Yishima 13:1-25
13 Mwana ukwete mana kakutayiza fumbo lia tato,alioze mukwa-kulenya keshi kupanjika fumbo.
2 Ku mihuko ya mu kanwa lienyi, atu makalia yuma yipema,alioze kuli akwa-kwonga kakuzanga upupilo.
3 Yoze wakusakula yize mahanjika kakufunga mwono wenyi.Yoze wakuhanjika chakuhona kunyonga makamunongesa.
4 Chileya kakuzanga kupwa ni yuma yinji, alioze keshi niyimwe,alioze mukwa-kuhondangana makapwa ni yeswe yize anazange.*
5 Mukwa-ululi keshi kuzanga mahuza,alioze yitanga ya mutu mupi yakukolesa sonyi.
6 Ululi wakufunga mutu yoze wakwenda mu jila yipema,alioze upi wakunongesa chivulumunyi.
7 Amwe kakulisolola ngwo kali pichi, alioze keshi nichimwe,akwo kakulisolola ngwo kali yiswale, alioze kali ni upite unji.
8 Pichi kakufweta upite wenyi hanga alamwine mwono wenyi,alioze yiswale kukushi niumwe yoze wakwapinjisa.
9 Pangu lia akwa-ululi liakutemuka chinji,alioze ndeya ya atu api makayijima.
10 Kulinangamisa chakuneha vunda,alioze mana kali kuli waze akufupa yiyulo.
11 Upite uze mutu akuzuka kawashi-washi wakutepuluka,alioze upite uze mutu akukunga hakehe-hakehe wakwoka.
12 Yize mutu akushimbwila nyi yalingiwile yakumunehena yinyengo,alioze yize akuzanga nyi yalingiwa yapwa ngwe mutondo wa mwono.
13 Yoze wakulelesa fumbo makamumwesa lamba,alioze yoze wakuvumbika shimbi makatambula fweto.
14 Yuma yize mukwa-mana akulongesa yapwa chishina cha mwono.Yakuchiza mutu mu jila ya kufwa.
15 Yoze ukwete chinyingi kakwete utayizo wa akwo,alioze mwono wa atu waze akwonga akwo, wapwa ukalu.
16 Mutu chikanyame kakulinga yuma ni chinyingi,alioze chihepuke kakusolola uhepuke wenyi.
17 Mukeji* mupi kakuneha wika sango jipi,alioze kanganda washishika kakuhwimisa mbunge.
18 Yoze wakulituna fumbo kakupwa chiswale ni kulikolesa sonyi,alioze yoze wakutayiza fumbo makamuchichimieka.
19 Yize mutu akuzanga nyi yalingiwa yakumuvisa kuwaha,alioze chihepuke keshi kuzanga kwehuka yuma yipi.
20 Yoze malikata ni akwa-mana ni neye mapwa ni mana,alioze yoze menda ni yihepuke makamona lamba.
21 Lamba liakukaujola yivulumunyi, aliozekuli akwa-ululi yuma yakwenda kanawa ku mwono wo.
22 Mutu mupema kakuhichikila ajikulu jenyi chihinga,alioze upite wa chivulumunyi kakuutulikila mukwa-ululi.
23 Mu munda wa chiswale mwakutuhuka kulia chinji,alioze muchihasa kutoka mumu lia kuhona ululi.
24 Yoze keshi kufumba* mwanenyi keshi kumuzanga,alioze yoze wakuzanga mwanenyi keshi kwecha kumufumba.
25 Mukwa-ululi kakulia makuta,alioze jimo lia atu api lishi kukuta.
