PWÓRÓUS LÚKÚNPÉÉN | PWATA JESUS A RIÁFFÉÚ ME MÁLÓ?
A Wesewesen Fis Ena Mettóch?
Fán March are April lón ewe ier 33, Jesus ewe re Nasaret a ninniiló. Ra tipimwáál ngeni pwe i chón ú ngeni ewe mwú, kúna kawetengaw, me chúfélútá wóón ewe iráán ninni. A máló lón metek mi lululó. Nge Kot a amanawasefáli, nge mwirin 40 rán Jesus a feitá láng.
Sia silei ei pwóróus mi luló sókkólóón seni ekkewe Puken Kapas Allim lón néún Chón Kraist we Tesin Krik, itan mi terú, Tes mi Fé. A wesewesen fis ekkena mettóch? A fókkun lamot ei kapas eis. Pún ika ese fis, iwe án Chón Kraist lúkú a lamotongaw me eú chék ttan ewe ápilúkúlúkún manawfóchofóch lón Paratis. (1 Korint 15:14) Nge ika a wesewesen fis ekkena mettóch, iwe a wor án aramas ápilúkúlúkéch, ewe sia tongeni eáni. Iwe met, ewe pwóróus lón Puken Kapas Allim mi pwúng are mwaken chék?
MINNE EKKEEI PWÓRÓUS RA PWÁRAATÁ
Ewe Puken Kapas Allim ese fókkun wor ekis mwáállin me a tichik, esap usun ekkewe tutulap. Áwewe chék, a ur ren iten ekkewe leeni nge chómmóng me leir sia tongeni ló ngeniir ikenái. A pwal erenikich usun aramas mi wesewesen manaw, ekkewe sou uruwo ra pwal tipeeú pwe ekkena aramas iir mi manaw me lóóm.—Lukas 3:1, 2, 23.
Ekkewe ekkóch soumak lón fansoun ekkewe aposel me mwirin málóón ekkewe aposel ra pwal fós usun Jesus. * Napanapen an máló mi mak lón ewe Puken Kapas Allim a tipeeú ngeni napanapen án chón Rom kapwúngún ninniilóón aramas. Pwal och, Puken Kapas Allim a apwóróusa minne a fis lón napanap mi enlet me wenechar pwal mwo nge apasa mwáállin ekkóch néún Jesus kewe chón káé. (Mateus 26:56; Lukas 22:24-26; Johannes 18:10, 11) Ekkeei mettóch meinisin ra wesewesen pwáraatá pwe ekkewe soumakken ewe Puken Kapas Allim ra wenechar me minne ra makkeei usun Jesus a pwúng.
NGE IFA USUN ÁN JESUS WE MANAWSEFÁL?
Inaamwo ika chómmóng ra lúkú pwe Jesus a manaw me a máló nge ekkóch ra lúkúlúkúmmang usun an we manawsefál. Pwal mwo nge néún kewe aposel rese lúkú lón ewe áeúin atun ra rongorong pwe a manawsefál. (Lukas 24:11) Iwe nge, a móróló ar tipemwaramwar meinisin atun iir me ekkewe ekkóch chón káé ra kúna ewe mi manawsefál Jesus nge lón fansoun mi sókkofesen. Ren enletin, a wor eú atun pwe lap seni 500 aramas ra neféúféú ngeni.—1 Korint 15:6.
Inaamwo ika ekkewe chón káé repwe ares me ninniiló, nge fán pwora ra esilefeili án Jesus manawsefál ngeni meinisin pwal mwo nge ngeni chókkewe mi nieló. (Föför 4:1-3, 10, 19, 20; 5:27-32) Repwe pwora ika rese fókkun lúkú pwe Jesus a wesewesen manawsefál? Pwúngún án Jesus manawsefál ina met a ngeni ewe lamalamen Chón Kraist péchékkúl wóón ei fénúfan lóóm me ikenái.
Ewe pwóróus usun án Jesus máló me manawsefál lón ewe Puken Kapas Allim a nóm ekkewe esissil meinisin pwe ra wesewesen fis. Óm álleanifichi ewe pwóróus epwe alúkúlúkuk pwe ekkena mettóch ra wesewesen fis. Óm lúkúlúk epwe pwal péchékkúleló atun ka weweiti pwata ekkena mettóch ra fis. Ewe lesen mwirin ei epwe áweweei.
^ Tacitus ewe mi uputiw ina epwe mwan are mwirin ewe ier 55, a makkeei pwe “Kraist, ia [Chón Kraist] ra angei iter me ie, a kúna riáfféú mi lululó seni emén me lein néúm kewe meilap itan Pontius Pilatus atun án Tiperius nemenem.” Suetonius (fansoun aposel); sou uruwoon chón Jus itan Josephus (fansoun aposel); me Pliny the Younger, kepinaan Pitinia (mwirin chék málóón aposel), iir ra pwal fósun Jesus.
