tuah ko cu’ va ti u” tiah a ti hna.
11 Jesuh cu Jerusalem khualei a kal tikah Samaria ram le Galili ram kha a tan pah.
12 Khua pakhat i a luh tikah thinghmuimi pahra nih Jesuh kha an hmuh, asinain annih cu lamhla nawn ah an dir.
13 Cun “Jesuh, Saya, kan zaangfah ko!” tiah an au.
14 Jesuh nih a hmuh hna tikah “Tlangbawi hna sinah va kal u law va i hmuhsak u” tiah a ti hna. An kal lioah an zawtnak cun an thiang.
15 An lak i pakhat nih a dammi kha aa hngalh tikah a rak kir ṭhan i Pathian kha aw thangpi in a thangṭhat.
16 Cun Jesuh kehram ah a bawk i lawmhnak bia a chim. A tak ti ahcun anih cu Samaria mi a si.
17 Jesuh nih “An pahra ning in an thiang lo maw? A dang pakua tah khoika ah dah an um?
18 Hi ramdang mipa dah ti lo cu Pathian thangṭhat awkah a rak kirmi ahohmanh an um lo maw?” tiah a ti.
19 Cun mah pa kha “Tho law inn ah va ṭin cang. Na zumhnak nih aan damter cang” tiah a ti.
20 Farasi mi nih Pathian Pennak cu zeitik ah dah a rat lai tiah an hal tikah Jesuh nih “Pathian Pennak cu langhngan in a ra lai lo.
21 Mi nih ‘Hika ah!’ asiloah ‘Khika ah!’ ti zong in an chim lai lo. Zeicahtiah Pathian Pennak cu nan lakah a um” tiah a ti hna.
22 Jesuh nih a zultu kha hitin a ti hna: “Mi Fapa kha nan sinah umter nan duh caan a phan te lai. Asinain cu caan cu nan hmu lai lo.
23 Mi nih ‘Hika ah a um!’ asiloah ‘Khika ah a um!’ an ti te lai. Asinain va kal hlah u, an hnu zong va zul hna hlah u.
24 Nimtlau a lek tikah van khattalei in khattalei tiang a ceuh dih bantuk in mi Fapa a rat tikah a si te lai.
25 A hmasa ah mi Fapa cu harnak tampi a tong lai. Cun tuchan mi hna hlawtnak zong a tong lai.
26 Noah chan bantuk in mi Fapa a rat tik zong ah a si ve lai:
27 Noah lawng chung i a luh ni tiang mi cu an ei, an ding, an i ṭhi, an i um. Tilian a tlun tikah an dihlak in hrawh an si.
28 Lot chan zong ah cutin a rak si: Mi cu an ei, an ding, an i caw, an i zuarh, thlaici an tuh, inn an sa.
29 Asinain Sodom khua in Lot a chuah ni ah vancung in kat le mei ruah a sur i an dihlak in hrawh an si.
30 Mi Fapa a langh ni zong ah cutin a si ve lai.
31 “Cu ni ahcun inncung i a ummi cu innchung i thilri lak awkah ṭum hlah seh, lo ah a ummi zong a thil lak awkah inn ah tlung hlah seh.
32 Lot nupi kha i cinken u.
33 A nunnak khamh awkah aa zuammi cu a nunnak a sung lai. Asinain a nunnak a sungmi tu cu a nung ṭhan lai.
34 Kaan chimh hna lai, cu zan ah ihkhun pakhat i a itmi pahnih lakah pakhat cu kalpi a si lai i pakhat tu cu nganhta a si lai.
35 Fang a rialmi nu pahnih lakah pakhat cu kalpi a si lai i pakhat tu cu nganhta a si lai.”
36 * ——
37 Mah tikah a zultu hna nih “Bawipa, khoika ah dah cutin a si lai?” tiah an hal tikah Jesuh nih “Ruak a umnak hmun ah mupi* an i pum lai” tiah a leh hna.
Footnotes
^ Mah cacaang hi Baibal lehnak cheukhat ah a um nain hlanlio kut in ṭialmi, zumhawk a tlakmi Greek Baibal hna ah a um lo. Thlaihhlei A3 ah zoh.
^ Asiloah “langta” zong a si kho.
