1-3. (a) Ifa usun Chón Kraist ra pwári pwe ra mwasangasang le mwichfengen? (Ppii ewe sasing lepoputáán ei lesen.) (b) Met sipwele káé usun lón ei lesen?

 LUPWEN Corinna a 17 ierin, inan we a ares me ra uwealó ngeni eú leenien angataan chón kalapus. Mwirin, Corinna a pwal titiiló ngeni Siberia, eú leeni mi fókkun tottowau seni leenian. Me ikena ie a angang lón eú leenien fol man usun emén slave. Fán ekkóch ra eriáni an epwe angang lúkún nge úfan kewe rese naf ngeni patekkichin ena leeni. Inaamwo ika a ina usun, nge Corinna me pwal emén Chón Kraist fépwúl ra filatá le féri úkúkún ar tufich pwe repwe tongeni ló seni ena leenien fol man me fiti eú mwich.

² Corinna a apasa: “Aua ló seni ám we leenien angang lepwin me fetál ngeni ewe leenien sousou train úkúkún towauan 15 mwail. Ewe train a kan su kulók ruu wilingách, me úkúkún ám fiti wonu awa. Mwirin aua pwal fetál úkúkún wonu mwail ngeni ewe leeni ia epwe fis ie ewe mwich.” Corinna a fókkun pwapwa ren an féri ena. A apasa: “Lón ewe mwich aua káé Ewe Leenien Mas me eáni ach kewe kél. A fókkun apéchékkúla letipem me ám lúkú.” Úlúngát rán mwirin, ekkena rúúemén Chón Kraist fépwúl ra liwiniti ewe leenien fol man, nge néúr we meilap ese mwo nge silei pwe ra ló ekis.

 ³ Seni me lóóm néún Jiowa aramas ra kan mwétéresiti ar repwe nónnómfengen. Áwewe chék, ekkewe popun Chón Kraist ra kan mwétéresiti ar repwe mwichfengen fán iten ar repwe fel ngeni Jiowa me káé usun i. (Föf. 2:42) Ese mwáál, a pwal ina usun meefiom ren ach kewe mwich. Nge neman ka pwal meefi weiresin óm kopwe fiti ach kewe mwich iteitan usun chék pwiium kewe Chón Kraist. Eli a lamot kopwe angang fite fite awa fán iten tufichum, are a chómmóng met ka féfféri, are ka kan soun mélúlú. Iwe, met epwe amwékútúkich pwe sipwe achocho le fiti ach kewe mwich? ^[1] Ifa usun sia tongeni apéchékkúla ngeni néúch kewe chón káé me pwal ekkewe ekkóch lamoten ar repwe fiti ach kewe mwich iteitan? Ei lesen epwe áweweei pwata ach fiffiti ach kewe mwich (1) a échitikich, (2) a álilliséch ngeni ekkewe ekkóch, me (3) a apwapwaai Jiowa. ^[2]

4. Ifa usun ach mwichfengen a álisikich le káé usun Jiowa?

⁴ Ekkewe mwich ra asukulakich. Ekkewe mwich meinisin ra álisikich le káé usun Jiowa. Met ka meefi atun sia pwóróusfengen usun napanapen Jiowa kewe me atun ka rongorong meefien pwiich kewe usun Jiowa? Ese mwáál, a alapaaló óm tongei Jiowa. Lón ach kewe mwich, a pwal lapóló ach silei Paipel ren ach nefotofot wóón ekkewe afalafal, katol ekkewe pwoomw me aúselingéch atun álleaan Paipel. (Ne. 8:8) Pwal ekieki ekkewe chómmóngun pwóróus mi aúchea sia káé seni ewe álleaan Paipel iteiten wiik lupwen sia ammólnatá, mwirin rongorong ngeni meefien ekkewe ekkóch ren met ra káé seni.

5. Ifa usun ekkewe mwich ra álisuk óm kopwe apwénúetá minne ka káé lón Paipel me lipwákéchúló lón óm angangen afalafal?

⁵ Ekkewe mwich ra áitingenikich ifa usun sipwe apwénúetá lón manawach met sia káé seni ewe Paipel, áwewe chék ren ewe káéén Leenien Mas. (1 Tes. 4:9, 10) Áwewe chék, ka fen fiti eú káéén Leenien Mas mi efisi óm mochen alapaaló óm angang ngeni Jiowa, ámúrinnééló óm iótek, are omusaaló tipisin emén pwiium Chón Kraist? Ewe Manawach Chón Kraist me Ach Angangen Afalafal Mwich a tongeni áiti ngenikich ifa usun sipwe afalafala ewe kapas allim me ifa usun sipwe álisi ekkewe ekkóch le weweiti ewe enlet lón Paipel.​—Mat. 28:19, 20.

6. Ifa usun ach kewe mwich ra apéchékkúlakich?

⁶ Ekkewe mwich ra apéchékkúlakich. Án Satan ei ótót a sótun apwangapwangaaló ach lúkú me a tongeni efisi ach sipwe aúrek me lichippúng. Nge ach kewe mwich ra apéchékkúlakich me álisikich pwe sipwe sópweló ach angang ngeni Jiowa. (Álleani Föför 15:30-32.) Fán chómmóng sia káé ifa usun ekkewe oesini lón Paipel ra pwénúetá. Ei mettóch a tongeni álisikich ach sipwe lúkúlúk pwe án Jiowa kewe pwon fán iten mwachkkan repwe wesen pwénúetá. Sise chék péchékkúletá ren án pwiich kewe eáni afalafal lón mwich, nge pwal ren ar uwawu meefier me mwareiti Jiowa lón kél seni letiper. (1 Kor. 14:26) Pwal eú, atun sia fós ngeniir mwen me mwirin ach kewe mwich, sia meefi ach kinamwe pokiten a wor chómmóng chiechiach mi enletin tongekich.​—1 Kor. 16:17, 18.

7. Pwata a fókkun lamot sipwe fiti ach kewe mwich?

⁷ Atun ekkewe mwich, sia angei álillis seni án Kot we manaman mi fel. Jesus a áeá ewe manaman mi fel le emmweni ekkewe mwichefel. Jesus a erenikich pwe a lamot sipwe “rongorong mine Ngünmifel a üreni ekewe mwichefel.” (Pwär. 2:7) Ewe manaman mi fel a tongeni álisikich ach sisap tupuló ren mochen mi ngaw me sipwe pwora le afalafal. A pwal tongeni álisikich le eáni kefil mi múrinné. Ina popun a lamot sipwe achocho  úkúkún ach tufich le fiti ach kewe mwich pwe sipwe angei álillis seni án Kot we manaman mi fel.

8. Ifa usun án pwiich kewe kúnakich lón ach kewe mwich, me rongorong meefiach me eáni kél a álisiir? (Pwal ppii ewe pwóór “A Meefi Péchékkúletá Iteiten A Fiti Mwich.”)

⁸ Atun ekkewe mwich, sia tongeni pwár ngeni pwiich kewe pwe sia tongeer. Chómmóng lón ach kewe mwichefel ra likiitú fán watteen riáfféú lón manawer. Ewe aposel Paulus a makkeei: “Sipwe ekieki fengeni kich.” (Ipru 10:24, 25, Kapasen God) Sia pwáraatá ach chúngú pwiich kewe ren ach mwichfengen pwe sipwe apéchékkúlafengenikich. Atun sia ló fiti ach kewe mwich, sia pwár ngeni pwiich kewe pwe sia mochen nónnóm rer, fóffós ngeniir, me silei pwóróuseer me nónnómur. Sia pwal apéchékkúler atun sia uwawu meefiach me kél seni letipach.​—Kol. 3:16.

9, 10. (a) Áweweei ifa usun alon Jesus lón Johannes 10:16 a álisikich le weweiti lamoten ach sipwe mwichfengen me pwiich kewe. (b) Ika sia fiti mwich iteitan, ifa usun sia tongeni álisi emén mi kúna koput me ren an famili?

⁹ Ach ló fiti ekkewe mwich a álisi ewe mwichefel an epwe pacheéchfengen. (Álleani Johannes 10:16.) Jesus a apépééi pwisin i ngeni emén chón masen siip, nge néún kewe chón áppirú ngeni eú mwichen siip. Ekieki mwo: Ika rúúemén siip ra nóm wóón eú chukuchukutá, nge pwal rúúemén lón eú lemool, nge emén a nóm pwal ekis, ekkena nimmén siip iir eú mwichen siip? Aapw, pún eú mwichen siip ra kan nómfengen me tapweló mwirin néúr we chón mas. A pwal ina usun rech, a lamot sisap imu seni pwiich kewe ren ach sise fiffiti ach kewe mwich. A lamot sipwe kochufengen me pwiich kewe pwe sipwe nóm lón “eu chök mwichen sip” me tapweló mwirin ewe chék “eman chon mas.”

¹⁰ Ach kewe mwich ra álisikich le tipeeúfengen usun eú famili mi tong. (Kölf. 133:1) A wor ekkóch lón ewe mwichefel chón ar famili ra likitiireló, áwewe chék ren pwisin semer, iner, pwiir, mongeer, are fefiner. Nge Jesus a pwon pwe epwe awora ngeniir ar famili mi tongeer me túmúnúúr. (Mark. 10:29, 30) Iwe, ika ka fiti ekkewe mwich iteitan, ka tongeni wiliti semer, iner, pwiir, mongeer, are fefiner! Ika sia ekieki usun ena, sipwe mochen achocho le fiti meinisin ach kewe mwich.

11. Ifa usun ach fiffiti ekkewe mwich a álisikich ach sipwe ngeni Jiowa minne a fichiiti?

¹¹ Atun ekkewe mwich, sia ngeni Jiowa minne a fichiiti. Pokiten i ewe Chón Férikich, a fich ngeni ach sipwe kilisou ngeni, asamolu, me mwareiti. (Álleani Pwärätä  7:12.) Sia tongeni féri ena lón ach kewe mwich atun sia iótek ngeni Jiowa, kél ngeni i, me fós usun i. A ifa me kilisouch pún sia tongeni fel ngeni Jiowa iteiten wiik!

12. Met meefien Jiowa lupwen sia álleasochisi an we allúk pwe sipwe fiffiti mwich?

¹² Jiowa a férikich, iwe a lamot sipwe álleasochisi. A allúk ngenikich ach sipwe mwimmwichfengen, ákkáeúin pokiten sia arap ngeni ewe sópwólóón. Iwe, lupwen sia álleasochisi ena allúk, Jiowa a pwapwa. (1 Joh. 3:22) A kúna pwe sia fókkun mochen fiti ach kewe mwich me a aúcheani unusen ach achocho pwe sipwe fiti ekkena mwich.​—Ipru 6:10.

13, 14. Pwata ach fiti ekkewe mwich a tongeni apéchékkúlaló ach riri ngeni Jiowa me Jesus?

¹³ Atun sia fiti ach kewe mwich, sia pwár ngeni Jiowa pwe sia mochen ach riri ngeni i me Néún we epwe péchékkúleló. Atun ach kewe mwich, Jiowa a asukulakich me ren an we Kapas usun met a lamot sipwe féri me ifa usun sipwe manaweni manawach. (Ais. 30:20, 21) Pwal mwo ekkóch me lein chókkewe rese angang ngeni Jiowa, lupwen ra fiti ach kewe mwich, ra esilla pwe Kot a ekkemmwenikich. (1 Kor. 14:23-25) Jiowa a ekkemmweni ach kewe mwich ren an we manaman mi fel, me minne sia káé a feito seni i. Iwe lupwen sia fiti mwich, sia aúseling ngeni met Jiowa a apasa, meefi ifa úkúkún an tongekich, me a péchékkúleló ach riri ngeni i.

¹⁴ Jesus, ewe Mékúren mwichefel, a apasa: “Pun ia ruoman ika ülüman ra chufengen ie fän itei, ngang üpwe nonom lefiler.” (Mat. 18:20) Ewe Paipel a pwal erá pwe Jesus a “fetal lein” ekkewe mwichefel. (Pwär. 1:20–2:1) A ffat pwe Jiowa me Jesus ra nónnóm rech me akkapéchékkúlakich atun ach kewe mwich. Met óm ekiek, epwe ifa meefien Jiowa atun a kúna pwe ka achocho úkúkún óm tufich pwe kopwe ririéch ngeni i me Néún we?

15. Ifa usun ach fiti ekkewe mwich a pwáraatá ngeni Kot pwe sia mochen álleasochisi i?

¹⁵ Atun sia fiti mwich, sia pwár ngeni Jiowa pwe sia mochen álleasochisi. Jiowa ese eriánikich ach sipwe álleasochisi. (Ais. 43:23) Iwe, lupwen sia filatá le álleasochisi an we allúk pwe sipwe fiti mwich, sia pwár ngeni pwe sia tongei me lúkú pwe a wor an pwúúng le erenikich met sipwe féri. (Rom 6:17) Áwewe chék, met sipwe féri ika néúch we boss a erenikich pwe sipwe angangoló iwe sise chúen tongeni fiti ach kewe mwich iteitan? Are neman ewe mwú a apasa pwe ika emén a fiti an mwich pwe epwe fel ngeni Jiowa, epwe pakking, kalapus, are fen angei liwinin mi kon ssenúk ngawan. Are neman fán ekkóch sia mochen féri och mettóch nge sisap fen fiti ach kewe mwich. Lón eú me eú ekkeei atun, a lamot sipwe pwisin filatá met sipwe féri. (Föf. 5:29) Nge iteiten ach filatá le álleasochisi Jiowa, sia apwapwaai letipan.​—SalF. 27:11.

16, 17. (a) Ifa usun sia silei pwe a fókkun lamot ngeni ekkewe Chón Kraist lóóm ar repwe mwichfengen? (b) Ifa meefien Pwiich George Gangas usun án Chón Kraist kewe mwich?

¹⁶ Mwirin ewe mwich lón ewe Pentikost ier 33, ekkewe Chón Kraist ra mwimmwichfengen iteitan pwe repwe fel ngeni Jiowa. “Ra likitü le kaiö seni mine ekewe soukünö ra aiti ngeniir, ra likitü lon ar chiechifengen.” (Föf. 2:42) Rese pwal mwo nge úkútiw le mwichfengen atun án ewe mwúún Rom me néúwisin ewe lamalamen Jus eriáfféwúmwáállir. Inaamwo ika ese mecheres, nge ra achocho úkúkún ar tongeni pwe repwe fiffiti ekkewe mwich.

¹⁷ Lón ei fansoun, néún Jiowa kewe chón angang ra pwal fókkun kilisou ren ekkewe mwich me pwapwaiti ar nónnóm ikena ie. George Gangas, ewe mi fiti ewe Mwichen  Soupwúngúpwúng úkúkún 22 ier, a erá: “Me rei, ai fiti pwii kewe le mwichfengen, iei eú me lein ekkewe mettóch lón manawei mi atoto ngeniei watteen pwapwa me péchékkúl. Ua fókkun sani ai upwe emén me lein chókkewe mi akkomw tori ewe Leenien Mwich me pwal emén me lein chókkewe mi mmang le ló seni, ika pwe mi tufich. Ua meefi pwapwa lón letipei lupwen ua fóffós ngeni néún Kot aramas. Lupwen ua nóm leir ua meefi kinamwe usun chék ai nóm leimw ren chón ai famili, ua meefi pwe ua nóm lón ewe paratis lón pekin lúkú.” A pwal erá: “Seni alóllóólun ekieki me mochenin letipei ua mochen fiti ekkewe mwich.”

18. Met meefiom ren ach kewe mwich, me met ka tipeppós le féfféri?

¹⁸ A pwal ina usun meefiom ren óm fel ngeni Jiowa? Ika ina, sópweló le chiechi ngeni pwiich kewe lón ach kewe mwich, pwal mwo nge lón fansoun mi áweires. Pwár ngeni Jiowa pwe ka enletin meefi meefien King Tafit, ewe a apasa: “Ai Samol mi Lapalap, üa echeni imwom ewe ia ka nonom ie.”​—Kölf. 26:8.