DON a ne Ngaa Yéhôva e Canada, a nga ve ngul ése na a laan a môt, môt ate a nji be a bili nda ya tabe, a mbe a nyiñi minjoñ minjoñ. Don a laane bia nlañe wé a jô’ô na: “Môt ate a mbe jôé na Pierre, a mbe avale mvite môt me ngenan teke tame yen. A mbe a bili mbia mefulu, teke kañese na môt a subu nye bebé, nge volô nye.” Ve a ôjibi ôse, Don a nga jeñ a ngul ése tañe mimbu 14 na a bo mvôé jé.

Môs éziñ, Pierre a nga sili Don na: “Amu jé wo ndeñele ma? Bôte bese ba sa’ale ma. Amu jé wo wo nyoñe me ngap?” Don a nga yeme belane bifuse bilal ya Kalate Zambe asu ya na a nambe Pierre nlem. A nga taté sili nye nge a simesane na, Zambe a bili éyôlé. Nde a nga sili nye nge a ne nye liti éyôlé éte e kalate Besam 83:18. Mvuse ya valé, nde a nga liti nye amu jé a nyoñe nye ngap, a nga jô nye na a lañe Beromain 10:13, 14 a jô na: “Nyô ase a loene jôé [Yéhôva] a ye nyiñ.” A nga su’ulane lañe nye Matthieu 9:36. Mvuse ya valé, nde Don a nga jô Pierre na, nye fe a lañ éfus éte. Ja jô na: “Ve éyoñ a nga yen étua jama bôt, [Yésus] a nga wô’ô be éngôngo, amu be nga wô’ô njuk, a bo ne mialamialan ane mintômba mi nji bo môt a ba’ale mie.” Éyoñe Pierre a maneya lañ, ane milik me nga taté na ma kui nye mis, nde a nga sili Don na: “Ye ma fe me ne ntômba wua ya été?”

Pierre a nga taté na a tyendé. A mane woban, a mane tyeñe zele jé, a jaé fe abeñe biyé Don a nga ve nye. Ataté éyoñ éte, Pierre a mbe a nto mfuban.

Pierre a mbe a bili ngum ntili a mbe a kañete ényiñe jé môs ôse. Mam m’ôsu a nga tili été me mbe ayôl, mam ma bo mintaé nlem; ve mvuse ya valé, mam a nga su’ulane tili a lat a Don, me mbe mbamba be mam. Jam da ya été e mbe na: “Ma te yé’é éyôlé Zambe den. Éyoñe ji, me ne ngule ya ye’elane Yéhôva. Angôndô ya mbamba jam na, môt a yeme jôé Zambe. Don a nga kate ma na, Yéhôva a ne bo Mvôé jam,  a ne vô’ôlô ma éyoñ ése, me ne fe kate nye jam ese ma kômbô.”

Mam Pierre a nga su’ulane tili me mbe asu nda bôte jé. A nga tili na:

“Me nji dañe wô’ôtane nyule jame den. Akon nnôm da te’e ma ane éyoñe ja lôt. Ja’a ma wu den, ma yeme na, ma ye beta yene mvôé jame [Don] Paradis. Nge mia lañe kalate nyina, nalé a tinane na, me nji beta bo. Ve nge mia yene môt mi nji yeme môs éjame mbime jam, ma ye’elane mia na mi ke yene nye, a sili nye mone kalate a ne nyule blum [a mbe a jô’ô kalate ba loone na, “La vérité qui conduit à la vie éternelle,” kalate be mbe be bo’o nye meyé’é, émien a nga lañe kalate ate]. * Laña’ané nye. Kalate ate a jô na môs éziñ, ma ye beta yene mvôé jame Paradis. Me too jam ete ndi a nleme wom ôse. Monyañe wônan a nye’e mia, Pierre.”

Mvus éjame mbim, Ummi, kale Pierre é nga jô na: “Den mimbu mimbaé, Pierre a nga loone ma. Me nga yene nye a to mevak, e zu koone me kandaneya yene nye nalé, den a nto abui mimbu. A nga kui kui na a woé.” Ummi a nga kate Don na: “Mé lañe lañe Kalate ate, amu jôm ja te kui na é tyendé ndôme jam ja yiane fo’o bo ngum avale jômô.” Ummi fe a nga kañese ayé’é a Ngaa Yéhôva, e kalate ba belane nye éyoñe ji, Jé Kalate Zambe a tu’a ye’ele?

Bia fe bi nji yiane fombô ve mam ma yené atan, bia yiane liti bôte bevo’o nye’an, bia yiane fe bo ôjibi a avale bôt ese. (1 Tim. 2:3, 4) Éyoñe bia bo nalé, bi ne dutu bôte be bili mbamba minlem, ja’a be nji bo abeñe ya yen a mis avale Pierre a nga be. Bi ne tabe ndi na Zambe, nyô a “fombô nlem,” a ye bo na benya mejôô be yaé minleme mi bôte be bili mbamba été nlem.—1 Sa. 16:7; Jn. 6:44.