Kapas Eis 1: A Wor Popun Ai Manaw Wóón Ei Fénúfan?

ROSALIND, emén nengngin mi mááritá lón England, a fókkun mochen epwe watte an sile. A pwal mochen álisi aramas. Mwirin an áwesi an sukul a eáni eú angang mi tekia, mi kapachelong an álisi ekkewe ese wor imwer, me a pwal álisi ekkewe mi ter inisiir me mmang tupwuer. Inaamwo ika a wor an angang mi apwapwa me a wor wéún, nge iei alón: “Ua kan ekkekieki ren fite ier, ‘Pwata sia manaw?’ me ‘Ifa ewe popun sia manaw wóón fénúfan?’”

Pwata aramas ra kan eáni ena kapas eis? Aramas rese usun man, pún man rese tongeni ekiek. A wor án aramas tufichin káé seni ekkewe mettóch mi fis lóóm, akkóta minne repwe féri lón mwachkkan, me kútta eú popun mi aúchea pwata ra manaw.

Met ekkóch ra pélúwen ngeni ena kapas eis? Chómmóng ra meefi pwe ewe populapen sia manaw pwe sipwe alapaaló wéúch me iteféúlóch pwe sipwe kúna pwapwa.

Ika mi pwúng pélúwan kana, iwe, itá met aramas repwe ekieki? Sipwe pwisin filatá met mi lamot lón manawach. Ach kewe mochen ra kon lamot lap seni letipen Kot.

Ifa pélúwan me ren Paipel? King Salomon a ionifengeni wéún mi fókkun chómmóng me féri ekkewe mettóch mi apwapwaai, nge mwirin a meefi pwe rese atoto ren menemenéch mi nómoffóch pún ese kon wor lamoter lón manawan. A affata met epwe wesewesen atoto ewe sókkun manaw mi fókkun lamot atun a apasa: “Iwe, oupwe rong ei kapasen lesopolan: Oupwe niueiti Kot o aleasochisi an kewe allük, pun iei a fichiti aramas meinisin.” (Än Salomon Afalafal 12:13) Epwe ifa usun manawen emén mi álleasochisi án Kot kewe allúk?

 Kot a tipeni ach sipwe kúna pwapwa lón manawach. Salomon a makkeei: “A mürina seni meinisin pwe eman aramas epwe mongö o ün, epwe pwal pwapwa lon an angang weires. Nge üa küna pwe pwal ei a chök feito seni lepöün Kot.”​—Än Salomon Afalafal 2:24.

Kot a pwal mochen ach sipwe tongei me túmúnú chón ach famili. Nengeni ekkeei kapasen emmwen mi álilliséch a kawor ngeni emén me emén lón famili.

“Ekewe mwän repwe echeni pwülüer usun chök ar püsin echeni inisiir.”​—Efisos 5:28.

“Ämi fefin meinisin oupwe meniniti pwülüemi.”​—Efisos 5:33.

“Ami nau kana, oupwe aleasochisi sememi me inemi.”​—Efisos 6:1.

Ika sia apwénúetá ekkeei kapasen emmwen lón Paipel, epwe mwar wor ach pwapwa me menemenéch. Iwe nge, ewe mettóch mi kon lamot sipwe féri, ina ach sipwe káé usun ewe Chón Fératá úkúkún ach tufich me arap ngeni usun Chiechiach. Ewe Paipel a etiwakich ach sipwe “arap ngeni Kot.” A pwal eáni ei pwon mi amwarar pwe Kot “epwe arap ngenikemi.” (James 4:8) Ika ka etiwa ei kapasen etiwetiw, iwe, kopwele kúna ewe esin manaw mi wor lamotan.

Ren pwal ekkóch pwóróus ren ifa usun kopwe manaweni ewe esin manaw mi apwapwaai Kot, ppii sópwun 12 lón ewe puk Met ewe Paipel A Wesewesen Apasa? Ka tongeni kapiinawu seni www.jw.org