1, 2. (a) Met epwe apéchékkúla ach lúkúlúk pwe ewe Mwúún Kot epwe apwénúetá minne Jiowa a tipeni fán iten aramas? (b) Me ren Efisos 2:12, ifa usun ekkewe pwonen etipeeú ra apéchékkúlakich? (Ppii pwal ewe sasing lepoputáán ei lesen.)

 KICH Chón Pwáraatá Jiowa sia kan apasa pwe Mwúún Kot, ina chék ewe Mwú epwe pwákini ach kewe osukosuk meinisin, me sia mwasangasang le áiti ngeni aramas seni lón Paipel ei pwóróus mi enlet. Ach ei ápilúkúlúk allim ren met ei Mwú epwe atoto a pwal oururu letipach. Iwe nge, kich mi fókkun lúkúlúk pwe ena Mwú eú wesewesan me epwe apwénúetá minne Kot a tipeni? Met popun sia tongeni fókkun lúkúlúk wóón ena Mwú?​—Ipru 11:1.

² Ewe Mwúún Messaia, ina eú kókkót Ewe mi Unusen Manaman a akkóta pwe epwe apwénúetá minne a tipeni fán iten férian kewe. Án Jiowa unusen pwúúng le nemenem, ina ewe lóngólóng mi fókkun núkúchar fán iten ewe Mwú. Ikkeei ekkewe kinikin mi lamot lón ena Mwú: an we king, chienan kewe sou nemenem, me minne epwe nemenem wóón. Jiowa a anúkúnúkatiw meinisin ekkena kinikin lón ewe Mwú ren ekkewe pwonen etipeeú. Ikkena ekkewe pwonen etipeeú mi fókkun núkúchar Jiowa Kot are Néún we Jesus Kraist ra féri. Ach ekilonei ekkena pwonen etipeeú epwe alapaaló ach weweiti ifa usun epwe wesewesen pwénútá  minne Kot a tipeni me epwe álisikich le mirititi núkúcharen ei kókkót.​—Álleani Efisos 2:12.

3. Met sipwe káé lón ei lesen me ewe lesen mwirin ei?

³ Ewe Paipel a kapas usun wonu pwonen etipeeú mi kon lamot mi weneiti ewe Mwúún Messaia mi nóm fán nemenien Kraist Jesus. Ikkeei: (1) ewe pwonen etipeeú ngeni Apraham, (2) ewe pwonen etipeeú fán iten ewe Allúk, (3) ewe pwonen etipeeú ngeni Tafit, (4) ewe pwonen etipeeú fán iten emén souasor usun chék Melkisetek, (5) ewe pwonen etipeeú mi fé, me (6) ewe pwonen etipeeú fán iten eú Mwú. Iei sipwe káé ifa usun eú me eú ekkeei pwonen etipeeú ra weneiti ewe Mwúún Kot me ifa usun ra álisatá pwénútáán minne Kot a tipeni fán iten fénúfan me aramas.​—Ppii ewe chart “ Ifa Usun Kot Epwe Apwénúetá Minne A Tipeni.”

4. Me ren ewe puken Keneses, ikkefa ekkewe mettóch Jiowa a apwúngaló mi weneiti aramas?

⁴ Mwirin án Jiowa ammólnatá ei fénúfan mi ling pwe epwe leenien aramas, a apwúngaló úlúngát mettóch mi weneiti aramas: (1) Kot epwe fératá aramas lón napanapan, (2) aramas repwe achéúeló ewe Paratis wóón unusen fénúfan me ouraló ren mwirimwiriir kewe mi pwúng, me (3) a allúk ngeni aramas ar resap ochoch uwaan ewe iráán silei éch me ngaw. (Ken. 1:26, 28; 2:16, 17) Iwe, a fen unus ekkewe mettóch mi lamot ren án Kot epwe apwénúetá minne a tipeni fán iten aramas me fénúfan. Iwe nge, pwata chék a lamot ngeni Kot an epwe pwal féri ekkewe pwonen etipeeú?

5, 6. (a) Ifa usun Satan a sótun atai pwénúetáán án Kot kewe kókkót? (b) Met Jiowa a féri lupwen Satan a ú ngeni lón Eten?

⁵ Satan ewe Tefil a poputá le ú ngeni Kot me sótun atai pwénúetáán an kewe kókkót. A féri ena ren an apéchékkúla ewe ekiek pwe ese wor lamoten án aramas repwe álleasochisi Kot. Iwe a etipetipa Efa, ewe áeménún fefin, an epwe álleasolapa án Kot we allúk ar resap ochoch uwaan ewe iráán silei éch me ngaw. (Ken. 3:1-5; Pwär. 12:9) Iwe ren ei, Satan a ú ngeni án Kot pwúúng le nemenem wóón férian kewe. Mwirin och fansoun, Satan a pwal apasa pwe aramas ra chék tuppwél ngeni Kot pokiten ekkewe feiéch a fang ngeniir.​—Hiop 1:9-11; 2:4, 5.

⁶ Met Jiowa epwe féri ren án Satan ei féfférún ú ngeni lón Eten? Pwúngún, án Jiowa mwittir nieló meinisin ekkena chón ú ngeni epwe áwesaaló ar féfférún ú ngeni. Nge epwe wewe ngeni an esap tongeni pwénútá met Kot a fen apasa usun an we kókkót le ouraló fénúfan ren mwirimwirin Atam me Efa mi álleasochis. Iwe, ewe Chón Fératá mi tipachem ese mwittir nieló ekkewe chón ú ngeni, nge a fen pélúweni ena angangen ú ngeni ren an awora eú oesini mi kkóló lamotan, ina ewe pwon lón Eten. Ei pwon epwe alúkúlúkú pwe iteiten meinisin minne Kot a fen apasa epwe unusen pwénútá.​—Álleani Keneses 3:15.

7. Met ewe pwon lón Eten a pwár ngenikich usun ewe serepenit me mwirimwirin kewe?

⁷ Ren ei pwon lón Eten, Jiowa a apwúngú ewe serepenit me mwirimwirin kewe, weween Satan ewe Tefil me meinisin chón peni lón an ú ngeni án Kot pwúúng le nemenem. Ewe Kot mi enlet a ewisa ngeni mwirimwirin ewe fefin, ewe mi nóm láng, ewe wis an epwe nieló Satan. Ina minne, ewe pwon lón Eten a áiti ngenikich pwe Kot epwe nieló ewe chón poputááni ewe angangen ú ngeni lón Eten me epwe amóeló meinisin pwúnúngawen ena angang. A pwal affata met Kot epwe áeá le apwénúetá ena mettóch.

8. Met sia káé usun ewe fefin me mwirimwirin we?

⁸ Epwe ié na mwirimwirin ewe fefin? Ena mwirimwir epwe puri mékúren ewe serepenit, weween epwe “atailo,” are nieló, Satan  ewe Tefil. Iwe, pokiten Satan emén ngún sise tongeni kúna ren mesach, a ffat pwe ena mwirimwir epwe pwal emén ngún. (Ipru 2:14, Testament Mi Fö) Ina minne, ewe fefin mi néúnatiw ena mwirimwir esap wesewesen emén fefin, nge ina och mettóch lón pekin ngún. Mwirimwirin ewe serepenit a kan chóchchómmóngóló, nge ren arapakkan 4,000 ier mwirin án Jiowa eáni ewe pwon lón Eten, a chúen monomonoló ika ié na ewe fefin me mwirimwirin we. Atun ekkena ier, Jiowa a féri ekkóch pwonen etipeeú mi pwáraatá ika ié ewe mwirimwir. Ra pwal alúkúlúkú ngeni néún Kot kewe aramas pwe I epwe áeá ena mwirimwir le amóeló ewe feiengaw watte Satan a atoto ngeni aramas meinisin.

9. Ifa ewe pwonen etipeeú ngeni Apraham me ineet a poputá le pwénútá?

⁹ Ruu ngeréú som ier mwirin án Jiowa apwúngú Satan, Jiowa a ereni Apraham an epwe ló seni fénúan we Ur lón Mesopotamia me ló ngeni ewe fénú Kanaan. (Föf. 7:2, 3) Jiowa a ereni: “Kopwe towu seni fanüom, seni aramasom pwal seni imwen semom, pwe kopwe feila lon ewe fanü ngang üpwe aiti ngonuk. Iwe, üpwe achomonga mwirimwirum kana pwe ir repwe wiliti eu mwü mi watte, üpwe pwal afeiöchuk o alapala itom pwe kopwe eman mwän feiöch. Iwe, üpwe afeiöchü ekewe chon afeiöchük, nge afeiengaua ekewe chon afeiengauok. Iwe, chon ekewe mwü meinisin won fanüfan repwe küna feiöch reöm.” (Ken. 12:1-3) Lón ekkeei wokisin, iei ewe áeúin fansoun an a kerán mak ewe pwonen etipeeú ngeni Apraham. Ese ffat ika ineet Jiowa a féri ena pwon. Iwe nge, a poputá le pwénúetá ei etipeeú lón ewe ier 1943 mwen Kraist, lupwen Apraham a 75 ierin, me a ló seni Haran me pwereló pekilóón ewe Chénúpupu Oifrat.

10. (a) Ifa usun Apraham a pwáraatá pwe a fókkun lúkú án Kot kewe pwon? (b) Ikkefa ekkewe pwóróus usun mwirimwirin ewe fefin Jiowa a pwáraaló ekis me ekis?

 ¹⁰ Fán chómmóng Jiowa a apasasefáli an we pwon ngeni Apraham me iteiten an féri ena a kan apachaalong pwal ekkóch pwóróus lón. (Ken. 13:15-17; 17:1-8, 16) Lupwen Apraham a pwáraatá pwe a fókkun lúkú án Kot kewe pwon ren an tipemecheres le fangóló néún we áláemén, iwe, Jiowa a pwal apéchékkúlaló an we pwonen etipeeú ngeni. (Álleani Keneses 22:15-18; Ipru 11:17, 18.) Mwirin an a poputá le pwénúetá ewe pwonen etipeeú, ekis me ekis Jiowa a pwáraaló pwal ekkóch pwóróus mi lamot usun mwirimwirin ewe fefin. Ewe mwirimwir epwe feito seni Apraham, epwe chómmóng, epwe wiseni ewe wis king, epwe nieló meinisin chón koputan kewe, me epwe eú feiéch fán iten chómmóng aramas.

11, 12. Ifa usun ewe Paipel a pwáraatá pwe ewe pwonen etipeeú ngeni Apraham a wor pwénúetáán mi kkóló lamotan, me met weween ena mettóch fán itach?

¹¹ Ewe pwonen etipeeú ngeni Apraham a pwénúetá lupwen mwirimwirin Apraham kewe ra fénúeni ewe Fénúen Pwon. Nge ewe Paipel a pwáraatá pwe ena pwonen etipeeú epwe pwal wor pwénútáán lón pekin lúkú. (Kal. 4:22-25) Lón pwénútáán na mi kkóló lamotan, fán án Kot emmwen aposel Paulus a áweweei pwe ewe ákkáeúin kinikinin mwirimwirin Apraham, ina i Kraist, nge ewe oruuen kinikinin, iir ekkewe 144,000 Chón Kraist mi kepit. (Kal. 3:16, 29; Pwär. 5:9, 10; 14:1, 4) Ewe fefin mi néúnatiw ewe mwirimwir, ina ewe “Jerusalem lon läng,” weween kinikinin án Kot we mwicheich lón láng, chókkewe meinisin mi tuppwél lón láng. (Kal. 4:26, 31) Usun met a fen pwáló lón ewe pwonen etipeeú ngeni Apraham, mwirimwirin ewe fefin epwe atoto chómmóng feiéch ngeni aramas.

¹² Ewe pwonen etipeeú ngeni Apraham a alúkúlúkú ngenikich pwe ewe Mwú lón láng ina wesewesen eú mwú me ewe King me chienan kewe repwe wisen nemenem lón ena Mwú. (Ipru 6:13-18) Epwe ifa úkúkún ttamen péchékkúlen ena pwonen etipeeú? Keneses 17:7 a erá pwe epwe nónnóm “tori feilfeilachök.” Epwe nóm tori án ewe Mwúún Messaia epwe nieló chón oputa Kot me aramasen fénúfan meinisin repwe kúna feiéch. (1 Kor. 15:23-26) Ren enletin, chókkewe repwe nóm wóón fénúfan lón ena atun repwe kúna feiéch tori feilfeiló. Án Jiowa pwonen etipeeú ngeni Apraham a fókkun pwáraatá pwe I epwe wesewesen apwénúetá minne a tipeni pwe ei “fanüfan epwe masou” ren aramas mi pwúng.​—Ken. 1:28.

13, 14. Met ewe pwonen etipeeú ngeni Tafit a alúkúlúkú ngenikich usun ewe Mwúún Messaia?

¹³ Ewe pwon lón Eten me ewe pwonen etipeeú ngeni Apraham ra áiti ngenikich ewe pwóróus mi lamot pwe án Jiowa nemenem ren an áeá ewe Mwúún Messaia, a lóngólóng wóón lóngólóngun we mi núkúchar, ina án Kot kewe allúk mi pwúng. (Kölf. 89:14) Itá ewe Mwúún Messaia a tongeni ngawóló, iwe epwe lamot án Kot epwe pwal ataieló? Eú pwal pwonen etipeeú a alúkúlúkú ngenikich pwe esap fókkun tongeni fis ena.

¹⁴ Jiowa a eáni eú pwon ngeni King Tafit lón Israel lóóm. Ena pwon ewe pwonen etipeeú ngeni Tafit. (Álleani 2 Samuel 7:12, 16.) Jiowa a féri ewe etipeeú ngeni Tafit atun an nemenem lón Jerusalem, a pwon ngeni pwe ewe Messaia epwe feito seni an famili. (Luk. 1:30-33) Ina minne, Jiowa a pwal tichiki menni ewe tettelin famili ewe mwirimwir epwe feito seni me affata pwe emén mwirimwirin Tafit ina i “ätewe mine wesewesen an” ewe leenien motun King lón ewe Mwúún Messaia. (Is. 21:25-27) Pokiten Jesus, ewe tettelin king seni án  Tafit famili “epwe nüküchar . . . tori feilfeilachök.” Iwe mwirimwirin Tafit epwe nónnóm ‘tori feilfeilachök, nge mwün epwe nonom usun chök akkar.’ (Kölf. 89:34-37) Ewer, án ewe Messaia nemenem esap fókkun tongeni ngawóló, me ewe feiéch epwe atoto epwe pwal nóm tori feilfeiló!

15-17. Me ren ewe pwonen etipeeú fán iten emén souasor usun chék Melkisetek, menni wis ewe mwirimwir epwe pwal wiseni, me pwata?

¹⁵ Ekkewe pwonen etipeeú ngeni Apraham me Tafit ra alúkúlúkú ngenikich pwe mwirimwirin ewe fefin epwe wiseni ewe wis king. Nge me lúkún an wiseni ena wis King a pwal lamot och mettóch pwe aramasen fénúfan repwe unusen kúna feiéch. A lamot repwe ngas seni tipis me repwe ketiw lón án Jiowa we famili lón láng me fénúfan. Iwe, mi lamot pwe ewe mwirimwir epwe pwal wiseni ewe wis souasor. Ren an epwe pwénútá ena, ewe Chón Fératá mi tipachem a féri pwal eú etipeeú, ina ewe pwonen etipeeú fán iten emén souasor usun chék Melkisetek.

¹⁶ Jiowa a néúnéú Tafit le pwáraaló pwe I epwe pwisin féri eú pwonen etipeeú ngeni Jesus fán iten an epwe apwénúetá ruu mettóch: Áeúin, epwe ‘mot lepelifichin’ Kot, tori an epwe okkufu chón koputan kewe. Oruuan, epwe “eman souasor tori feilfeilachök lon kotun Melkisetek.” (Álleani Kölfel 110:1, 2, 4.) Pwata epwe emén souasor “lon kotun Melkisetek”? Pokiten lóóm lóóm, me mwen án mwirimwirin Apraham kewe fénúeni ewe Fénúen Pwon, Melkisetek, ewe kingen Salem, a fen “eman souasor nöün Kot ewe mi Unusen Tekia.” (Ipru 7:1-3) Jiowa pwisin a ewisa ngeni ekkena ruu wis. Lón Paipel, ewe Tesin Ipru, ese pwal wor emén me lúkún Melkisetek a wisepékú ewe wis king me souasor. Pwal och, pokiten ese wor pwóróus usun án emén me mwan are mwirin wiseni wisan we, iwe, Paipel a pwal apasa pwe “a nonom lon wisen souasor tori feilfeilachök.”

¹⁷ Ren ewe pwonen etipeeú Jiowa a féri ren Jesus, I a ewisa ngeni Jesus ewe wis souasor me epwe “souasor tori feilfeilachök lon tettelin Melkisetek.” (Ipru 5:4-6) Ei mettóch a wesewesen pwáraatá pwe pwisin Jiowa a alúkúlúkú ngenikich pwe epwe áeá ewe Mwúún Messaia le apwénúetá minne a tipeni me lepoputáán fán iten aramasen fénúfan.

18, 19. (a) Met ekkewe pwonen etipeeú sia pwóróus wóón lón ei lesen ra áiti ngenikich usun ewe Mwú? (b) Ifa ewe kapas eis a ppiitá?

¹⁸ Ach káé usun ekkewe pwonen etipeeú a áiti ngenikich ifa usun ra weneiti ewe Mwúún Messaia me ifa usun kókkótun ewe Mwú a lóngólóng wóón ekkewe etipeeú mi alúkúlúk. Ewe pwon lón Eten a alúkúlúkú ngenikich pwe Jiowa epwe apwénúetá minne a tipeni fán iten fénúfan me aramas ren an áeá mwirimwirin ewe fefin. Epwe ié ewe mwirimwir, me menni wis ena mwirimwir epwe wiseni? Ewe pwonen etipeeú ngeni Apraham a pwáraatá usun ena.

¹⁹ Ewe pwonen etipeeú ngeni Tafit a pwal tichiki lón menni tettelin famili ewe ákkáeúin kinikinin ewe mwirimwir epwe feito seni. A pwal ngeni ewe mwirimwir ewe pwúúng an epwe nemeni fénúfan pwe ekkewe feiéch ewe Mwú epwe atoto epwe nóm tori feilfeiló chék. Ewe pwonen etipeeú fán iten emén souasor usun chék Melkisetek, ina lóngólóngun án ewe mwirimwir epwe wiseni ewe wis souasor. Iwe nge, esap chék Jesus epwe wisen álisi ekkewe aramas ar repwe unuséchúló. Mi pwal wor ekkóch ra fen kefilitá pwe repwe wiseni ewe wis king me souasor. Chókkana repwe feito seni ia? Ina met sipwe pwóróus wóón lón ewe lesen mwirin ei.