Ifa Usun Ewe Möön Kepich A Amanauakich
Ifa Usun Ewe Möön Kepich A Amanauakich
“Iö a lükü ewe Nau a eäni manau esemüch. Iö a lükümach ngeni ewe Nau esap eäni ewe manau, pwe än Kot song a nonom won.”—JON 3:36.
1, 2. Ifa eü popun a poputä peresin Zion’s Watch Tower?
‘IKA emön a älleanifichi ewe Paipel, epwe wesewesen küna lamoten än Kraist mälo.’ Ena pworaus a mak lon arüänüün kapiin ei puk, minen October 1879. A pwal apasa: “Sipwe tümünükich seni mettoch meinisin mi ekisaalo ach aücheani än Jises we mälo mi atufichi musoloon tipisich me ach chäsefäl ngeni Kot.”—Älleani 1 Jon 2:1, 2.
2 Iei eü popun an a peres Zion’s Watch Tower lon July 1879 pwe epwe apöchökkülatä äitien Paipel usun ewe möön kepich. A awora “mongö lon fansoun fich,” pun lon ena fansoun, chommong aramas mi erä pwe iir Chon Kraist ra poputä le tipemwaramwareiti pwe än Jises mälo a tongeni awora ewe möön kepich fän iten tipisich. (Mt. 24:45) Lon ena fansoun, chommong ra tipetipelo ren ewe ekiekin evolution mi ü ngeni ewe pworaus pwe aramas ra towauolo seni manau mi unusöch. Chokkewe mi lükü evolution ra apasa pwe aramas ra pükün mümmürinnölo, ina popun, esor lamoten ngeniir eü möön kepich. Ina popun, än ewe aposel Paul kapasen fön ngeni Timoti a fokkun fich, a erä: “Kopwe tümwünü met Kot a lükü ngonuk. Kosap aüseling ngeni kapas mi ngau me ekewe kapasen anini mi lomotongau, ekoch aramas ra aita ngeni ‘silelap,’ nge a mwäl rer. Pun ekoch ra apasa pwe ra eäni ei silelap, iei mine ra tokola seni ar lükülük.”—1 Tim. 6:20, 21.
3. Ikkefa ekkoch kapas eis sipwele pworaus usun?
3 Esor tipemwaramwar pwe kese mochen ‘tokolo seni om lükülük.’ Ren om kopwe apöchökkülatä om lükü, epwe öch kopwe ekilapei ekkeei kapas eis: Pwata a lamot ngeniei ewe möön kepich? Met Jiowa me Jises ra pennüküolo fän iten ar repwe awora ewe möön kepich? Ifa usun upwe küna feiöch seni ena liffang mi tongeni angasaei seni än Kot song?
Ngase seni än Kot Song
4, 5. Met a änneta pwe än Kot song a nom woon ei otot mi ngaw?
4 Ewe Paipel me uruwoon aramas ra pwäri pwe seni atun än Atam tipis, än Kot song a “nonom won” aramas. (Jon 3:36) A letelo ren än aramas meinisin mämmälo. Än Setan nemenem ese tongeni tümünü aramas seni feiengaw, me ekkewe mwuun fönüfan rese tongeni ataweei än aramas kewe osupwang. (1 Jon 5:19) Ina minne, aramas ra chök kükküna riäfföün maun, atai allük, me wöüngaw.
5 A ffat pwe Jiowa ese efeiöchü ei otot mi ngaw. Paul a apasa pwe “Än Kot song a pwä seni läng won tipis meinisin.” (Rom 1:18-20) Ina minne, chokkewe rese aier seni ar manaueni ewe sokkun manau mi eletipengawa Kot repwe küna chappen ar föfför. Ikenäi, än Kot song a ffatolo lon ekkewe pworausen kapwüng mi usun chök minen eriäfföü ra ninitiw woon än Setan otot, iwe, ra mak lon chommong nöüch kewe puken äweween Paipel.—Pwar. 16:1.
6, 7. Ifa ewe angang Chon Kraist mi kepit ra emmweni, iwe, met aramas mi nom lon än Setan otot ra chüen tufichin föri?
6 Itä a kon mmang ngeni aramas ar repwe ngase seni än Setan nemenem me küna än Kot chen? Aapw, pun mi chüen suukchöchölo asamen ar repwe chäsefäl ngeni Jiowa. Chon Kraist mi kepit, iir “chon arong fän iten Kraist,” ra emmweni ewe angangen afalafal, iwe, ra pesei aramas seni mwu meinisin: “Oupwe chäfengen me Kot.”—2 Kor. 5:20, 21.
7 Ewe aposel Paul a apasa pwe Jises a “angasakich seni än Kot song epwe feito.” (1 Tes. 1:10) Chokkewe rese aier repwe unusen rosolo atun amuchüloon pwäloon än Kot song. (2 Tes. 1:6-9) Iö epwe ngase seni? Ewe Paipel a apasa: “Iö a lükü ewe Nau a eäni manau esemüch. Iö a lükümach ngeni ewe Nau esap eäni ewe manau, pwe än Kot song a nonom won.” (Jon 3:36) Ewer, atun epwe sopwolo ei otot, meinisin mi manau me anganga ar lükü Jises me an we möön kepich resap ninniilo lon säingonoon än Kot ränin song.
Met A Pwönütä ren ewe Möön Kepich
8. (a) Ifa ewe äpilükülüköch a nom mwen Atam me If? (b) Ifa usun Jiowa a änneta pwe i ewe Kot mi unusen pwüng?
8 Atun Atam me If ra fförütä, ra unusöch. Ika ra äkkälleasochisi Kot, iei nge iir mi chüen nom lon Paratis woon fönüfan mi ur ren mwirimwiriir kewe mi pwapwa. Iwe nge, solapan pun popuch kewe ra älleasolapa än Kot allük. Mwiriloon, ra küna kapwüngür ar repwe mälofochofoch, iwe, ra katowu seni ewe popun Paratis. Atun ra nöünöü, tipis a fen kküü aramas, iwe, ewe äemönün mwän me fefin ra chichchinnapolo me mälo. A änneta pwe än Jiowa kapas mi enlet. Pwal eü, I emön Kot mi unusen pwüng. Jiowa a fen öüröüra Atam pwe ika epwe ocheei ewe irä, mwiriloon epwe mälo, iwe, a mälo.
9, 10. (a) Pwata mwirimwirin Atam kewe ra mämmälo? (b) Ifa usun sipwe ngase seni mälofochofoch?
9 Pokiten sia upwu seni Atam, sise unusöch, me sia älemwiri tipis me mälo seni. Iwe, ika Jiowa a chök amoielo än aramas chichchinnapelo me mämmälo, me ese mönatiw ewe möön kepich, iwe, ese pwönütä alon. Ina minne, alon Paul ei a pwal kküükich meinisin, a erä, “Ngang sokun fituk, pwe üa nom fän nemenien tipis. Ngang eman aramas mi attong o weiresikis! Iö epwe angasaei seni ei inis inisin mäla?”—Rom 7:14, 24.
10 Jiowa chök a tongeni awora tufichin musoloon tipisich mi fiti pwüngün allük me angasakichelo seni mälo. A föri ei ren an tinato nöün we mi ächengicheng pwe epwe uputiw usun emön aramas, me fangolo manauan we mi unusöch pwe eü möön kepich fän itach. Jises a sokko seni Atam pun a akkamwöchü unusöchün. Pwüngün, ese “föri och tipis.” (1 Pit. 2:22) Jises a tongeni semelapeni eü mwichen aramas mi unusöch. Iwe nge, Jises a mut ngeni chon oput Kot pwe repwe nielo i pwe epwe tufichin mwuti mwirimwirin Atam kewe mi tipis me atufichi chokkewe mi anganga ar lükü i ar repwe küna manau esemuch. Ewe Paipel a äweweei: “Mi wor eman chök Kot, pwal eman chök chon afför lefilen Kot me aramas kana, iei i ewe aramas Kraist Jesus, i ewe mi fangala püsin manauan, pwe epwe angasala aramas meinisin seni tipis.”—1 Tim. 2:5, 6.
11. (a) Ifa usun sia tongeni äweweei feiöchün ewe möön kepich? (b) Iö kewe ra feiöch seni ewe möön kepich?
11 Sia tongeni weweiti met ewe möön kepich a apwönüetä ren ei kapas äwewe. Sipwe erä pwe minne kä ar ewe bank ra nöünimwäälli nöün aramas moni, iwe, ekkena aramas ra osupwang. A pwüngü ngeni chon ena bank ar repwe kalapus. Nge met ekkewe aramas repwele föri? Esor, ra osupwang, chilon chök ika emön mwän mi kirekiröch me wöüöch epwe wisen eäni ewe bank me eliwini ngeniir nöür moni pwe resap chüen osupwang. Iwe, pwal ina chök usun, Jiowa Kot me Nöün we mi ächengicheng ra mööni mwirimwirin Atam kewe me omusalo tipisiir ren chchaan Jises. Esap pwata iwe Jon Papatais a tongeni apasa usun Jises: “Iei i ewe Lamen Kot a uweela tipisin chon fanüfan.” (Jon 1:29) Ese chök uwealo tipisin aramas mi manau nge pwal tipisin ekkewe mi mälo.
Ifa Ükükün Weiresin Kaworen ewe Möön Kepich
12, 13. Met sia käeö seni tipemecheresin Eperiam le eäni asor Aisek?
12 Sise tongeni weweiti ükükün watteen weiresin än Semach we lon läng me Nöün we awora ewe möön kepich. Nge ekkoch pworaus lon Paipel ra älisikich le ekilonei ena mettoch. Äwewe chök, ekieki usun meefien Eperiam atun a fetäl ülüngät rän ngeni Moria pwe epwe apwönüetä än Kot ei allük: “Kopwe angei Isaak noum aleman, ka echeni, o feila won ewe fanü Moria. Ikenan kopwe eäni asoren kek ngeniei won eu chuk üpwe aiti ngonuk.”—Ken. 22:2-4.
13 Lupwen Eperiam a tori ewe leeni, iwe, ekieki weiresin letipan atun a föti pöün me pechen Aisek me akona woon ewe rongen asor a pwisin senatä. A ifa me watteen riäfföün Eperiam atun a pwomweetä nöün we ssaar pwe epwe nielo nöün we! Ekieki mwo meefien Aisek atun a konolo woon ewe rongen asor me öüchchüngü metekin än Eperiam epwele pwosu pwe epwe mälo. Nöün Jiowa we chonläng a akaüloi Eperiam pwe esap pwosu. Minne Eperiam me Aisek ra föri lon ena atun a älisikich le weweiti ükükün weiresin Jiowa atun a mutatä nöün Setan kewe aramas ar repwe nielo Nöün we. Än Aisek tipemecheres ngeni Eperiam a liosuetä tipemecheresin Jises le riäfföü me mälo fän itach.—Ipru 11:17-19.
14. Menni pworaus lon manauen Jekop a älisikich le weweiti ükükün watteen weiresin kaworen ewe möön kepich?
14 Sia pwal tongeni äweweei ewe möön kepich ngeni minne a fis lon manauen Jekop. Jekop a kon tongei Josef me lein nöün kewe meinisin. Nge solapan pwe pwiin Josef kewe ra kan lolowoiti me oputa i. Nge Josef a tipemecheres atun seman we a tinalo an epwe ppii pwiin kewe ika met pworauser. Lon ena atun, ra mammasa nöün Jekop kewe siip 60 mwail ennefenin imwer we lon Hebron. Ekieki meefien Jekop atun nöün kewe ra liwiniti fän üfen Josef we mi kuulo ren chcha! A püchörütä: “Ei üf wesewesen üfen nei we, eman manmwacho a ochei. Ellet, inisin Josef a tatakis.” Jekop a fokkun letipeta me kechiweiti Josef langattam fansoun. (Ken. 37:33, 34) Föfförün Jiowa fän weires ese usun föfförün aramas rese unusöch. Iwe nge, ach ekieki pworausen Jekop a ekis älisikich le weweiti meefien Kot usun Nöün we a mmen echeni atun a küna kawet me mälo mi ekkeriäfföü.
Ifa Usun Sia Feiöch ren ewe Möön Kepich
15, 16. (a) Ifa usun Jiowa a pwäri an etiwa ewe möön kepich? (b) Ifa usun ka feiöch seni ewe möön kepich?
15 Jiowa Kot a amanauatä nöün we mi tuppwöl lon eü inis sokkun ngün mi lingöch. (1 Kor. 15:20, 44) Mwirin an manauetä, a pwä ngeni nöün kewe chon käeö ükükün 40 rän, iwe, a apöchökkülatä ar lükü me ammolneeretä ngeni ewe angangen afalafal mi lap. Mwirin, a feitä läng. Iwe, me ikena ie a mwei ngeni Kot aüchean chchaan we mi ninilo fän iten nöün kewe chon äppirü mi tuppwöl mi anganga ar lükü aüchean an we möön kepich. Jiowa Kot a pwäri an etiwa än Kraist we möön kepich ren an awisa ngeni Jises an epwe ninatiw än Kot manaman woon nöün kewe chon käeö mi mwichfengen lon Jerusalem lon ewe ränin Pentikos 33 C.E.—Fof. 2:33.
16 Ekkena Chon Kraist mi kepit ra mwittir poputä le pesei aramas le sü seni än Jiowa song ren ar repwe papatais fän iten Jises Kraist ren omusomusen ar kewe tipis. (Älleani Fofor 2:38-40.) Seni ena fansoun tori iei, fite million aramas seni mwu meinisin ra eäni eü riri ngeni Kot mi alongolong woon ar lükü än Jises we möön kepich. (Jon 6:44) Iei, a lamot sipwe ekieki ekkeei ruu kapas eis: Äeüin, itä a wor emön leich a eäni ewe äpilükülükün manau esemuch pokiten pwisin an kewe föfför mürinnö? Oruuan, epwe tongeni pöüt senikich ena äpilükülüköch?
17. Met meefiom usun feiöchün ach wiliti chiechien Kot?
17 Ürürün ese fich ngeni aramas feiöchün ewe möön kepich pwe ina eü liffang, nge sap liwinin ach föfföröch. Nge, ren än aramas anganga ar lükü ena möön kepich, fite million ra fen chiechi ngeni Kot me äpilükülükü manau esemuch lon paratis woon fönüfan. Iwe nge, mwirin ach wiliti chiechien Jiowa, esap itä weween pwe sipwe chök akkamwöchü ach riri ngeni. Ren ach sipwe küna tümün lon än Jiowa we ränin song, sipwe pwäppwäratä ach kilisou ren ewe möön kepich än ‘Kraist, ewe mi angasakichelo.’—Rom 3:24; älleani Filipai 2:12.
Akkanganga Om Lükü ewe Möön Kepich
18. Met a kapachelong lon ach lükü ewe möön kepich?
18 Ei lesen a longolong woon Jon 3:36, iwe, a pwäri pwe ach älleasochisi Jises Kraist a kapachelong lon ach anganga ach lükü i. Ach kilisou ren ewe möön kepich epwe amwökütükich le etipeeüfengeni manauach ngeni äitien Jises kewe, kapachelong äitian usun met mi pwüng me mwääl. (Mark 7:21-23) “Liwinin ingau me ren Kot epwe feito” woon meinisin chokkewe rese aier seni föfförün lisowu, kapasen urumwot mi limengaw, me “sokkun limengau meinisin,” kapachelong kakkatol sasingin kapasingaw.—Ef. 5:3-6, TF.
19. Ifa usun sipwe tongeni pwäratä ach lükü ewe möön kepich?
19 Ach kilisou ren ewe möön kepich epwe älisikich le föfföri ekkewe angang “mi fich ngeni Kot” iteitan. (2 Pit. 3:11, TF) Sipwe awora fansoun le ikkiotek, pwisin käeö Paipel, fiffiti mwich, famili fel, me tinikken le afalafala ewe Mwu. Iwe, amwo ‘sisap manlükala ach sipwe föri föför mi öch o alilisfengen lefilach, pun ena sokun asor Kot a pwapwa ren.”—Ipru 13:15, 16.
20. Ifa ewe feiöch chokkewe mi kan akkanganga ar lükü ewe möön kepich repwe küna lon mwachkkan?
20 Atun än Jiowa song epwe tori ei otot mi ngaw, epwe ifa me pwapwaach pwe sia fen anganga ach lükü ewe möön kepich me pwäratä kilisou ren! Lon än Kot we otot sefö, sipwe kilisou fochofoch ren ena liffang mi amwarar mi angasakich seni än Kot song.—Älleani Jon 3:16; Pwar. 7:9, 10, 13, 14.
Ifa Pölüwen Ekkeei Kapas Eis?
• Pwata a lamot ngenikich ewe möön kepich?
• Ifa ükükün weiresin kaworen ewe möön kepich?
• Ikkefa ekkewe feiöch ewe möön kepich epwe atoto?
• Ifa usun sia akkanganga ach lükü än Jises asorun möön kepich?
[Ekkewe Kapas Eis Fan Iten Ewe Lesen]
[Sasing lon pekin taropwe 15]
A suukchöchölo ewe asamen chäsefäl ngeni Jiowa
[Ekkewe sasing lón pekin taropwe 16]
Ach ekilonei pworausen Eperiam, Aisek, me Jekop a älisikich le weweiti ükükün weiresin kaworen ewe möön kepich