Jeim 1:1-27
1 Pathian le Bawipa Jesuh Khrih sal a simi Jeim nih khuazakip ah aa ṭhekmi phun 12 kha nan kut kaan tlaih hna.
2 Unau hna, hneksaknak a phunphun nan ton tikah i lawm ko u.
3 Zeicahtiah cutin hneksak a simi nan zumhnak nih inkhawhnak a chuahter ti kha nan hngalh ko.
4 Inkhawhnak kha a rian tling tein ṭuanter u. Cuticun zeihmanh chambau loin zeizong kip ah a tlingmi le soisel awk a um lomi nan si lai.
5 Nan lakah fimnak a baumi pakhatkhat a um ahcun Pathian kha hal peng ko seh. Zeicahtiah mawhchiatnak um loin mi vialte siang ngai in a petu Pathian nih fimnak cu a pek ko lai.
6 Lungawṭawm loin zumhnak he hal peng ko seh. Lungawṭawm in a ummi cu thlitu nih khatlei khatlei ah a choihmi rili tilet bantuk a si.
7 Cu bantuk mi nih cun Jehovah* sinin pakhatkhat ka hmuh lai tiah aa ruahchan awk a si lo.
8 Anih cu lungrep a ngei lo i a tuahmi kip ah a lung aa thleng peng.
9 A nautami unaupa cu hlorh a si tikah i lawm ko seh.
10 A rummi pa zong niamter a si tikah i lawm ko seh, zeicahtiah anih cu ramlak pangpar bantuk in a ziam ko lai.
11 Ni cu a hung chuak i a linh tikah ramkung cu a car i a par zong a ṭil, aa dawhnak cu a ziam. Cu bantuk in mirum pa zong chawva a kawl cuahmah lioah a lo ve ko lai.
12 Hneksaknak a ing khomi cu mi lunglawm a si. Zeicahtiah Pathian lung a ton caah Jehovah* nih amah a daw pengmi hna pek awkah bia aa kammi nunnak bawiluchin kha a hmuh lai.
13 Hneksaknak ton tikah “Pathian nih a ka hneksak” tiah ahohmanh nih ti hna hlah seh. Zeicahtiah Pathian cu ṭhatlonak in hneksak khawh a si lo i amah zong nih ahohmanh ṭhatlonak in a hneksak bal hna lo.
14 Asinain mi cu an duhnak nih a lemsoi hna tikah hneksak an si.
15 Mah duhnak cu a ṭhawn tuk tikah sualnak a tuahter,* sualnak nih thihnak a chuahter.
16 Dawtmi unau hna, hlenmi si hlah u.
17 A ṭhami le a tlingmi laksawng vialte cu cunglei in a rami an si. Vancung ceunak Pa sinin a rami an si. Anih cu aa ṭhial lengmangmi thladem bantuk in aa thleng bal lo.
18 Pathian duhnak cu biatak bia in hrin kan simi hi a si. Cuticun sermi thilnung vialte lakah theitlai hmasa kan hung si.
19 Ka dawtmi unau hna, hihi hngal u: Nan dihlak in bia theihnak lei ah a khul a rangmi si u law biachimnak le thinhunnak lei ah a khul a nuarmi si u.
20 Minung thinhunnak nih Pathian dinnak kha a chuahter lo.
21 A thurhnawmmi le ṭhatlonak vialte kha a pelpawi tiang in hlaw dih hna u. Cun nan chung ah tuh a simi, aan khamh khotu hna bia kha toidor tein cohlang ko u.
22 Pathian bia cu a theih lawng a theimi si loin a tuahmi tu si u. A hmaan lomi ruahnak in nanmahle nanmah i hleng hlah u.
23 A bia cu a thei nain a tuah lomi cu thlalang ah a hmai aa bihmi pa he an i lo.
24 Thlalang ah amahle amah aa bih i a kal tikah zeidah ka lawh ti kha a philh colh.
25 Asinain zalonnak he aa tlaimi nawlbia tling ah ṭha tein aa bih i cutin aa bih pengmi cu a theihmi kha philh loin a tuah tu in a tuah; cutin a tuah caah aa lawm lai.
26 Pathian ka bia tiah aa ruat nain a lei aa uk kho lomi* cu amahle amah aa hlengmi a si i a biaknak cu san a tlai lo.
27 Kan Pa Pathian hmaiah a thiangmi le thurhnawmhnak a um lomi biaknak cu ngakṭah le nuhmei pawl harnak an ton tikah zohkhenh le hi vawlei thurhnawmhnak ah i tel hrimhrim lo kha a si.
Footnotes
^ Thlaihhlei A5 ah zoh.
^ Thlaihhlei A5 ah zoh.
^ A hrampi, “Mah duhnak cu pawi a si i sualnak kha a hrin.”
^ Asiloah “rangchak hri in a ṭem lomi.”
