Iei alon emén fefin mi tipemwaramwareiti ika Jiowa epwe tongeni áfánni i: “Ai meefi pwe ese wor lamotei, neman ina ewe watteen minen eppet ua kan achocho ai upwe pworacho ngeni.” Ka pwal eáni ena esin memmeef? Ika ina, iwe eli ka fen ekieki, ‘Jiowa a wesewesen áfánni emén me emén chón fel ngeni?’ Fókkun ewer! Minne Jesus a apasa a ánnetatá pwe Jiowa a enletin tongei emén me emén chón fel ngeni i.​—Álleani Johannes 6:44.

Met Jesus a apasa, ewe emén mi fókkun silefichi napanapen me minne Jiowa a tipeni? (Lukas 10:22) Jesus a erá: “Esap wor eman a tongeni feito rei are ewe Sam mi tinieito esap panato rei.” Ina minne sisap tongeni wiliti emén chón tapweló mwirin Kraist me chón fel ngeni Semach we lón láng Jiowa, ika pwisin Jiowa ese panikicheto ren. (2 Tesalonika 2:13) Ika sia weweiti weween minne Jesus a apasa, iwe sipwe kúna ewe watteen pisekin ánnet pwe Kot a áfánni emén me emén chón fel ngeni.

Met weween pwe Jiowa a panikicheto? Ewe kapasen Krik mi afféú ngeni “panato” mi pwal tongeni weneiti án aramas átekinató chew mi masou ren iik. (Johannes 21:6, 11) A itá wewe ngeni pwe Jiowa a átekinikich me eriánikich ach sipwe angang ngeni? Aapw. Jiowa a ngenikich ach tufichin pwisin filatá, ina popun ese eriánikich ach sipwe etiwa i lón letipach me angang ngeni. (Tuteronomi 30:19, 20) Jiowa a etittina letipen chómmóng chómmóng aramas wóón unusen fénúfan, me kúkkútta chókkewe letiper mi mochen féri minne mi múrinné. (1 Kronika 28:9) Lupwen a kúna ena sókkun aramas, iwe, a mwékút pwe epwe luki nge lón eú napanap mi pwáraaló an tong. Ifa usun?

A angepwetete le luki letipen emén mi mochen féri minne mi pwúng. (Föför 13:48, NW) Jiowa a féri ei ren ruu mettóch. Áeúin, ren ewe pwóróus allim lón Paipel, ewe mi tori emén me emén kich. Oruuan, ren án Kot we manaman mi fel. Lupwen Jiowa a kúna eú letip mi pwapwaiti ewe pwóróus mi enlet lón Paipel, iwe a áeá an we manaman mi fel pwe epwe álisi eménna le weweiti me apwénúetá ena enlet lón manawan. (1 Korint 2:11, 12) Sise fókkun tongeni wiliti emén Chón Kraist mi enlet me chón fel ngeni Jiowa mi tuppwél ika pwe Jiowa ese pwisin álisikich.

Iwe, met alon Jesus we lón Johannes 6:44 a áitingenikich usun Jiowa Kot? Jiowa a panato ekkewe aramas pokiten a kúna och mettóch mi múrinné lón letiper me a áfánni emén me emén leir. Ewe fefin, ewe meefian mi mak asan, a meefi aururun letipan seni an weweéchúti ei pwóróus mi enlet mi anúkúnúkú kich meinisin. A erá: “Me rei, ai wiliti emén chón angang ngeni Jiowa, ina ewe wis mi fókkun aúchea seni meinisin. Ika Jiowa a filieitá ai upwe néún chón angang, iwe, weween ngang mi aúchea me ren.” Nge ifa usun en? Óm silei pwe Jiowa a áfánni emén me emén néún chón fel ngeni a amwékútuk óm kopwe arap ngeni?