Maana 7nan

Cɛ jagɛlɛn

MƆGƆW tun bɛ ka caya dugukolo kan ka taa a fɛ. U fanba tun bɛ kojugu kɛ i n’a fɔ Kaɛn. Nka cɛ dɔ tun bɛ yen min ni tɔw tun tɛ kelen ye. O cɛ tun tɔgɔ ye ko Henɔk. Dusu tun b’a la. Mɔgɔ minnu tun bɛ a lamini na, olu tun bɛ kojugubaw kɛ, nka Henɔk taara a fɛ ka Ala bato.

I b’a dɔn mun na o mɔgɔw tun bɛ kojugu camanba kɛ wa? E ka miiri dɔɔnin! Ala ko Hadama ni Hawa kana jiriden min dun, jɔni y’a kɛ u ye Ala kan bila ka o dun ? Mɛlɛkɛjugu dɔ tun don. Bibulu bɛ o mɛlɛkɛjugu wele ko Sitanɛ. Ale de b’a ɲini ka bɛɛ kɛ mɔgɔjuguw ye.

Don dɔ la, Jehova Ala ye Henɔk ci ko a ka taa fɛn dɔ fɔ mɔgɔw ye. O fɛn mɛnni tun man di u tulo la. O fɛn tun ye nin de ye: ‘Don dɔ la, Ala bɛna mɔgɔjuguw bɛɛ halaki.’ Laala o kuma mɛnni ye u dusu bɔ kosɛbɛ. A bɛ se ka kɛ yɛrɛ k’u y’a ɲini ka Henɔk faga. O la sa, fo  Henɔk tun ka kɛ cɛ ye min ja ka gɛlɛn kosɛbɛ, walisa ka se ka o kuma fɔ mɔgɔw ye.

Ala m’a to Henɔk ka mɛn ɲɛnamaya la mɔgɔjuguw cɛma. Henɔk ye san 365 dɔrɔn de sɔrɔ. Mun na an b’a fɔ san 365 dɔrɔn? An b’o fɔ, bawo o waati la, mɔgɔw tun barika ka bon kosɛbɛ ka tɛmɛ an barika kan. U tun bɛ si jan sɔrɔ kosɛbɛ ka tɛmɛ an kan. O de y’a to Henɔk denkɛ Metusela ye san 969 sɔrɔ.

Henɔk salen kɔfɛ, mɔgɔw juguyara ka taa a fɛ. Bibulu ko: ‘U tun bɛ miiri kojugu dama dɔrɔn de la.’ A ko ‘dugukolo fara farinya la.’

Kun minnu na dugukolo fara kojugu la o waati la, yala i bɛ o dɔ dɔn wa? A kun dɔ ye ko Sitanɛ ye fɛɛrɛ kura sɔrɔ, walisa ka mɔgɔw bila u ka kojuguw kɛ. An bɛna o kalan maana nata la.

Jenɛse 5:21-24, 27; 6:5; Heburuw 11:5; Jude 14, 15.