Jesus a asukula aramas ar repwe kinamwefengen. Nge lón eú atun iei met a ereni néún kewe aposel: “Ousap ekieki pwe üa feito pwe üpwe uwato kinamwe won fanüfan. Apwi, üsap feito pwe üpwe uwato kinamwe, pwe ketilas. Pun ngang üa feito ai üpwe atipefeseni aramas: Ekewe alüal repwe ü ngeni semer kewe, ekewe föpwül repwe ü ngeni iner kewe, pwülüen nöür alüal repwe ü ngeni inen pwülüer kewe.” (Mat. 10:34, 35) Met weween alon Jesus na?

Jesus ese mochen án chón eú famili repwe tipefesen, nge a silei pwe met a eáni asukul a tongeni efisi tipefesen lón ekkóch famili. Ina minne, chókkewe mi mochen wiliti néún Kraist chón káé me papatais a lamot repwe weweiti pwe fán ekkóch chón ar kewe famili resap pwapwa ren minne ra filatá. Fán ekkóch, pwúlúwer me chón ar famili repwe ú ngeniir me áweiresiir ar repwe tuppwél le apwénúetá áitien Kraist kewe.

Ewe Paipel a pesei Chón Kraist ar repwe “kinamwefengen me aramas meinisin.” (Rom 12:18) Nge án Jesus asukul a tongeni usun “ketilas” lón ekkóch famili. A fis ei atun emén chón eú famili a etiwa áitien Jesus kewe, nge ekkóch rese sani are ra ú ngeni. Ika a fis ena, chón ewe famili ra wiliti ‘chón oputa’ ewe emén mi kákkáé ewe enlet.​—Mat. 10:36.

Néún Jesus kewe chón káé mi nóm ren aramaser kewe esap iir chón lúkú, fán ekkóch repwe kúna sóssót ika ié repwe akkomw apwapwaai, Jiowa me Jesus are aramaser kewe. Áwewe chék, aramaser kewe esap iir chón lúkú repwe tongeni peseer pwe repwe fiti eú apwapwaan ráninipin. Ika ra kúna ei esin sóssót itá ié repwe akkomw apwapwaai? Iei met Jesus a apasa: “Iö a tongei saman are inan lap seniei, esap fich ngeni an epwe nei chon kaiö.” (Mat. 10:37) Alon Jesus ei esap weween pwe chókkewe mi mochen wiliti chón káé repwe ekisikisaaló ar tongei semer kewe me iner. Nge a áiti ngeniir ar repwe mirititi minne mi kon lamot lón manawer. Ika chón ach famili esap iir chón lúkú ra ú ngeni ach achocho le fel ngeni Jiowa, sia sópweló le tongeer nge sia mirititi pwe ach tongei Kot ina ewe mi kon lamot lap seni meinisin.

Án chón ach famili ú ngenikich a eletipechoukich. Nge néún Jesus kewe chón káé repwe chechchemeni alon ei: “Ié ese mochen mwárei an iráán ninni me tapwoto mwiri, ese fich ngeniei.” (Mat. 10:38, NW) Weween, Chón Kraist repwe ekieki pwe án ar famili ú ngeni ar lúkú ina eú me lein ekkewe mettóch mi lamot repwe likiitú fan. Nge ra pwal áneán pwe ar féffér múrinné epwe amwékútú chón ar famili ar repwe siwili ar ekiek me mochen aúseling ngeni met Paipel a apasa.​—1 Pet. 3:1, 2.