Maana 44nan

Rahab ye sɛgɛsɛgɛlikɛlaw dogo

NIN cɛ fila ye kunko sɔrɔ. U ka kan ka boli. Ni u ma o kɛ dɔrɔn, mɔgɔw bɛna u faga. Israɛl sɛgɛsɛgɛlikɛla minnu cira ka taa Jeriko dugu cogo lajɛ, olu don. Muso min bɛ ka u dɛmɛ, o ye Rahab ye. Rahab ka so tun jɔlen bɛ Jeriko laminikogo kan. Nka, mun na cɛ ninnu ye kunko sɔrɔ? An k’o lajɛ ɲɔgɔn fɛ.

Israɛlkaw tun bɛna Jurdɛn ba tigɛ sɔɔni, ka don Kanan jamana na. Nka, sani u ka don jamana kɔnɔ, Josue ye sɛgɛsɛgɛlikɛla fila ci, ka nin fɔ u ye: ‘Aw ka taa Kanan jamana ni Jeriko dugu cogo lajɛ ka na o fɔ an ye.’

Israɛl sɛgɛsɛgɛlikɛlaw donna Jeriko dugu kɔnɔ tuma min na, u ye u ɲɛsin Rahab ka so ma. Nka, mɔgɔ dɔ taara o fɔ Jeriko masakɛ ye. O cɛ ko: ‘Israɛl cɛ fila nana yan su in na walisa ka jamana cogo lajɛ.’ Masakɛ ye o mɛn tuma min na, a ye cɛ dɔw ci Rahab ma, ka nin fɔ a ye: ‘Israɛl cɛ fila minnu bɛ i ka so kɔnɔ, olu labɔ kɛnɛma.’ Nka, Rahab tun ye sɛgɛsɛgɛlikɛlaw dogo a ka so sanfɛ. Rahab ko: ‘Cɛ dɔw kɔni tun nana ne ka so, nka, ne tɛ u bɔyɔrɔ dɔn. U taara dibi dontuma na, sani dugu donda ka datugu. Ni aw y’aw teliya, aw bɛ se ka kun u la.’ Masakɛ ka cidenw bɔra Rahab ka so ka boli ka taa o cɛw nɔfɛ.

U taara tuma min na, Rahab y’i teliya ka yɛlɛn so sanfɛ. A y’a fɔ sɛgɛsɛgɛlikɛlaw ye ko: ‘Ne b’a dɔn ko Jehova bɛna nin jamana di aw ma. Jehova ye kɔgɔji Bilen ji ja aw ɲɛ cogo min na, aw bɔra tuma min na Misira, ani a ye masakɛ fila Sihɔn ni Og faga cogo min na fana, an ye o kow mɛn. Ne ɲɛna aw ma, ne b’a ɲini aw fɛ, aw fana ka ɲɛ ne ma o cogo la, ka layidu ta ne ye, ka ne ni ne fa, ni ne ba, ani ne balimakɛw ni ne balimamusow kisi.’

Sɛgɛsɛgɛlikɛlaw ye layidu ta Rahab ye, ko a ye min ɲini u fɛ, u bɛna o kɛ a ye. Nka, Rahab yɛrɛ tun ka kan ka ko dɔ kɛ. U ko Rahab ma: ‘I ka nin juru bilenman ta k’a siri i ka fenɛtiri la. I ka mɔgɔw bɛɛ dalajɛ i ka so kɔnɔ. Ni an bɛɛ seginna ka na Jeriko kɛlɛ tuma min na, an na o juru ye i ka fenɛtiri la. O la sa, an tɛna mɔgɔ si faga i ka so kɔnɔ.’ Sɛgɛsɛgɛlikɛla fila seginna ka taa Josue fɛ, ka o kow bɛɛ fɔ Josue ye.

Josue 2:​1-24; Heburuw 11:⁠31.