1-2. Songon dia do Jesaya 65:16, 17 patoguhon rohatta asa toktong sabar?

“JANGAN MENYERAH!” ma tema kebaktian regional taon 2017. Saleleng kebaktian i, dipaingot do hita asa toktong sabar tikki manaon hasusaan. Nungnga adong opat taon dung salpu kebaktian i, alai sappe saonari ikkon toktong dope hita sabar manaon akka hasusaan.

² Sude do hita susa saonari. Adong do sian hita na susa ala baru mate halak na tahaholongi, ala marsahit na parah, ala nungnga matua, hona bencana, gabe korban kekerasan manang dianiaya, jala susa do hita alani COVID-19. Pasti berharap do hita hatop dipasae Jahowa sude hasusaan on, asa unang hea be i masa jala unang taingot be i.​—Jaha Jesaya 65:16, 17.

3. Boasa ikkon toktong hita sabar?

³ Susa do hita saonari jala lam susa dope annon ngolutta. (Mat. 24:21) Alai ikkon toktong do hita sabar manaon i. Alana didok Jesus do, “Molo toktong hamu setia jala martahan, mangolu ma hamu.” (Luk. 21:19) Boi do hita lam mura patuduhon hasabaron, molo tatiru akka halak na toktong sabar tikki adong hasusaanna.

4. Boasa boi tadok Jahowa do na paling jotjot patuduhon hasabaron?

⁴ Ise do na paling jotjot patuduhon hasabaron? Debata Jahowa. Ibana do na paling sabar mangida sude hasusaan di portibi on. Sabotulna boi do langsung dipasae Jahowa sude hasusaan na masa di portibi na dirajai Sibolis on, ala massai gogo do Ibana. (Rom 9:22) Alai dipaima Jahowa do sahat tu na dapot tikki naung ditottuhon Ibana. Jadi sebelum dapot dope tikki naung ditottuhon i, ikkon toktong do sabar Jahowa. Saonari taida ma jo songon dia Jahowa patuduhon hasabaronna i.

5. Boha do perasaanmuna mamboto na dileai goar ni Debata?

⁵ Sabar do Jahowa tikki dileai goarna. Lomo do roha ni Jahowa dipasangap goarna, ala arga do i di Ibana. (Jes. 42:8) Alai nungnga lobi 6.000 taon dileai goarna na badia i. (Ps. 74:10, 18, 23) Dimulai ma i di Taman Eden. Tikki i didok Sibolis (lapatanna “Pargabus”) ditabunihon Debata do akka na denggan sian si Adam dohot si Hawa, asa unang marlas ni roha halak i. (1 Mus. 3:1-5) Sahat tu saonari, torus dope ditudu Sibolis ditabunihon Debata na denggan sian jolma. Alani i ma diajari Jesus akka siseanna asa manangiakkon on, “Ale Amanami na di banua ginjang, sai dipabadia ma goarmu.” (Mat. 6:9) Alana, sogo hian do roha ni Jesus tikki dileai goar ni Bapakna i.

6. Boasa dipasombu Debata jolma mamaretta dirina sandiri saleleng marribu taon?

⁶ Sabar do Jahowa tikki didok Sibolis dang marhak Ibana mamaretta akka toppanna. Sabotulna Jahowa do na paling marhak mamaretta di surgo dohot di tano on. Jala cara ni Ibana mamaretta do na paling denggan. (Pgk. 4:11) Alai dioto-otoi Sibolis do akka suru-suruan dohot jolma. Didok Sibolis do dang marhak Debata mamaretta nasida. Lao patuduhon na sala do hata ni Sibolis on, porlu do godang tikki. Alani i ma dipasombu Debata jolma mamaretta dirina sandiri saleleng marribu taon, asa terbukti na so mungkin boi jolma marhasil mamaretta dirina sandiri. (Jer. 10:23) Ala sabar Jahowa, gabe terbukti ma holan Ibana do na marhak mamaretta akka toppaanna. Gabe sude ma mamboto cara ni Debata mamaretta do na paling denggan, jala holan Harajaonna do na boi parohon hadameon tu tano on.

7. Akka ise do na mangalo tu Jahowa, jala aha do na lao masa tu nasida?

⁷ Sabar do Jahowa nang pe mangalo akka toppaanna. Sempurna do ditoppa Debata suru-suruan dohot jolma. Alai adong ma sada suru-suruan na mangalo. Digoari ma ibana Setan (lapatanna “Pangalo”). Digoda ibana ma si Adam dohot si Hawa asa mangalo tu Jahowa. Digoda do tong akka suru-suruan na asing dohot pinoppar ni si Adam asa dohot mangalo. (Jud. 6) Di pudian ni ari, bangso Israel, i ma bangso na dipillit Debata, dohot do mangalo tu Jahowa. Gabe debata na so sittong do disomba nasida. (Jes. 63:8, 10) Dang olo nasida unduk tu Jahowa. Alai toktong do sabar Jahowa paimahon sappe dapot tikkina pamateonna sude akka na mangalo i. Dung masa i, marlas ni roha ma hita rap dohot Jahowa. Alana dang adong be annon parjahat di tano on.

8-9. Aha do tuduhan ni Sibolis na kejam taringot Debata, jala aha do na porlu taulahon lao patuduhon na so tutu i?

⁸ Sabar do Jahowa nang pe adong tuduhan ni Sibolis na kejam. Didok Sibolis do molo si Job dohot akka naposo ni Jahowa na asing, dang tulus manomba Debata. Didok ibana do, olo pe nasida manomba Jahowa holan ala na adong do na binuatna. (Job 1:8-11; 2:3-5) Jala sahat tu saonari pe, didok Sibolis dope songon i. (Pgk. 12:10) Alai boi do tabuktihon na so tutu hatana i molo martahan hita jala toktong setia tu Jahowa nang pe adong hasusaan. Alana holong do rohatta tu Jahowa. Molo tabahen songon i, pasti dipasu-pasu Jahowa do hita, songon si Job.​—Jak. 5:11.

⁹ Dipakke Sibolis do muse akka pamimpin agama lao mangajarhon na kejam do Debata i, jala Ibana do na mambahen jolma susa. Molo adong dakdanak na mate,  didok nasida do na dialap Debata ibana asa dibahen gabe suru-suruan di surgo. Massai kejam do tuduhan ni Sibolis i. Alai anggo hita, taboto do molo Jahowa i Debata parholong. Molo marsahit hita manang mate halak na tahaholongi, dang tasalahon Debata. Pos do rohatta, dang adong be haduan sahit jala hehe do muse akka na mate. Tapaboa do tu na asing molo Jahowa i Debata parholong. Ala tabahen songon i, boi ma dialusi Debata akka na mangarehei Ibana.​—Poda 27:11.

10. Aha do na taboto taringot tu Jahowa sian Psalmen 22:23, 24?

¹⁰ Sabar do Jahowa mangida akka naposona susa, nang pe dang lomo rohana mangida i. Debata parasi roha do Jahowa. Jadi lungun hian do roha ni Jahowa tikki diida Ibana susa hita, mungkin ala dianiaya hita manang tikki susa alani hagaleotta sandiri. (Jaha Psalmen 22:23, 24.) Diboto Jahowa do sude hasusaanta. Jala lomo do rohana pasaehon i. (Bandingkon tu 2 Musa 3:7, 8; Jesaya 63:9.) Alani i ma satokkin nai, “Apusan ni Debata ma nasa ilu-ilu . . . Dang adong be hamatean nang arsak ni roha, nang angguk-angguk, nang na haccit, dang disi be.”​—Pgk. 21:4.

11. Songon dia do perasaan ni Jahowa tu akka naposona naung mate?

¹¹ Sabar do Jahowa paimahon akka ale-alena hehe muse. Songon dia do perasaan ni Jahowa tu akka naposona naung mate? Malungun do Ibana! (Job 14:15) Boi do dibayakkon hamu songon dia sihol ni roha ni Jahowa naeng mangida si Abraham muse? (Jak. 2:23) Songon dia sihol ni rohana naeng makkatai muse “langsung” tu si Musa? (2 Mus. 33:11) Jala songon dia siholna naeng mambege si Daud dohot akka parende na asing mangendehon pujian tu Ibana? (Ps. 104:33) Nang pe nungnga mate  akka ale-ale ni Jahowa i, alai dang hea dilupahon Jahowa nasida. (Jes. 49:15) Diingot Ibana dope sude taringot tu halak i. “Ai mangolu do nasida sude di adopanna.” (Luk. 20:38) Alani i paheheonna do nasida. Boi ma begeon ni Jahowa nasida muse martangiang, jala boi ma sombaon ni nasida muse Jahowa. Molo lungun rohatta ala mate halak na tahaholongi, pasti tarapul do rohatta mamboto on.

12. Hasusaan aha do na diadopi akka naposo ni Jahowa na mambahen lungun rohana?

¹² Sabar do Jahowa mangida hajahaton na masa. Mulai sian na mangalo si Adam dohot si Hawa di Taman Eden, diboto Jahowa do lam tu jahatna nama pangalaho ni jolma. Sogo hian do roha ni Jahowa mangida hajahaton, tindakan na so adil, dohot kekerasan na masa di liat portibi on. Asi do rohana mangida akka halak na susa alani i, songon akka na mabalu dohot akka halak na so marama so marina. (Sak. 7:9, 10) Lungun hian do muse roha ni Jahowa mangida akka naposona disiksa jala dipenjarahon. Pos ma rohatta, holong hian do roha ni Jahowa tu hita, akka naposona na martahan manaon hasusaan.

13. Songon dia do pangalaho ni jolma saonari, jala songon dia do perasaan ni Jahowa mangida i?

¹³ Sabar do Jahowa mangida pangalaho ni jolma na so hasea. Ditoppa Jahowa do jolma asa boi maniru akka sifatna. Alai digoda Sibolis do jolma asa unang hasea pangalahona. Alani i, tikki diida Jahowa “nungnga massai jahat akka jolma” di jaman ni si Noak, gabe ‘marsak ma Jahowa jala massai haccit ma rohana’. (1 Mus. 6:5, 6, 11) Dang na lam tu dengganna keadaan saonari, lam tu parahna do. Godang do halak saonari na mangulahon seks na so patut. Las do roha ni Sibolis mangida i. (Eps. 4:18, 19) Tamba las do muse rohana tikki diida ibana akka sisomba Jahowa mangulahon dosa serius. Alai sabar do Jahowa paimahon, sahat tu na dapot tikkina pamateonna sude halak na so olo muba sian pangalahona na so hasea i.

14. Denggan do cara ni jolma mangarajai tano on?

¹⁴ Sabar do Jahowa tikki disegai jolma tano on. Susa do ngolutta ala jolma do na mangarajai jolma. Alai tamba do muse hasusaanta ala nungnga sega tano on dibahen jolma. Hape nungnga diparettahon Debata asa dirajai jala diurus jolma tano on. (Pjm. 8:9; 1 Mus. 1:28) Akka peneliti mandok, molo sai songon i dope cara ni jolma mamakke sumber daya alam, boi do punah lobi sian sajuta jenis ni binatang dohot suan-suanan holan di bagasan piga-piga taon. Gabe holsoan do hita ala nungnga sega tano on. Alai marjanji do Jahowa, ‘ripassononna do akka na manegai tano on’. Jala bahenonna ma saluhut tano on gabe Paradeiso.​—Pgk. 11:18; Jes. 35:1.

15-16. Songon dia do Jahowa patuduhon hasabaronna, jala aha do na boi tatiru sian Ibana? Paboa ma tudosanna.

¹⁵ Saleleng marribu taon, sabar do Jahowa mangida hasusaan na masa di tano on. Sabotulna, boi do dihancurhon Jahowa manang na sadihari pe portibi na jahat on. (Ida kotak “ Toktong do Sabar Jahowa”.) Alai sabar do Jahowa. Parohon pasu-pasu do i tu hita. Saonari coba ma jo tapikkirhon tudosan on. Bayakkon ma adong sahalak borua na lagi hamil. Dipaboa dokter ma tu ibana dohot tu suamina, parah do sahit ni anakna i, jala pendek do annon umurna. Alai nang pe songon i, tetap do las roha ni halak i na dua dung tubu anakna i, nang pe ikkon repot halak i mangurus dakdanak i. Ala holong roha ni nasida tu anakna i, sabar do nasida mangurus dakdanak i.

 ¹⁶ Dos songon dakdanak i ma sude pinoppar ni si Adam dohot si Hawa. Dang adong nanggo sada pe sian nasida na sempurna. Alai dihaholongi Jahowa jala dipardulihon do hita. (1 Joh. 4:19) Molo natua-tua di tudosan i, dang boi dipasae masalah ni anakna i. Alai molo Jahowa, boi do pasaeonna sude hasusaanta. Jala nungnga ditottuhon ibana andigan pasaeonna i. (Mat. 24:36) Holong ni Jahowa on, pasti mangonjar rohatta asa toktong sabar.

17. Sesuai tu Heber 12:2, 3 songon dia do hita boi maniru Jesus na toktong setia jala sabar?

¹⁷ Sian artikel on, nga taboto be Jahowa do na paling jotjot patuduhon hasabaron. Jala Jesus do na paling sempurna maniru hasabaron ni Jahowa. Tikki di tano on dope Jesus, sabar do Jesus nang pe kasar halak tu ibana, nang pe dileai, jala dipakkuhon di hau partinaonan. (Jaha Heber 12:2, 3.) Hasabaron ni Jahowa do na mangurupi Jesus asa boi toktong setia jala martahan. Jala hasabaron ni Jahowa i pe, boi do patoguhon hita saonari.

18. Sesuai tu 2 Petrus 3:9 aha do hasilna ala toktong sabar Jahowa?

¹⁸ Jaha 2 Petrus 3:9. Diboto Jahowa do andigan tikki na pas manghancurhon portibi na jahat on. Ala toktong sabar Jahowa, gabe godang ma halak mananda Ibana. Saonari nungnga adong marjuta halak na manomba Ibana. Pasti las do roha ni nasida ala sabar do Jahowa paimahon sappe tubu nasida, marsiajar taringot tu Ibana, jala mangalean diri tu Ibana. Molo toktong hita setia jala martahan, boi ma tabuktihon dang sia-sia hasabaron ni Jahowa saleleng marribu taon i.

19. Aha do na ikkon taulahon, jala aha do pasu-pasu na tadapot molo taulahon i?

¹⁹ Boi do hita marsiajar sian Jahowa songon dia carana asa toktong sabar jala marlas ni roha. Lungun do roha ni Jahowa mangida hasusaan na dibahen Sibolis. Alai toktong do Jahowa i “Debata na marlas ni roha”. (1 Tim. 1:11) Hita pe boi do toktong marlas ni roha jala sabar paimahon Jahowa pabadiahon goarna, mambuktihon holan Ibana na marhak mamaretta, manghancurhon hajahaton, jala pasaehon sude masalah na adong di tano on. Tatiru ma hasabaron ni Jahowa asa boi hita martahan. Molo tabahen songon i, boi ma tahilala hata na disurat di Jakobus 1:12 na mandok, “Marlas ni roha ma halak na setia nang pe adong sitaonon. Ai molo tahan ibana diuji, jaloonna ma mahkota hangoluan songon janji ni Jahowa tu halak na toktong makkaholongi Ibana.”