Eú Kapas Eis ngeni Jesus

Chómmóng chón fel ngeni Kot mi letip wenechar ra meefi pwe mi lamot lamalam epwe angolong lón mwékútúkútún mwúún fénúfan are politics. Ra lúkú pwe lamalam a fókkun tongeni álillis le pwákini án aramas kewe osukosuk. Iwe nge, ekkóch chón lamalam ra meefi pwe lamalam me politics resap angangfengen. Met meefiom usun wisen lamalam lón politics? Itá ekkena ruu pekin mi watte ar manaman repwe angangfengen?

EÚ PUK a áweweei pwe Jesus Kraist a fen “achchúngú aramas lap seni meinisin lón uruwoon lamalam.” Iwe, anchangei pwe kich mi tongeni eisini ei kapas eis, Itá lamalam epwe angolong lón politics? Epwe ifa pélúwan me ren? Lupwen a nom wóón fénúfan, a pélúweni ena kapas eis ren an kapas me féffér. Áwewe chék, lón án Jesus (Jises) we Afalafal wóón ewe Chuuk, ewe mi iteféúló, a awora ekkewe kapasen emmwen mi álisi néún kewe chón káé ar repwe mirititi wiser lón sópwur kewe. Sipwe nengeni ekkóch lesen seni ena afalafal mi iteféúló.

Repwe Kkúú Manawen Aramas

Jesus a áweweei napanapen itá néún kewe chón káé ngeni fénúfan. A erá: “Ämi oua usun chök salt fän iten aramas meinisin. Nge are ewe salt a nepatapatala, esap wor och mine sipwe enekeniken ngeni. Esap chüen lomot ngeni och, sipwe chök pöütala nge aramas repwe puri. Ämi saramen fanüfan. . . . Iei usun ämi saram epwe tittin mwen ekewe aramas, pwe repwe küna ämi föför mürina o mwareiti Sememi lon läng.” (Mateus 5:13-16) Pwata Jesus a alélléi néún kewe chón káé ngeni salt me saram?

Jesus a erá pwe néún kewe chón káé ra usun chék salt fán iten aramas meinisin, nge esap ren chék ekkóch aramas. Ra usun saram mi asarama meinisin mi mochen kúna saram rer, nge esap chék ekkóch. Ren an néúnéú ekkena kapas áwewe, Jesus a affata pwe ese mochen néún kewe chón káé repwe áimuroló seni aramas. Met popun?

Nengeni pwe mi lamot salt epwe nofit ngeni ewe mwéngé pwe esap mach. Ewe lamp epwe nom lón ewe ruumw mi kiroch pwe epwe saram. Ina minne, sise máirú pwe Jesus ese allúkú ngeni néún chón káé pwe repwe áimuroló lón ewe leeni mi towau seni aramas pwe repwe fératá pwisin leenien ekkewe chón lúkú. Jesus ese pwal peseer ar repwe áimuroló seni aramas ar repwe ttittiló ren ar nonnom chék lón leenien chón ena lamalam. Nge, usun a lamot salt an epwe nofit ngeni mwéngé, me lamp epwe nom lón eú ruumw mi kiroch pwe epwe asarama, a lamot Chón Kraist repwe nom lein aramas pwe repwe tongeni álisiir.

“Resap Peekini Fönüfan”

Iwe nge, án Jesus éúréúr ngeni néún kewe chón káé ar resap áimuroló seni aramas a epiietá eú kapas eis mi lamot mi weneiti ekiekin Chón Kraist usun politics. Pwata? Ekiseló me mwen án Jesus máló, a iótek ngeni Kot fán iten néún kewe chón káé: “Ngang üsap iótek óm kopwe angeirewu seni fönüfan, nge óm kopwe tumwünur seni ewe emön mi ngaw. Iir resap peekini fönüfan usun chök Ngang üsap pwal peekini fönüfan.” (Johannes 17:15, 16, Paipel: Än Kot Kapas Testament Söfö) Iwe, ifa usun epwe tufich ngeni Chón Kraist ar resap pekini fénúfan, nge repwe pwal nonnom lein chón sópwur kewe pwe repwe álisiir? Sipwe nengeni pwal ruu kapas eis pwe sipwe silei pélúwan:

• Ifa ekiekin Jesus usun politics?

• Itá met ekkewe Chón Kraist repwe féri lón ei fansoun?