Eú rán lón Jerusalem, Jesus a fós usun Seman we Jiowa, me a pwáraaló mwáállin ekkewe néúwisin lamalam mi chofona lón ena atun. (Johannes 8:12-30) Minne a apasa lón ena atun, a áiti ngenikich ifa usun sipwe etittina ekkewe lúkú mi chéúfetál usun Kot lón ach ei fansoun. Jesus a apasa: “Are oupwe aleasochisi ai kewe kapas, oupwe wesewesen nei chon kaiö. Oupwe silei ewe let, nge ewe let epwe angasakemi.”​—Johannes 8:31, 32.

Alon Jesus ei, “oupwe aleasochisi ai kewe kapas,” a awora emmwen ren ach sipwe etittinaéchú án ekkewe lamalam kewe afalafal ika ra “let.” Ika ka rongorong eú pwóróus usun Kot, kopwe pwisin eisinuk: ‘Ei pwóróus a tipeeú ngeni alon Jesus kewe me ewe Paipel?’ Oupwe áppirú chókkewe mi rongorong án aposel Paulus afalafal nge ra “kaiö lon ekewe Toropwe mi Pin o kütta are met Paulus a apasa a wesewesen pwüng.”​—Föför 17:11.

Marco, Rosa me Raymonde iir kewe sia fen pwóróus usur me mwan, ra etittinaéchú minne ra lúkú ren ar kákkáé ewe Paipel ren Chón Pwáraatá Jiowa. Met ra káé?

Marco: “Ewe mi wisen káé ngenikem me pwúlúwei we, a kan néúnéú ekkewe wokisin le pélúweni meinisin ekkewe kapas eis aua eáni. A poputá ám tongei Jiowa me aua pwal pacheéchfengen me pwúlúwei we!”

Rosa: “Akkomw, ua ekieki pwe ewe Paipel ina chék eú sókkun puk mi masou ren án aramas ekiek mi sótun áweweei usun Kot. Iwe nge, ekis me ekis ua kúna pélúwen ai kewe kapas eis lón Paipel. Iei ua silei pwe Jiowa wesewesen emén. I Emén ua tongeni lúkúlúk wóón.”

Raymonde: “Ua iótek ngeni Kot ren an álillis pwe upwe silei i. Ekiseló mwirin, ám me pwúlúwei we aua poputá le káé ewe Paipel. Iwe iei aua kerán silei ewe enlet usun Jiowa! Aua fókkun meseik le silei ika Jiowa i met sókkun Kot.”

Ewe Paipel ese chék pwáraaló mwáállin ekkewe pwóróus mi chofona usun Kot nge a pwal pwáraaló ewe enlet usun napanapan kewe mi fókkun múrinné. Ina án Kot we Kapas me a álisikich le “silei meinisin mine Kot a fang ngenikich.” (1 Korint 2:12) Pwata kese pwisin sótun ppii ifa usun Paipel a tongeni pélúweni ekkewe kapas eis mi lamot usun Kot, minne a tipeni me met epwe fis lón mwachkkan? Álleani pélúwen ekkeei kapas eis wóón ewe www.jw.org fán “Bible Teachings > Bible Questions Answered”. Ka tongeni pwal tingor eú káéén Paipel me wóón ena Web site are seni emén Chón Pwáraatá Jiowa. Aua lúkúlúk pwe ika kopwe káé Paipel, kopwe máirú pwe epwe mecheres ngonuk óm kopwe tongei Kot.