Ewe Áeúin Taropwe Ngeni Chón Korint 3:1-23
3 Iwe, ámi pwii kana, úse tongeni kapas ngenikemi ussun ái kapas ngeni emén mi nóm fán emmwenien án Kot ngún mi fel, nge emén mi eáni ekiekin fénúfan,* mi ussun chék ménúkol lón Kraist.
2 Ngang úa éúnúkemi milik, úse amwéngéénikemi mwéngé péchékkúl pún esaamwo naf ámi péchékkúl. Ren enletin, tori iei esaamwo naf ámi péchékkúl,
3 pún a chúen nóm remi ewe ekiekin fénúfan.* Pokiten a wor lólówó me ánini leimi, esap pwe a nóm remi ewe ekiekin fénúfan* me oua feffetál ussun aramasen lón ei fénúfan?
4 Pún lupwen emén a apasa, “Ngang néún Paul,” nge pwal emén a apasa, “Ngang néún Apolos,” esap pwe féfférúmi a chék ussun féfférún aramas?
5 Iwe, ié ena Apolos? Ié ena Paul? Ám chék chón angang mi féri ewe angang ewe Samol a ngenikem, chón chék álillis pwe oupwe wiliiti chón lúkú.
6 Ngang úa fótuki, Apolos a étútúúi, nge Kot a ákkámááraatá,
7 ina minne, ese wor lamoten ewe mi fótuki are ewe mi étútúúi, nge Kot ewe mi ámááraatá.
8 Iwe, ewe mi fótuki me ewe mi étútúúi ra angangfengen fán tipeeú, nge emén me emén iir repwe angei liiwiniir me ren en me an angang.
9 Pún ám chienen Kot chón angang. Nge ámi án Kot tánipi, imwen Kot.
10 Ren án Kot we kirekiréch mi somwoló a fang ngeniei, úa féri ewe lóngólóng ussun emén meilapen chón kaú mi sipeéch, nge pwal emén a kaú wóón. Iwe, emén me emén epwe túmúnúéchú ifa ussun a kaú wóón.
11 Pún ese wor emén epwe tongeni féri pwal eú lóngólóng me lúkún met a fen nóm, ina i Jises Kraist.
12 Iwe, iká emén a aúetá wóón ena lóngólóng eú imw mi ffér seni kolt, silifer, faw aúchea, irá, ását, are fetil,
13 án emén me emén angang epwe pwápwááló iká met sókkun atun a nóm lón sóssót. Pún ewe ekkei epwe pwáraaló, me ewe ekkei epwe ánnetatá met sókkun angang emén me emén a aúetá.
14 Iká ewe angang emén a aúetá wóón a chék nónnóm, i epwe angei liiwinin.
15 Iká ewe angang emén a féri a kareló, epwe watte an lus, nge i epwe manaw, ussun chék nge itá a sú seni lón ewe ekkei.
16 Ámi ouse silei pwe ámi án Kot imwenfel me án Kot ngún mi fel a nónnóm remi?
17 Iká emén epwe ataieló ewe imwenfelin Kot, Kot epwe nieló i, pún ewe imwenfelin Kot a pin, me ena imwenfel, ina ámi.
18 Emén esap otupu pwisin i: Iká emén me leimi a ekieki pwe a tipáchem lón ei ótóten fénúfan,* epwe emén mi umwes, pwe i epwe tipáchem.
19 Pún ewe tipáchemen ei fénúfan a umwes me ren Kot, pún a makketiw: “I a liapeni ekkewe mi tipáchem lón ar tipáchem solá.”
20 Pwal och: “Jiowa* a silei pwe ekiekin ekkewe aramas mi tipáchem a lamotmwáál.”
21 Ina minne, ese wor emén epwe sikásini aramas, pún mettóch meinisin ámi,
22 ese lifilifil iká Paul are Apolos are Kefas* are fénúfan are manaw are máló are ekkewe mettóch ra nóm iei are ekkewe mettóch repwe feito, mettóch meinisin ámi,
23 nge ámi néún Kraist, nge Kraist néún Kot.
