Án Paipel Kewe Kapas Eis Ra Pélú
Jesus mi wesewesen amanawasefálietá aramas?
Ewe Paipel a fókkun affata pwe Jesus a amanawasefáli aramas mi máló. Ekkena pwóróus esap chék tutulap pún Paipel a tichiki ewe fansoun me ewe leeni ia ra fis ie. Áwewe chék, atun summer lón ewe ier 31, eú mwichemmongun aramas a fitaaló Jesus seni Kapernaum ngeni Nain. Lupwen ra wareiti ena leeni ra chufengen me pwal eú mwichen aramas. Ka tongeni lúkú pwóróusen ewe manawsefál mi fis lón ena atun pún a mak lón án Kot we Kapas, ewe Paipel, me a fis mwen mesen ekkena aramas meinisin.—Álleani Lukas 7:11-15.
Jesus a pwal amanawasefáli chiechian we Lasarus, ewe a fen rúáánú ránin an máló. Ka pwal tongeni lúkú pwóróusen minne Jesus a féri lón ena rán pún chómmóng aramas ra kúna.—Álleani Johannes 11:39-45.
Pwata Jesus a amanawasefáli aramas mi máló?
Pokiten a watte án Jesus tong a amanawasefáli aramas mi máló. A pwal féri ena pwe epwe pwáraatá pwe Seman we, ewe Chón Fératá mettóch meinisin mi manaw, a fen ngeni i ewe manaman le okkufu máló.—Álleani Johannes 5:21, 28, 29.
Án Jesus amanawasefáli ekkewe aramas mi máló a alúkúlúkú ngenikich usun an kewe pwon fán iten mwachkkan. I epwe amanawasefáli chómmóng aramas, kapachelong ekkewe aramas rese pwúng rese silei ewe enlet usun Kot. Epwe suuk ngeniir ar repwe káé usun Jiowa Kot me tongei i.—Álleani Föför 24:15.