Jesaya 49:1-26
49 Hamu ale akka pulo, tangihon ma au,Hamu ale akka bangso+ na dao, parrohahon hamu ma.
Andorang so tubu*+ dope au nungnga dijou Jahowa au.
Tikki di bortian* ni omakku dope au nungnga dijou Ibana goarhu.
2 Dibahen Ibana do babakku dos songon piso na tajom,Ditabunihon Ibana do au di toru* ni tanganna,+ lao mangalinggomi au.
Dibahen Ibana do au gabe songon panah naung dipatajom,Jala ditabunihon Ibana do au di inganan ni panahna.
3 Didok Ibana do tu au, “Ho do naposokku ale Israel,+Marhite ho, patuduokku ma hasangapokku.”+
4 Alai hudok ma, “Marisuang do halojaokki.
Nungnga hupakke gogokku tu na so marlapatan.
Alai, Jahowa ma na gabe hakim di au,*Jala Debatakku ma na mangalehon upa di au.”+
5 Jahowa do na mambentuk au mulai sian kandungan lao dibahen gabe naposona,Didok Ibana do tu au asa huboan mulak si Jakkob,Asa dipapungu halak Israel tu Ibana.+
Dipasangap ma au di jolo ni Jahowa,Jala Debatakki ma na mangalehon gogo di au.
6 Jala didok Ibana do, “Ale naposokku,Dang holan lao paulakkon akka marga ni si Jakkob ho husuru,Jala dang na holan paulakkon halak Israel na mangolu i dope,
Alai bahenokku ma ho gabe sinondang tu akka bangso,+Asa sahat haluaon na sian Au i tu akka ujung ni tano on.”+
7 Songon on ma hata ni Jahowa Debata Nabadia,+ na manobus* Israel, tu halak na dileai,+ tu halak na dihagigihon akka bangso, tu naposo ni akka parhuaso:
“Alani Jahowa na setia i,+Debata Nabadia ni Israel, na mamillit ho+Jongjong ma akka raja, huhut mangida,Jala marsomba ma akka pamimpin.”
8 Songon on ma hata ni Jahowa,
“Di tikki hupatudu asi ni rohakku, hualusi do ho,+Jala huurupi do ho di ari haluaon i,+Sai hujaga do ho lao mambahen ho gabe songon sada jaminan* tu bangso i,+Lao padenggatton luat i,Lao paulakkon parbagianan ni nasida naung tarulang i,+
9 Lao mandok tu akka na tarhurung, ‘Kaluar ma hamu!’+
Tu akka halak na di inganan na golap,+ ‘Patudu ma dirim!’
Dos songon biru-biru ma nasida, mangan di topi ni dalan.Jala saleleng di pardalanan* adong do akka duhut-duhut lao di nasida.
10 Dang na lao male manang mauas+ nasida,Dang lao mohopan manang ditinggang las ni ari nasida.+
Ai Debata parasi roha i do na manogu nasida,+Jala ditogu-togu do nasida tu topi ni mata mual.+
11 Bahenokku ma sude dolokki gabe dalan,Jala hupatimbo ma akka dalanku.+
12 Ida ma! Ro do nasida sian na dao,+Jala parrohahon ma! Adong na sian utara dohot sian barat,Jala adong do na sian luat Sinim.”+
13 Marsurak marlas ni roha ma ho ale langit, jala marlas ni roha ma ho ale tano.+
Marsurak marlas ni roha+ ma ho ale akka dolok-dolok.
Ai nungnga diapuli Jahowa bangsona,+Jala dipatudu Ibana do asi ni rohana tu halak na marsitaonon.+
14 Alai sai didok Sion do,
“Nungnga ditinggalhon+ Jahowa au, jala nungnga dilupahon Jahowa au.”+
15 Boi do lupahonon ni sahalak borua anakkonna na manusu dope?Manang boi do dang holong rohana tu anak na ditubuhon ibana?
Nang pe boi ibana lupa, alai dang hea lupa Au tu ho.+
16 Ida ma! Nungnga huukir be goarmu di talapak ni tanganku.
Jala sai toktong do di jolokku akka tembokmi.
17 Ida ma, hatop nama akka ianakkonmu ro.
Lao nama akka halak na manghancurhon ho dohot akka halak na mangaropukkon ho.
18 Ida ma jala tatap ma tu sakalilingmu.
Nungnga marpungu be nasida sude.+
Nungnga ro nasida sude tu ho.
“Songon pastina Au mangolu,”* ninna Jahowa,“Pakkeonmu ma nasida sude songon mamakke perhiasan,Pakkeonmu ma nasida dos songon na binahen ni pengantin.
19 Nang pe najolo tarulang jala hancur luatmuna i,+Alai saonari, nungnga hurang bidang i di akka pangisina,+Jala akka halak na mambahen ho hancur+ nungnga dao be sian ho.+
20 Dohonon ni anakmu ma tu ho, i ma anakmu na tubu dung tilahaon ho,‘Masoppittu do inganan on di au.
Lului ma muse inganan asa tinggal au dison.’+
21 Jala dohononmu ma di bagasan roham,‘Ise do bapak ni dakdanak on?Ise do na pagodang-godangkon on?+Ida ma! Holan sasada au do na tinggal,+
Nungnga mate ianakkokku jala mandul do au,
Diboan do au tu luat ni musu,Jadi sian dia do akka dakdanak on?’”+
22 Songon on ma na didok Jahowa Tuan Natumimbul i,
“Ida ma! Angkatokku ma tanganku tu akka bangso,Jala angkatokku ma tiang na gabe tanda tu akka bangso.+
Boanon ni nasida ma akka anakmu di abingan* ni nasida,
Jala boanon ni nasida ma akka borum di bahu ni nasida.+
23 Jagaon ni akka raja ma ho,+Jala akka boru ni raja ma na gabe parorotmu.
Marsomba ma nasida tu ho,+Jala dilaton ni nasida ma orbuk na di patmu,+Dung i, botoonmu ma Au do Jahowa,Manang ise na marpos ni roha tu Au, dang na lao dipaila.”+
24 Boi do malua halak na ditakkup sian tangan na gogo?Manang boi do malua sasahalak sian halak na kejam?
25 Alai songon on do didok Jahowa,
“Malua do halak na ditakkup halak na gogo,+Jala selamat do manang ise pe na ditakkup halak na kejam.+
Alookku do halak na mangalo hamu,+Jala paluaokku do akka anakmuna.
26 Bahenokku ma halak na jahat tu ho mangallang sibukna sandiri,Jala mabuk ma nasida manginum mudarna sandiri, dos songon manginum anggur na manis.
Alani i, botoon ni sude halak ma Au do Jahowa,+Na paluahon+ hamu dohot na manobus* hamu,+Debata na Gogo, Debata ni si Jakkob.”+
Surat na di toru
^ Manang “rahim”.
^ As. “Mulai sian bortian”.
^ As. “di bayangan”.
^ Manang “tigor do Jahowa manguhumi au”.
^ As. “sada parjanjian”.
^ Manang boi do “di akka dolok-dolok na gundul”.
^ Sumpa on patuduhon pasti do ikkon saut janji on, songon pastina Debata mangolu.
^ Manang “di andora”.
