Pworoingawen Nemenem Epwe Wesiló!

“Kopwe anomu om apilükülük won ewe Samol mi Lapalap o aleasochisi an kewe allük. . . . Kopwe nenengeni, lupwen ekewe aramasangau repwe kasüla.”—KÖLFEL 37:34.

KA PWAL usun chómmóng aramas ra meefi letipengaw ren ar ekieki pwe pworoingawen nemenem epwe chék sópwósópwóló me esap tongeni unusen wesiló? Ika ina, iwe sia weweiti popun a ina usun meefiom. Lón uruwo, aramas ra fen sótuni sókkópaten sókkun nemenem meinisin. Iwe nge, rese sópwéch pwe rese unusen amóeló pworoingawen nemenem. Mei wor eú ápilúkúlúk lón mwachkkan pwe meinisin aramas repwe wenechar fengen lefiler?

Sia kilisou, pwe pélúwan me ren ewe Paipel, Ewer! A áitingenikich pwe ekiseló chék Kot epwe amóeló pworoingaw seni ei fénúfan. Ifa usun epwe féri ena? Ren an we Mwú, are nemenem lón láng, epwe unusen ekkesiwili ótóten ei fénúfan. Ina pwal chék ewe Mwú, Jesus a áiti ngeni néún kewe chón káé ar repwe iótek usun. Lón ena iótek, ewe mi pwal iteni Iótekin ach Samol, Jesus a apasa: “Muom epwe feito, letipom epwe pwonueta, won fonufan usun chok lon lang.”—Mateus 6:10, TF.

Iei alon ewe Paipel usun Jesus Kraist ewe Sou nemenemen ena Mwú: “A angasa ekewe chon osupwang, lupwen ra kökköri, pwal ekewe mi mwelele me chokewe esap wor ar chon alilis. Iwe, a tongei chokewe mi apwangapwang me wöüngau, a pwal amanaua ekewe mi osupwang. A angaseer seni ar riaföü me ewe angangen mwäneson mi fis ngeniir.” (Kölfel 72:12-14) Jesus a meefi meefien chókkewe mi riáfféú pokiten pworoingawen nemenem me i epwe pwákini nemenemengaw! Met, ena pwóróus ese aururu letipom?

Fán nemenien ena Sou Nemenem mi manaman me kirekiréch, án Kot we Mwú epwe amóeló pworoingaw seni ei fénúfan. Ifa usun? Ren an epwe amóeló ekkewe úlúngát mettóch mi efisatá pworoingawen nemenem.

Etipetipaen tipis

Ren mwo iei, kich meinisin sia fiffiu ngeni manamanen tipis, ewe mi etipetipakich ach sipwe ekieki pwisin kich. (Rom 7:21-23) Iwe nge, mi chúen wor ekkewe aramas mi mochen féri minne mi pwúng. Ren án Jesus Kraist máló, Kot a awora alen an epwe musoló ar tipis. * (1 Johannes 1:7, 9) Ren chókkewe mi anganga ar lúkú minne Kot a awora, repwe tongeni kúna feiéch seni án Kot féfférún tong mi lapalap seni meinisin, usun met a mak lón Johannes 3:16: “Pun iei usun Kot a echeni chon fanüfan, pwe a fangela Nöün Aleman, pwe meinisin mi lükü i resap pöütmwälila, pwe repwe eäni manau esemüch.”

 Kot epwe féri och mettóch mi fókkun amwarar fán iten ekkewe aramas mi tuppwél. Lón ewe fénúfan sefé, i epwe unusen amóeló tipis, iwe ekis me ekis epwe aunuséchúreló me repwe kúna pwúng me ren. (Aisea 26:9; 2 Petrus 3:13) Etipetipaen tipis esap chúen efisi án aramas repwe pworoingaw. Fán nemenemen án Kot we Mwú, aramas mi tuppwél “repwe ngasala seni ar ngauala me tala.”—Rom 8:20-22.

Etipetipaen Ei Fénúfan mi Ngaw Sia Nónnóm Wóón

A áletipechou pwe chómmóng aramas ikenái ra eriáfféwú ekkewe ekkóch. Ra tunosolá ngeni ekkewe mi apwangapwang me mwelele me ra pwal etipetipa ekkewe ekkóch ar repwe áppirúúr. Nge iei met Paipel a éúréúra ngeniir: “Chon föföringau repwe likitala ar föför, nge chon pwüngingau kana repwe siwili ar ekiek.” Ika ra aiersefál, iwe ewe Paipel a pwonei pwe Kot epwe ‘müttir le amusala tipisiir.’​—Aisea 55:7.

Nge ika chókkana rese siwili féfférúr, iwe Kot epwele chék nireló. Ren án Kot we Mwú, án Paipel ei oesini epwe pwénúetá: “Kopwe anomu om apilükülük won ewe Samol mi Lapalap o aleasochisi an kewe allük. . . . Kopwe nenengeni, lupwen ekewe aramasangau repwe kasüla.” * (Kölfel 37:34) Lupwen ekkewe rese mochen siwili manawer resap chúen nóm, chón fel ngeni Kot mi tuppwél resap chúen riáfféú ren pworoingaw.

Etipetipaen Satan ewe Tefil

Ewe mi kon lululó an tipis seni meinisin, ina i Satan ewe Tefil. Nge sia kilisou pwe ekiseló chék Jiowa epwele kalapusei Satan seni an ekketipetipa aramas. Ló, ló, ló, Kot epwe wesewesen nieló i. Ena mi lululó kirikiringawan esap chúen tongeni etipetipa aramas ar repwe pworoingaw.

Pwúngún, ekkóch repwe ekieki pwe eú chék áneán ewe pwóróus pwe Kot epwe amóeló mettóch meinisin mi efisatá pworoingaw. Eli kopwe ekieki, ‘Kot mi tongeni féri ena mettóch? Ika ina, iwe pwata ese fen féri?’ Ekkena kapas eis ra men múrinné, me ewe Paipel a awora pélúwer mi fataffatéch. * Sia etiwok le pwisin etittina met ewe Paipel a asukula usun mwachkkan, lupwen mettóch meinisin mi pworoingaw repwe unusen wesiló tori feilfeiló chék.