Seni lóóm lóóm, aramas ra kan ekieki ika epwele ifan me apwapwaan ika repwe alúwél are fépwúl mi péchékkúl inisiir tori feilfeiló chék. Nge a solap pún iei wesewesen nónnómuch: Kich sia mámmáló. Alon Hiop na asan, a fen mak lap seni úlúngát ngeréú ier ra ló, iwe nge a chúen pwúng ikenái.

Ewe memmeefin mochen manawfóchofóch a mmen péchékkúl, me a pwúkún nóm ren aramas meinisin. Ewe Paipel a erenikich pwe Kot a fen waalong lón letipach ewe mochen kúna manaw esemuch me pwal weweiti. (Än Salomon Afalafal 3:11) Iwe, me reom, emén Kot mi tong a tongeni waalong lón letipach och mochen esap tongeni pwénútá? Ika pélúwan me reom, ‘Aapw,’ iwe mi pwúng reom. Án Kot we Kapas a erá pwe máló ina ewe chón oput, me a pwonei pwe “epwe mola.”​—1 Korint 15:26.

Ese wor tipemwaramwar pwe máló ina ewe chón oput. Emén mi mirit esap tongeni mochen etiwa máló. Ika epwele torikich och feiengaw, sia onu, op, are sú seni. Lupwen sia semmwen, sia achocho le kútta met sipwe chikar ren. Sia achocho úkúkún ach tufich le túmúnú senikich ekkewe mettóch ra tongeni atoto máló.

Itá a wor popun ach sipwe lúkú pwe ei chón oput mi chék nóm seni lóóm epwe móló? Ewer, mi wor. Jiowa Kot, ewe Chón Fératá, ese féri aramas ar repwe manaw fitu chék ier, iwe mwirin máló. Án aramas máló esap ina kinikinin minne Kot a tipeni me lepoputáán. A mochen pwe aramas repwe manaw wóón fénúfan tori feilfeiló chék, me i a kan apwénúetá minne a tipeni.​—Aisea 55:11.

Iwe, ifa usun máló epwe móló? Seni lóóm aramas ra resin achocho le pwákini ewe osukosuk, ina máló, nge rese sópwéch. Tori iei ra chúen achocho ngeni. Ekkewe sou tipachem ra fératá ekkóch sáfei me eppetin samau mi fen pwákini ekkóch semmwen. Iir ra fókkun káéfichi kókkótun mwékútúkútún lón inisin ménúmanaw. Lón chómmóng fénú, lap ngeni aramas ikenái ra manawattam lap seni ekkewe ra manaw ipúkú ier ra ló. Iwe nge, saminne máló a móló. A pwúng alon Paipel ei: “Meinisin . . . repwe pwal liwiniti pwül.”​—Än Salomon Afalafal 3:20.

Iei ewe pwóróus mi tongeni oururukich: Sisap lólilen ren an ese pwák ren tipachemen aramas ei osukosuk mi chék nóm seni lóóm. A fen wor án Jiowa Kot kókkót pwe epwe angasakicheló are amanawakich seni máló, me ewe kinikin mi kkóló aúchean lón ena kókkót, ina wisen Jesus Kraist we.