Yishima 21:1-31
21 Mbunge ya mwanangana yili ngwe mihuji ya meya mu moko ja Yehova.
Iye kakuyitwala kweswako anazange.
2 Mutu kakunyonga ngwe majila jenyi eswe kalita,alioze Yehova kakuhengwola mbunge.
3 Kulinga yuma yalita ni yuma ya ululichakupemena chinji Yehova kuhiana mulambu.
4 Meso akulinangamisa ni mbunge ya kulizata.Ndeya yize yakusongwela atu api yili shili.
5 Yuma yize chipalakata akutesa kulinga yakwenda kanawa,alioze eswe waze akulipupula makapwa yiswale.
6 Upite uze wakuzuka ni limi lia mahuzawakupwa ngwe mume, uli muheto uze wakutwala ku kufwa.
7 Yitanga ya upupilo ya atu api muyikaashihisa,mumu ayo kakulituna kulinga yuma ya ululi.
8 Jila ya mutu yoze ahisa yili yipi,alioze yitanga ya mutu mupema yalulama.
9 Shinaho kutwama mu mbalanda,kuhiana kutwama mu zuwo limuwika ni pwo yoze wakuzanga kuzwela.
10 Mutu mupi kakuzanga yuma yipi,iye keshi kwivila mukwo keke.
11 Muze mukwa-kulenya akumumwesa lamba, yoze keshi mana kakupwa ni mana.Muze mukwa-mana akumulongesa kakupwa ni chinyingi.
12 Mukwa-ululi kakutala zuwo lia mutu mupi,mukwa-ululi kakumwesa lamba atu api.
13 Yoze wakufuka matwi hanga achine kwiva muteto wa chiswale,neye makateta alioze kechi kamwiva.
14 Chawana chize akuhana ku tenga chakutepulula uli,ni kalimbalimba yoze akulingila ku tenga kakutepulula ufwatulo.
15 Kulinga yuma ya ululi chakwivisa mukwa-ululi chiseke,alioze chapwa chipi chinji kuli waze akulinga yuma yipi.
16 Mutu yoze wakwehuka jila ya chinyingimakahwima hamuwika ni waze anapombo mu ufwe.
17 Yoze wakuzanga kuheha makapwa chiswale.Yoze wakuzanga vinyu ni maji a oleve kechi kapwa pichi.
18 Chingulungulu makamukwata hanga atusule mukwa-ululi.Ha chihela cha mukwa-kalimbalimba makasalakanyisaho akwa-kushishika.
19 Shinaho kutwama mu puya,kuhiana kutwama ni pwo yoze wakuzanga kuzwela, pwo mukalu.
20 Ku zuwo lia mukwa-mana kuli upite ulemu ni maji a oleve,alioze chihepuke kakukisa yize alinayo.
21 Yoze wakufupa ululi ni zango lize kulishi kuhwamakawana mwono, ululi ni uhenya.
22 Mukwa-mana mahasa kunyina chipanga cha mbonge cha yitakameni kupuzula yipanga yize ayo akujikijila.
23 Yoze wakufunga kanwa ni limi lienyikeshi kumona milonga.
24 Mutu yoze wakulizata, kulinangamisa ni kulisuta,kali mutu yoze wakulinga yuma chakuhona kunyonga ha lamba lize mulizako.
25 Usolo wa mutu chileya, muukamushiha,mumu keshi kuzanga kukalakala.
26 Chileya kakunyonga tangwa lia muundu yize anazange ni kuzo yeswe,alioze mukwa-ululi kakuhana yeswe yize alinayo.
27 Mulambu wa atu api wapwa upi.
Mba yika mutwamba nyi mauhana ni nyonga lipi!
28 Chela yoze wakuhanjika yuma ya mahuza kumakafwa,alioze mutu yoze wakupanjika kanawa, uchela wenyi muukapwa upema.
29 Mutu mupi katwamine ni sonyi,alioze mukwa-ululi jila yenyi yapwa yaujikijilo.
30 Kukushi mana, malinjekela chipwe chiyulo chize muchilimika ni Yehova.
31 Kavwalu kakumululieka mumu lia tangwa lia jita,alioze Yehova mwe wakulamwina.
