LEJJWEJJ jan ukajj lajjwejj mä kilo chikatanikiwa. “Jichhakamajj janipuniw yaqha ukhamajj jikjjatasiwaykiti”. Lejjwit jukʼamp yatjjatasajja, Jehová Diosarojj jukʼampiw luratanakapat yuspärtanjja (Sal. 139:14). Lejjwejja taqe kun lurañatakiw yanaptʼistu, amuytʼañatakis yanaptʼarakistuwa. Amuytʼaña siski uka arojja, “kuntï jan uñjktan ukajj cheqäkaspas ukham amuytʼaña, jan ukajj kunanaktï uñjktan ukanakat lupʼiña” sañwa muni. Kunatakis amuytʼapuntanwa. Sañäni, jan uñtʼat mä lugarat liytʼtan, jan ukajj uka lugarat parlapjjestu ukhajja, uka lugarajj kunjamäpachasa ukjja amuytʼtanwa. Cheqansa, kunanaktï jan uñjktan, jan istʼktan, jan malltʼktan, jan muktʼktan, jan ukajj jan llamktʼkaraktan ukanakat lupʼtan ukhajja, amuytʼasktanwa. Jaqejja, Diosar uñtasit luratätanwa sasaw Bibliajj qhanañchi (Gén. 1:26, 27). Ukhamajja Jehová Diosajj amuytʼirirakiwa. Niyakejjay Diosajj amuytʼir lurawaychistojja, kunas Jupan munañapajja uk sum amuytʼañaswa muni (Ecl. 3:11). ¿Kunas Diosan munañaparjam amuyañatakejj yanaptʼistani? ¿Kunanaksa jan amuyañasäki?

1) Jan walinak lupʼiña.

Lupʼiñajj janiw jan walïkiti, antisas maynirojj yanaptʼaspawa. Ukampis kunjamtï Eclesiastés 3:1 qellqatajj siskejja, “taqe kunas horasanikiwa”. Awisajja, jan wakiski ukhaw yaqha toqenakat lupʼsna. Amuytʼañataki, tantachäwinkkasasa, Diosan Arupat sapak yatjjatkasasa, yaqha toqenakat lupʼisksna ukhajja, janiw sum yateqksnati. Jesusasa, wachoq jucha lurañata, yaqha ukhamanakat jan lupʼipjjañapatakiw jaqenakar ewjjtʼäna (Mat. 5:28). Kunanakatï Jehová Diosatak jan walïki ukanaksa janiw lupʼiñasäkiti. Wachoq jucha lurañanakat lupʼsna ukhajja, uk lurañaruw purtʼassna. Ukhamajja, kunanakatï Jehová Diosat jitheqtaykistaspa ukanakat janipun lupʼiñäniti.

2) Qollqew taqe kunat jarkʼaqetani sasin amuyaña.

Qollqesa, kunanakatï utjkistu ukanakas jakañatak munasiwa, yanaptʼarakistaspawa. Ukampis ukanakaw jan walinakat jarkʼaqetani, cheqpach kusisiñsa churitani sasin amuyañajj janiw walïkaspati. Salomón reyejj akham sänwa: “Qamiristi amuyasiwa jupan yänakapajj, mä markar alto perqanakampi muyuntatäkaspa ukhama” sasa (Pro. 18:11). Manila (Filipinas) markan kunas  septiembre, 2009 maran pasäna uka toqet parltʼañäni. Uka maranjja, jallojj wal purintasinwa niya taqpach mark apäna. ¿Walja qollqeninakajj qhespiyasipjjänti? Niya taqe kun aptʼasiri walja qollqeni mä jaqejj akham sänwa: “Umajja taqeniruw mä khuskhar tukuyawayapjjetu. Qamirinakasa, pisinkirinakas pachpa jan waltʼäwinakanwa jikjjatasipjjta” sasa. Inas akham amuysna: ‘Qollqesa, kunanakatï utjkitu ukanakas yanaptʼitaniwa, jarkʼaqarakitaniwa’ sasa. Ukampis janiw jarkʼaqkistaspati.

3) Jutïrit sinti llakisiña.

Jesusajj akham sasaw ewjjtʼäna: “Jan llakisipjjamti kunatï qharürojj paskani ukatjja” sasa (Mat. 6:34). Taqe kunat llakisisajja, kunaymaninakwa amuyjjsna. Kunanakatï jan paski ni jutïrinsa paskani ukanakat sinti llakisiñajj aynachtʼayistaspawa. Uka toqetjja Bibliajj siwa: “Llakejj jaqerojj mayjtʼayiwa” sasa (Pro. 12:25). Ukatwa Jesusan arunakapar istʼañasa. Jupasti ‘kunatï qharürojj paskani ukatjja jan llakisipjjamti, jan ukasti sapürutak llakisipjjam’ sasaw ewjjtʼäna.

1) Janïräkipan jan walinakat amuyasiña.

Diosan Arupajja, janïräkipan jan walinakat amuyasiñatakiw ewjjtʼistu (Pro. 22:3). Kunjamansa uñjasiñäni ukjja, janïr kun amtkasaw amuytʼsna. Sañäni, mä kusistʼäwiru invittʼapjjestaspa ukhajja, sarañäniti janicha uk yatiñatakejj akanakat amuytʼañaw yanaptʼistaspa. Uka kusistʼäwirojj qawqhanisa, khitinakas sarapjjani, kawkinsa, kunapachasa apasini ukwa jisktʼasiñasa, ukhamatwa kunas ukan pasani uk amuytʼsna. Ukatsti, ‘¿Biblian yatichäwinakaparjam sarnaqer jaqenakat ukankapjjpachäni?’ sasinsa jisktʼasiñasarakiwa. Ukham amuytʼasajja, kusistʼäwejj kunjamäpachanisa uk yatiñatakiw yanaptʼistani. Ukhamatwa sarañäniti janicha uk yatiñäni, ukatsti, Jehová Diosampis sumarak apasiñäni.

2) Kunjamsa mä jan waltʼäwi askichsna uk amuytʼaña.

Amuytʼañajja, jan waltʼäwinakaru saykatañatakisa askichañatakisa yanaptʼistaspawa. Tamamankir mä jilatampi jan ukajj mä kullakampi jan waltʼayasisma ukhajja, jupampi uka jan waltʼäwi askichañatakejja, ¿kunsa jumajj lurasma? Akham jisktʼasiñaw wakisispa: “¿Jupampi parlañajj chʼamakiti? ¿Kunapacha parltʼañas wakisispa? ¿Kunjam arunakampi parltʼañas wakisispa?” sasa.  Ukham jisktʼasiñajja, mä jan waltʼäwi askichañatakejj kun lurañas walïspa uk amuytʼañatakiw yanaptʼistani (Pro. 15:28). Mä jan waltʼäwi askichañataki janïräkipan amuytʼañajja, taman jilat kullakanakasampi sum apasiñatakiw yanaptʼistani. Ukhamatwa amuyirïtas uñachtʼayañäni.

3) Bibliat liyisinsa yatjjatasinsa amuytʼañasawa.

Diosan Arupa sapüru liyiñajj wali wakiskiriwa. Ukampis janiw aleqak liyiñasäkiti, jan ukasti sum amuytʼañasawa, jakäwisan ukarjam sarnaqañatakis chʼamachasiñasarakiwa. Biblia liyiñajja, kunanaktï Jehová Diosajj lurki ukanakat yuspärañatakiw jiwasarojj yanaptʼañapa. ¿Kunjamsa amuytʼañajj ukatak yanaptʼistaspa? Jupanakjam iyawsäwinïpjjañäni sat libronjja, Diosan walja servirinakapatwa parli. Jupanakajj kunjamanakansa jikjjatasipjjäna uk amuytʼañäni ukhajja, jupanakar uñjksnas ukhamäniwa. Amuytʼañajja, Biblian yatjjatktan uka jaqenakajj kunjamsa jikjjatasipjje, kawki cheqankasipkisa, kunanakas ukan istʼasi, kunjamsa uka cheqajj thujstʼani, ukanakat amuytʼañatakiw yanaptʼistaspa. Ukaw Biblian parlki uka sarnaqäwinakat jukʼamp sum yatjjatañatak yanaptʼistani, jakäwisansa yanaptʼarakistaniwa.

4) Kunjamsa maynejj jikjjatasi uk amuytʼaña.

Maynejj kunjamsa chuymapan jikjjatasi uk amuytʼirïñajja, wali askiwa. Jehová Diosasa Jesusasa ukhamäpjjewa, jupanakajja kunjamsa jikjjatastan uk amuytʼapjjewa. Jiwasajj jupanakatwa yateqasiñ muntanjja (Éxo. 3:7; Sal. 72:13). ¿Kunjamatsa ukham chuymanïsna? Amuytʼañaw ukatakejj yanaptʼistaspa. Kunjamtï jilat kullakanakasajj uñjasipki ukhaman janis jiwasajj uñjaskstanjja, akham jisktʼasiñaw wakisispa: “Nayatï jupjam uñjasirista ukhajja, ¿kunjamakis jikjjatasiristjja? ¿Kunjam yanaptʼatäñsa muniristjja?” sasa. Ukham jisktʼasiñaw mayninakajj kunjamsa jikjjatasipjje uk amuytʼañatak yanaptʼistaspa. Ukham chuymanïñajja, jukʼamp suma cristianor tukuñataki, Diosan Arupat yatiyañataki, ukhamarak jilat kullakanakampi sum apasiñatakiw yanaptʼistani.

5) Paraison jakasiñajj kunjamänisa uk amuytʼaña.

Paraison jakasiñajj kunjamänisa ukjja, Diosan Arupajj sumwa qhanañchi (Isa. 35:5-7; 65:21-25; Apo. 21:3, 4). Bibliat apstʼat qellqatanakasansa uka toqet amuytʼañatakejj wali suma dibujonakaw utji, ukanakaw paraisonsa niyas jakasjjsna ukham amuytʼañataki yanaptʼistu. Niyakejjay Jehová Diosajj amuytʼasiri lurawaychistojja, kunjamsa amuytʼañajj yanaptʼistaspa ukjja Jupajj sumwa yati. Jiwasatï Jehová Diosan arsutanakapat lupʼiñäni ukhajja, uka arsutanakapat janiw pächaskañäniti, jan waltʼäwinakan uñjaskasas Diosat janiw jitheqtkañäniti.

Jehová Diosaw amuytʼir lurawayistu, ukaw Jupar jukʼamp sum serviñatakejj jiwasanakar yanaptʼistu. Ukhamasti kunatï Jehová Diosatakejj sumäki ukanakatak sapür lupʼipjjañäni, ukhamatwa Diosarojj jaqenakar amuytʼir luratapat yuspärañäni.