Kele vôm ô ne lañe de

Kele sous-menu

Kele tep

Bengaa be Yéhôva

Bulu

Nkume mmombô a bete (Asu ayé’é)  |  Ngone samane 2017

Yéhôva a volô bia minlem nju’u wongan ôse

Yéhôva a volô bia minlem nju’u wongan ôse

“Zambe ya mvolane minlem ôse . . . a volô bia minlem nju’u wongan ôse été.”2 BEC. 1:3, 4.

BIA: 33, 41

1, 2. Aval avé Yéhôva a volô bia minju’u miangan été, ndi nleme fé bia koone je e Kalate Zambe?

MÔS éziñ Éduardo, ésoé mojañ é ne nkoé, é nga laan a Stephen, mvendé ya akônda é ne nya môtô, a nlu’an. A mbe a faseya kalate 1 Becorinthien 7:28 a jô na: ‘Bôte ba lu’an ba ye yen njuk mfa’a ya minsôn.’ A nga sili Stephen na: “Jé é ne ‘njuk’ ba kobô wô éfuse ji, a nge da kui na me luk, aval avé me ne dañe wô?” Ôsusua na Stephen a yalan Éduardo, a nga jô nye na, a tame fas jame nlômane Paul ô nga tili na, Yéhôva a ne “Zambe ya mvolane minlem ôse; nnye a volô bia minlem nju’u wongan ôse été.”2 Bec. 1:3, 4.

2 Yéhôva a ne Ésa a nye’e bia abui, a volô fe bia minlem éyoñe bi tele minju’u été. Éko éziñe na, womien ô yeneya avale Yéhôva a nga su’u wo, a wulu wo, a zene ya Mejô mé. Bi ne tabe ndi na, avale Yéhôva a mbe a yi mbamba be mam asu bebo bisaé bé ya melu mvus, aval ete fe a yi asu dangan.Lañe Jérémie 29:11, 12.

3. Ayé’é di, bia zu jeñe biyalane ya minsili mivé?

 3 E ne été na, bi ne dañe minjuk éyoñe bia yem amu jé minju’u mite mia kui bia. Nalé a fombô fe minju’u bi ne tôbane mie nda aluk, nge nda bôt. Nde ñhe, mam mevé me ne soo “njuk mfa’a ya minsôn” avale Paul a nga jô? Bive’ela bivé ya melu mvus, a melu ma, bi ne volô bia minlem avale da yian? Biyalane ya minsili mite, bi ne volô bia na bi dañe minjuk.

“NJUK MFA’A YA MINSÔN”

4, 5. Jé é ne soo “njuk mfa’a ya minsôn”?

4 Valé a ndôme té môta binam, Yéhôva a nga jô na: “Fam j’aye li’ ésa ba nyia, ba ngale b’ aye tabe nlatan: a b’ aye bo nsône wua.” (Met. 2:24) Yéhôva a nga jô mejô mete éyoñ a nga lat alu’u ôsu. Ve mbôle bia nyiñ abé été, ényiñe mimfefé beluk é ne bo ayaé. (Bero. 3:23) Bia yeme na, éyoñe fam ba minga ba lu’an, éjôé nnôm é wô’ô zu fol éjôé bebiaé. Yéhôva a ve nnôm ngule ya jôé minga wé. (1 Bec. 11:3) Jam ete e nji bo tyi’ibi asu mimfefé beluk. Ve avale Kalate Zambe a jô, minga a yiane yeme na, a nji beta bo éjôé bebiaé bé si, ve éjôé nnôme wé si. E yeme nyiñ a betyi, a ne fe telé mimfefé belu’u minju’u été.

5 Minju’u mife mi wô’ô kui éyoñe minga a kate nnôme na, “Me ntoo abum.” E ne été na, meva’a ya bi mon me ne, ve abui mam da tyelé belu’u minleme yôp nté ôse minga a ne abum, a éyoñ a biaéya. Ba yiane fe fas ajô moné asu ya na, be yale mone wop. Éyoñe mon a bialé, belu’u ba tyendé abui mam ényiñe jap. Mfefé nyia ô ne taté na wo lôt abui éyoñ a mon; nye’ane wé ôse ô ne mane ke ve be mon. Jam ete e wô’ô ndeñele abui beyôm, amu ngal a nga dañe nyoñe ngap a mon a lôte nnôm. Nde fe, éyoñe mon a bialé, mimbe’e mi nnôm mia kô’ôlan. Nalé a kui amu na, mon a bialé nyi a yiane na, be jalé miñyiane mié.

6-8. Aval avé ñyiane bon ô ne telé beluk minju’u été?

6 Beluk ba tôbane minju’u mevale meval. Belu’u béziñ ba kômbô bi bon, ve be nji bi fane ya bo de. Éyoñe minga a nji biaé, nlem ô ne tyebe nye yôp abui. E ne été na, aluk, nge bon, e nji bo susu’a jam a soo mevak ényiñ, ve nkômbane ya bi bon ô ne bo “njuk mfa’a ya minsôn.” (Min. 13:12) Melu mvus, be mbe be yene éto nkôkôm aval étam. Rachel, minga Jacob a mbe a wô’ô émien éngôngol, éyoñ a mbe a yen ane monyañe wé a bili bon. (Met. 30:1, 2) Bemissionnaire béziñe ba saé bevôme bôte be bili abui bon. Be wô’ô sili be amu jé be be nji bi bon. To’o éyoñe ba jeñ a mezene mese na, be ve éyalan ja balé ke môt, bôte be wô’ô jô ve na, “Asia, bia ye ye’elan asu denan wô’a!”

7 Tame yen éve’ane kale jangan ya si Engilis. A mbe a kômbô’ô biaé, ve teke kui na a bo de. A mbe a kuiya éyoñe ba loone na, ntebane ngon (ménopause). A jô na nlem ô nga bo nye angôndô ya mintaé, éyoñ a nga yeme na, nkômban a bili na a biaé bon, wo ye ke jaléban émo ji. Ane ba nnôm be nga tyi’i na, ba zu nyoñe mone ntoñ. To’o nalé, a jô na: “Abui mam ya bo e mbe e sili’i. Mam mete mese me mbe me taé ma nlem. Me mbe me yeme na, mone  ntoñ a ye ke bo ane mone mamiene ma te biaé.”

8 Kalate Zambe a jô na, Kristen é ne minga ja “ye nyiiban amu abiaé dé.” (1 Tim. 2:15, Mfefé Nkôñelan) Nalé a nji tinane na, e biaé nge na, e bi bon a ve ényiñe ya melu mese. Ve nalé a tinane na, minga a bili bon a bili abui mam ya bo aval e ne na, a nji bi éyoñe ya ke a bo ékobôkobô menda menda, a fas éza mam. (1 Tim. 5:13) Ve a belan éyoñe jé ése na, a dañe minju’u ya nda alu’u jé.

Aval avé môt a ne jibi awu ya môt a nye’e? (Fombô’ô abeñ 9 a 12)

9. Aval avé awu ya môte bia te luk e ne beta njuk?

9 Éyoñe bôte ba kobô ajô ya minju’u beluk ba tôbane mie, be wô’ô bo be vuane nju’u éziñ. Awu ya môte bia nye’e. Ôwé, awu ya môte ba te luk, e ne beta nju’u abui bôte da tôbane wô. A ne avale nju’u da kui môt atemetem. Bekristen be to ndi a ngaka’a Yésus a nga bo a lat a ñwômane miñwuan. (Jn. 5:28, 29) Aval avé ngaka’a éte ja volô môt a te li’i étam? Ja volô nye nlem abui. Zene fe Ésa wongan a nye’e bia a belane je na, a su’u bôte ba tôbane minjuk nje le, a volô fe be minlem. Bi tame zu yen avale bebo bisaé be Yéhôva béziñ be nga wô’ôtan, a avale be nga yene mfi ya mvolane Yéhôva a ve.

MVOLANE NLEM ÉYOÑE MINJUK

10. Aval avé Anne a nga dañe nju’u wé? (Fombô’ô fôtô ya atata’a ya ayé’é di.)

10 Anne, minga Elkana a mbe a dañe nye’e, a nga tôbane nju’u ô mbe ngumba aval. A mbe nkôkôm, nté ôte ôse Peninna ki, minga baa Elkana, a mbe a fôé abui. (Lañe 1 Samuel 1:4-7.) Peninna a mbe a pkwe’ele Anne “mimbu mise.” Jam ete e mbe e bo’o na, Anne a wô’ô nleme mintaé, a wô’ô fe émien éngôngol. Ve Anne a nga nyoñe ntyi’ane ya ve Yéhôva ajô dé. Nde fe “a nga ja ye’elan asu be [Yéhôva].” Ye a mbe a to ndi na Yéhôva a ye yalane nye? Ôwé, a mbe a yiane tabe de ndi. Kalate Zambe a jô na, a nji “fe beta bo mbot asu.” (1 Sa. 1:12, 17, 18, Mfefé Nkoñelan) A mbe a to ndi na, Yéhôva a ye vaa éto nkôkôme jé, nge ke na, a ye kôm ajô ete a zene fe.

11. Aval avé meye’elan me ne soo bia mvolane nlem?

11 Minjuk a bitibila’a bia ye ke ôsu, nté ôse bi ngenane bebo mam abé, bi nyiñe fe émo Satan a jôé. (1 Jn. 5:19) Ngo’o avale meva’a bi né éyoñe bia yeme na, Yéhôva a ne “Zambe ya mvolane minlem ôse”! Zene jia é ne volô bia na, bi dañe minjuk, nge bitibila’a é ne meye’elan. Anne a nga yoé Yéhôva nleme wé. Bia fe, éyoñe bia tôbane njuk, bi nji yiane su’u ve na, bi kate Yéhôva abim avé nju’u ôte wo nambe bia. Bia yiane de’ele nye mo, bi yoé nye nleme wongan ôse.Beph. 4:6, 7.

12. Jé é nga volô nkuse minga Anne na ô bi mevak?

12 To’o bia wô’ôtan na bi ne étam amu bi ne nkôkôm, nge ke amu na, môte bia nye’e a te wu, bi ne ke ôsu a bi mvolane minlem. Melu me Yésus, nnôm Anne, nkulu mejô minga, a nga wu e zu koone na, ba nye be nyiñeya fo’o ve mimbu zangbwal. Kalate Zambe a nji jô vôm éziñe na, a nga bi bon. Jé Anne a nga ke ôsu a bo nté ôse wu, akekui éyoñ a nga bi mimbu 84? Luc 2:37 a jô Mfefé Nkôñelan na: “A mbe te kandan nda Zambe, a tabe’e bisulan alu a môs, a tyi bidi a bo  meye’elan.” Ôwé, a nga bi mvolane nlem a mevak amu a mbe a kañe Yéhôva.

13. Va’ak éve’ane ja liti avale benya bemvôé be ne ve bia mvolane nlem, to’o bivuvumane biangan bi nji bo de?

13 Éyoñe bia kôme yeñ a bobejañ a bekale bangan, bia bi benya bemvôé. (Min. 18:24) Paula a simesan aval a nga wô’ô nleme mintaé, éyoñe nyia wé a nga kôlô ékôane Yéhôva. A mbe a bili mimbu mitan. E nji be tyi’ibi na, a dañe nju’u ôte. Ve a nga bi ngule nyul éyoñ Ann, nkpwa’a mefane ya akônda dé a nga nyoñ éyoñe ya volô nye mfa’a ya nsisim. Paula a jô na: “Akusa bo Ann a nji bo évuvumane jam, a nga volô ma abui. A nga volô ma na, me ke ôsu a bo Yéhôva ésaé.” Paula a ke ôsu a kañe Yéhôva. A wô’ô fe mvaé amu na, nyia wé a bulaneya ékôane Yéhôva été. Ann fe a bili abui mevak, amu a mbe ane nyia ya nsisim asu Paula.

14. Bôte ba volô ba bevo’o minlem be ne bi bibotane bivé?

14 Éyoñe bia liti na bia volô bôte bevo’o minlem, biabebiene fe bi ne dañe mbia b’asimesane e ne bia nlem été. Besita be ne nlu’an, nge momo ba yeme na, ba bi beta mevak éyoñe ba kañete mbamba foé, ane beébe bebo bisaé be Zambe. Nsôñane wop ô ne na, be ve Zambe duma éyoñe ba bo  nkômbane wé. Ésaé nkañete é ne ane biañ asu besita béziñ. Teke vaa nge beté, bia bese bia volô mfa’a ya na akônda é bo nlatan, éyoñe bia nye’e bôte ya akônda, a ba ya abôta nkañete dangan. (Beph. 2:4) Nlômane Paul ô ne mbamba éve’ela mfa’a ôte. Kalate Zambe a jô na, a mbe a nto ane “nyia a ba’ale bone bé,” asu bôte béziñe ya akônda ya Thessalonique; a mbe fe ane ésa wop ya nsisim.Lañe 1 Bethessalonicien 2:7, 11, 12.

VOLÔ’Ô MINLEM MI BÔTE YA NDA BÔTE JÔÉ

15. Za a be’e mbe’e ya ye’ele bongô benya mejôô?

15 Vôme mfe bia yiane ve ngule na, bi volô bôte minlem a ne nda bôt. E wô’ô kui na bebiaé be ndôme nyiine benya mejôô, be sili bitôtôlô bekañete mvolan mfa’a ya na, be yeme ye’ele bone bap. Be ne fe sili be na, be bo bone bap meyé’é. Avale Kalate Zambe a jô, bebiaé mbe be bili mbe’e ya ye’ele bone bap. (Min. 23:22; Beép. 6:1-4) Biyoñe biziñ mvolane bôte bevok ô ne sili; bebiaé ba yene wô mvaé. Ve nalé a nji vaa bebiaé mbe’e wop. Ba yiane ke ôsu a laan a bone bap amu nalé a ne mfi.

16. Éyoñe bia volô bongô, jé bia yiane tu’a ba’ale?

16 Nge mbiaé a nyoñe ntyi’ane na, môt éziñ a bo bone bé ayé’é, môt a bo de, a nji yiane jeñe na, a be’e mbe’e bebiaé. Be ne jô môt éziñe na, a yé’é a mongô a bili bebiaé be nji bo Bengaa. Môt a bo de a yiane ba’ale na, ésaé jé é ne ve na, a volô mongô mfa’a ya nsisim sa ke na, a zu nyoñ éto mbiaé. Wôna éyoñ a bo aval ayé’é ete, a yiane bo de nda jap, a bebiaé be mongô, nge ke a mojañ a ne éwôlô. A ne fe de bo mbamba vôm, vôme môt ase a yen. Nalé aye bo na, a bo teke kolé bôte bevo’o ôbak. Bi to ndi na, bebiaé bete bebiene ba ye su’ulane be’e mbe’e wop, ñwô ô ne na, be ye’ele bone bap Mejô me Zambe.

17. Aval avé bongô be ne volô bebiaé bap minlem?

17 Bisoé bia yé’é na bia nye’e nya Zambe, a tôñe melebe mé, bi ne volô menda me bôte map minlem. Be ne de bo éyoñe ba semé bebiaé bap, a volô be mfa’a ya minsôn. Be ne fe volô be mfa’a ya nsisim. Ôsusua na Ndône mendim ja so, Lémec, môte wua ya mvôñe bôte Seth a mbe a kañe Yéhôva. Lémec a nga jô a lat a mone wé Noé na: “A ye volô bia minlem ésaé jangan a nju’u ya mo mangan, bi azu amu Yéhôva a maneya yo’é bia.” Nkulan ajô ôte ô nga tôéban éyoñe Yéhôva a nga jô na, a ye ke beta yo’é si. (Met. 5:29; 8:21) Bongô ba tôñe nya ékaña’a, be nji volô ve bebien, be ne fe mvolane minlem asu menda me bôte map. Ba volô menda me bôte map na, me dañe minju’u ya melu ma, a bi ényiñ éyoñe beta jam a lôte Ndône mendim aye kui.

18. Jé é ne volô bia na, bi ke ôsu a jibi avale nju’u ese, nge ke aval étibila’a ese a ayo’o ese?

18 Bemillion be bôt ba bi mvolane minlem minju’u miap mise amu ba ye’elan, ba bindi bive’ela ya Kalate Zambe, a ba yeñ a bebo bisaé be Yéhôva. (Lañe Besam 145:18, 19.) Éyoñe bia yeme na, Yéhôva a ne Anjeñe ya mvolane minlem, jam ete da volô bia na, bi jibi nju’u ôse bi ne tôbane wô éyoñe ji, a melu ma zu, a ayo’o nlem.