Luka 19:1-48
19 Jesuh cu Jeriko khua chung ah a lut i khua kha a hei tan.
2 Cuka khua ah Zakia tiah auhmi ngunkhuai kholtu bawi pakhat a um, anih cu mirum a si.
3 Jesuh kha hmuh a duh tuk, asinain miniam a si caah le Jesuh cu mi nih an but caah a hmu kho lo.
4 Cucaah Jesuh a kalnak ding lam ah a rak tli chung i a hmuh khawh nakhnga saikamor kung cung ah a kai.
5 Cuka hmun a phanh tikah Jesuh nih cunglei kha a zoh i “Zakia, rak ṭum zok, tuni na inn ah ka tlung lai” tiah a ti.
6 Zakia cu khulrang in a ṭum i Jesuh kha lunglawm tein a conglawmh.
7 Mah kha mi nih an hmuh tikah “Misual pa inn ah aa ṭhum” tiah an ti i an phunzai.
8 Zakia cu a dir i “Bawipa, ka ngeihmi thilri i hnarcheu kha misifak ka pek hna lai, pakhatkhat sinah a ding loin ka rak lakmi paoh kha a let li in ka cham hna lai” tiah a ti.
9 Jesuh nih “Nihin ah hi inn ah hin khamhnak a phan cang, zeicahtiah nangmah zong Abraham tefa na si ve.
10 A tak ti ahcun mi Fapa cu a tlaumi hna kawl awk le khamh awkah a ra” tiah a ti.
11 Cucaah Jesuh nih a bia a ngaimi a zultu hna kha a dang tahchunhnak pakhat in a chimh hna. Zeicahtiah Jerusalem an phanh tikah Pathian Pennak cu a ra colh cang lai tiah an ruah caah a si.
12 Jesuh nih hitin a ti: “Siangpahrang fapa pakhat cu siangpahrang a si hnuah rak kir ṭhan ding in ram hlapi ah khual a tlawng.
13 A kal hlanah a salle pahra kha a auh hna i mina* pharhra a pek hna, ‘Ka rak kir hlan tiang mah tangka in hin chaw rak let u’ tiah a cahtak hna.
14 Asinain a rammi hna nih an huat caah lamkal an thlah hna i ‘Hi pa hi kan siangpahrang si awkah kan duh lo’ tiah an ti.
15 “Siangpahrang a si hnuah a rak kir i chawlehnak in zeizat dah an miak ti hngalh awkah tangka* a rak pekmi a salle kha a auh hna.
16 A pakhatnak sal cu a ra i ‘Bawipa, na ka pekmi tangka in mina pharhra ka miak’ tiah a ti.
17 A bawipa nih ‘Na tuahmi cu a ṭha ngaingai, nang cu salṭha na si! Thil hmete ah zumhawktlak na si caah khua pahra uktu na si lai’ tiah a ti.
18 A pahnihnak sal cu a ra i ‘Bawipa, na ka pekmi tangka in mina pharnga ka miak’ tiah a ti.
19 A bawipa nih ‘Nang zong khua panga uktu na si lai’ tiah a ti.
20 Asinain a dang sal pakhat cu a ra i ‘Bawipa, mah hi na tangka kha a si, puan in ka fun i ka chiah ko.
21 Bawipa, nang cu zaangfah a hmang lomi, na khon lomi tangka zong a lami, na tuh lomi thil zong a zunmi na si ti kha ka hngalh caah kaan ṭih’ tiah a ti.
22 A bawipa nih ‘Salṭhalo, nangmah bia lila in bia kaan ceih lai. Kei cu zaangfah a hmang lomi, ka khon lomi tangka a la tawnmi le ka tuh lomi thil a zun tawnmi ka si kha na hngalh ahcun,
23 ka tangka kha a karh in na rak cawih hna awk pei a si cu. Cutin a si ahcun ka rak kir ṭhan tikah ka tangka* he, a karh he ka hmuh lai si’ tiah a ti.
24 “Mah hnuah a pawng ah a dirmi hna kha ‘A sinin tangka kha la u law mina pharhra a ngeimi kha pe u’ tiah a ti hna.
25 Asinain annih nih ‘Bawipa, anih cu mina pharhra pei a ngeih cang ko cu!’ tiah an ti.
26 Anih nih ‘Kaan chimh hna lai, a ngeimi cu chap an si lai, a ngei lomi cu a ngeihchunte hmanh kha chuh a si lai.
27 Keimah uk a duh lomi ka ral hna kha rak hruai hna u law ka hmaika ah hin that hna u’ tiah a ti.”
28 Cutin a chim dih hnuah Jesuh cu Jerusalem khualei ah a hung kal.
29 Oliv Tlang ah a ummi Bethfath khua le Bethani khua a phanh dengmang tikah a zultu pahnih kha a thlah hna i,
30 “Nan hmai khua ah khin va kal u law khua chung nan luh cangka ahohmanh nih an i cit bal rih lomi laa fate pakhat aa hrengmi kha nan hmuh lai. A hri kha phoih u law hika ah ratpi u.
31 Pakhatkhat nih ‘Zeicah laa fate hri kha nan phoih?’ tiah an in hal hna ahcun ‘Bawipa nih a herh’ va ti u” tiah a ti hna.
32 Zultu pahnih cu an kal i Jesuh nih a chimh hna ning in an va hmuh.
33 A hri an phoih lioah a ngeitu hna nih “Zeicah laa fate hri kha nan phoih?” tiah an hal hna.
34 Annih nih “Bawipa nih a herh” tiah an leh hna.
35 Cun laa fate kha Jesuh sinah an rak hruai, an puan kha laa keng cung ah an danh i Jesuh kha an citter.
36 Jesuh nih laa fate a hun i cit tikah mi nih an puan kha lam ah an phah.
37 Oliv Tlang chuk zuannak pawng a phanh tikah a zultu tampi cu an hmuhmi khuaruahhar thil ruang ah an i lawm tuk i Pathian kha aw thangpi in hitin an thangṭhat:
38 “Jehovah* min in a rami Siangpahrang cu thluachuah hmu ko seh! Vancung ah daihnak um ko seh, vancung ah a ummi Pathian cu thangṭhat si ko seh!”
39 Mibu lakin Farasi mi cheukhat nih “Saya, na zultu pawl hi dai tein umter hna” tiah an ti.
40 Jesuh nih “Kaan chimh hna lai, hi hna hi dai tein an um ahcun lung hna hi an au lai” tiah a leh hna.
41 Jerusalem khua pawng an phanh tikah Jesuh nih khuapi cu a zoh i a ṭah.
42 Hitin a ti: “Daihnak a pemi thil hna cu zeidah an si ti kha hei hngal law ti ka hei duh dah, asinain mah thil hna cu na sinin thuhkanh a si cang.
43 Na ral hna nih na velchum in tung zum in ralhruang an sak lai i a kenkip in an in kulh caan a phan te lai.
44 Nangmah le na fale cu hrawh dih cikcek nan si lai, lungrualmi pakhat hmanh a taang lai lo, zeicahtiah Pathian cu nangmah biaceih awkah a ra nain na rak hngalh lo caah a si.”
45 Mah hnuah Jesuh cu biakinn chung ah a lut i cuka ah thil a zuarmi kha a ṭhawl hna.
46 “Cathiang ah ‘Ka inn cu thlacamnak inn a si lai’ tiah aa ṭial nain nannih nih mifir kua ah nan ser cang” tiah a ti hna.
47 Jesuh nih biakinn ah nifate a cawnpiak hna. Tlangbawi upa hna, phungbia cawnpiaktu hna le Judah mi upa hna nih Jesuh thahnak ding lam kha an kawl;
48 asinain an hmu lo, zeicahtiah mizapi nih Jesuh bia ngaih kha an duh tuk.
Footnotes
^ Greek mina pakhat cu drachma 100 he aa tluk. Thlaihhlei B14 ah zoh.
^ A hrampi, “ngun.”
^ A hrampi, “ka ngun.”
^ Thlaihhlei A5 ah zoh.
