Jeim 2:1-26
2 Unau hna, sunparnak in a khatmi kan Bawipa Jesuh Khrih a zummi nan si ko nain thleidannak nan ngei rih dahra?
2 Nan i pumhnak hmun ah mi pahnih an ra hei ti u sih; pakhat cu sui kutdong hrolh aa hrolh i thilpuan ṭhaṭha aa hruk, a dang pakhat tu cu a si a fak i a thurmi le a ṭetmi thilpuan aa hruk.
3 Thilpuan ṭhaṭha aa hrukmi kha mithmai ṭha pe in “Hika hmun ṭha ah hin rak ṭhu” tiah nan ti i misifak kha cu “A dir in dir ko” asiloah “Ka kehram ah hin rak ṭhu” tiah nan ti ahcun,
4 nan lakah thleidannak a um i a ding loin bia a ceihmi* biaceihtu bantuk nan si lai, a si ko lo maw?
5 Ka dawtmi unau hna, ngai hmanh u. Hi vawlei nih misifak in a hmuhmi hna kha Pathian nih zumhnak i a rummi si awk le amah a dawmi hna pek awkah bia aa kammi Pennak ro co awkah a thim hna, a si ko lo maw?
6 Asinain nannih nih misifak kha nan zawmhtaih hna. A tak ti ahcun mirum mi nih an in namneh hna i biaceihnak zung ah an in hnuh hna a si ko lo maw?
7 Pek nan simi minṭha a thangchiattu zong an si ko lo maw?
8 “Na minunghawi kha nangmah naa dawt bantuk in na dawt lai” tiah cathiang ah aa ṭialmi ning in siangpahrang nawlbia kha nan zulh ahcun a ṭha ko.
9 Asinain thleidannak nan ngeih peng ko ahcun sualnak nan tuah a si i nawlbuartu nan si kha nawlbia nih a langhter.
10 Mi pakhat nih nawlbia dihlak a zulh nain pakhat te a buar ahcun nawlbia dihlak a buar a si ko.
11 “Va zuangzam hlah” a titu Pathian nih “Lai va nawng hlah” ti zong in a ti. Cucaah nan zuangzam lo nain lai nan nawn ahcun nawl a buarmi nan si ko.
12 Nannih cu miluat nan si i nan caah sermi nawlbia ning in biaceih nan si lai. Cucaah miluat mi hna nawlbia ning in nung u law bia chim u.
13 Zaangfahnak a ngei lomi cu Pathian nih zaangfahnak ngei loin bia a ceih ve lai. Zaangfahnak nih biaceihnak kha a tei.
14 Unau hna, mi pakhat nih zumhnak ka ngei tiah a ti i a tuahsernak in a langhter lo ahcun zeidah a ṭhahnem? Cu zumhnak nih cun a khamh kho hnga maw?
15 Unaupa asiloah unaunu pakhat cu hnipuan a ngei lo i nikhat caah ei awk a za in a ngei lo hei ti u sih.
16 Nan lak i pakhatkhat nih “Lungdai tein va kal ko; lum tein um law khim tein ei” tiah nan ti i a nunnak caah a herhmi kha nan pek ṭung lo ahcun zeidah a ṭhahnem?
17 Cu bantuk in tuahsernak a um lomi zumhnak cu a thimi a si.
18 Asinain pakhatkhat nih “Nang cu zumhnak a ngeimi na si i kei cu tuahsernak a ngeimi ka si, tuahsernak a um lomi na zumhnak kha rak ka hmuhsak law kei nih ka zumhnak kha tuahsernak in kaan hmuhsak lai” tiah a ti lai.
19 Pathian pakhat lawng a um ti kha na zum ko lo maw? A ṭha ko. Khuachia hmanh nih an zumh i an ṭih tuknak ah a ther in an ther.
20 Maw mihrut, tuahsernak a um lomi zumhnak cu san a tlai lo ti kha na hngal lo maw?
21 Pupa Abraham nih a fapa Isak kha biakṭheng cung ah raithawinak i a pek hnuah mah a tuahsernak thawng in miding tiah ti a si ko lo maw?
22 A zumhnak le a tuahsernak cu hmunkhat ah rian an ṭuanṭi i a zumhnak cu a tuahsernak thawng in a tling ti kha na hngalh ko.
23 “Abraham nih Jehovah* kha a zumh caah miding ah rel a si” timi cathiang bia cu a tling. Abraham cu Jehovah* hawi tiah auh a si.
24 Mi pakhat cu a zumhnak thawng lawng in si loin a tuahsernak thawng in miding tiah ti a si kha nan hngalh cang.
25 Cu bantuk in hlawhhlangnu Rahab zong nih mi-ngiatu* kha ṭha tein a conglawmh hna i lam dang in a kalter hna hnuah mah a tuahsernak thawng in miding tiah ti a si ko lo maw?
26 Nunnak thaw* a um lomi pum cu a thimi a si bantuk in tuahsernak a um lomi zumhnak zong a thimi a si ve.
Footnotes
^ Asiloah “a ṭhalomi lam in bia a ceihmi.”
^ Thlaihhlei A5 ah zoh.
^ Thlaihhlei A5 ah zoh.
^ A hrampi, “lamkal hna.”
^ Greek, pneu’ma. Biafang Fianternak ah zoh.
