Maana 85nan

Yesu wololi

I BƐ nin denyɛnin dɔn wa? Yesu don. Mariyama jiginna a la a ma mɛn baganmarayɔrɔ dɔ la. Mariyama ye Yesu da baganw ka dumunikɛminɛn kɔnɔ. Nka, mun na Mariyama ni Yusufu bɛ yan yɔrɔ la ni baganw ye? Yala yan yɔrɔ ye den woloyɔrɔ ye wa?

Yan tɛ den woloyɔrɔ ye tiɲɛ na. Nka, i b’a dɔn mun na u bɛ yan yɔrɔ la wa? Romɛ masakɛ, ni o ye Sesar Oguste ye, ale de ye sariya bɔ ko bɛɛ ka taa i wolodugu la, ka i tɔgɔ sɛbɛn faamaw fɛ. Ikomi Yusufu  wolola Bɛtilehɛm dugu kɔnɔ, o kosɔn a taara Bɛtilehɛm. Nka, u selen yen tuma min na, u ma yɔrɔ si sɔrɔ, u tun bɛ se ka jigin yɔrɔ min na. U wajibiyara ka na baganmarayɔrɔ la yan. O don yɛrɛ la, Yesu wolola. Nka, i ko i ɲɛ b’a la cogo min na, tɔɔrɔ si tɛ a la.

I ɲɛ bɛ sagagɛnnaw la minnu nana Yesu lajɛ wa? U tun bɛ kungo la k’u ka sagaw kɔlɔsi su fɛ. Yɔrɔnin kelen dɔrɔn yeelenba dɔ mɛnɛ-mɛnɛna fan bɛɛ la. Mɛlɛkɛ dɔ tun don. Sagagɛnnaw siranna kosɛbɛ. Nka mɛlɛkɛ ko: ‘Aw kana siran. Kibaru duman bɛ ne fɛ k’a fɔ aw ye. Matigi Krista wolola bi Bɛtilehɛm dugu kɔnɔ. A bɛna mɔgɔw kisi. Aw bɛna a dalen sɔrɔ baganw ka dumunikɛminɛn kɔnɔ. A melekelen bɛ ni fini ye.’ O yɔrɔnin bɛɛ la, mɛlɛkɛ caman nana ten, ka Ala tanu. O yɔrɔnin bɛɛ la, sagagɛnnaw y’u teliya ka taa Yesu ɲini. U y’a ye sisan.

I b’a dɔn mun na Yesu ye mɔgɔ kɛrɛnkɛrɛnnen ye wa? I b’a dɔn mɔgɔ min don tigitigi wa? I hakili jigin, ko nin gafe maana fɔlɔ la, an ye Ala denkɛ fɔlɔ ka kuma fɔ. O Denkɛ fɔlɔ ni Jehova ye baara kɛ ɲɔgɔn fɛ, walisa ka sankolow ni dugukolo ani fɛn wɛrɛw dilan. O denkɛ fɔlɔ in ye Yesu de ye.

Jehova ye a Denkɛ ka ɲɛnamaya ta ka bɔ sankolo la ka o don Mariyama kɔnɔ. O yɔrɔnin bɛɛ la, den ye bonya daminɛ Mariyama kɔnɔ, i ko den tɔw bɛ bonya u baw kɔnɔ cogo min na. Nka, nin denyɛnin tun ye Ala Denkɛ de ye. Waati selen, a wolola baganmarayɔrɔ la, Bɛtilehɛm dugu kɔnɔ. Yala i b’a dɔn sisan mun na mɛlɛkɛw tun nisɔndiyara kosɛbɛ ka Yesu wololi kibaru fɔ mɔgɔw ye wa?

Luka 2:​1-20.