Biblian yatichäwinakapa

¿Kunatsa cristianonakajj bautisasipjje?

Aka yatichäwejja, kawkïr jisktʼanaktï jumajj jisktʼasirïta ukwa pachpa Bibliamampi yatjjatañ yanaptʼätam. Jumatï munstajja, Jehová Diosan Qhanañchirinakapampiw aka jisktʼanakat yatjjatasma.

1. ¿Cristianonakan bautisasitapajj kuns uñachtʼayi?

Bautisastan ukhajja, Diosamp sum apasiñatakiw Jupar taqe chuyma achiktʼastanjja. Ukatwa Diosan loqtirinakapajj jiskʼa wawäkasin bautisasipjjañapajj jan wakiskiti, jan ukasti Diosaruw sum uñtʼapjjañapa ukat Jesusan arkiripaw tukupjjañaparaki (Hechos 8:12; 1 Pedro 3:21). Jesusan arkiripäñatakejja, sum yatjjatañapa ukat kuntï lurapjjam siski uk phoqhapjjañaparakiwa. (Mateo 28:19, 20 liytʼäta.)

Apostolonak tiemponjja, jaqenakajj Diosatsa, Jesusatsa wal yateqañ munapjjerïna. Mä jaqejja, Jesusan jiwäwip toqe qhespiñ utjatap yatisajja, ukarjamaw luräna ukat jankʼakiw Jesusan arkiripar tukuwayjjäna. Jichhürunakanjja, ukhamarak walja jaqenakajj lurapjjaraki. (Hechos 8:26-31, 35-38 liytʼäta.)

2. ¿Kunatsa Jesusajj bautisasïna?

Jesusajj 30 maranïkän ukhaw Bautisir Juanajj Jordán jawiran Jesusar bautisäna. Jupajj Jehová Diosan munañap phoqhañ munatap uñachtʼayañatakiw bautisasïna, mä arunjja, Mesiasjam Diosar loqtañ munatapwa uñachtʼayäna (Hebreos 10:7). Bautisasitapampejj jaqenakan juchap layku jakäwip aptʼasiñ munatapwa uñachtʼayarakïna. Janïr aka Oraqer jutkasaw jupajj Awkipar istʼasirïtapa ukat munasitapsa uñachtʼayäna. (Marcos 1:9-11 ukat Juan 8:29; 17:5 liytʼäta.)

  3. ¿Kunatsa cristianonakajj bautisasipjjañapa?

Taqeniw jucharar nastanjja, janiw Jesusjam jan juchanïktänti. Ukampis jakäwip loqtasitap laykuw Jehová Diosampejj sum apasiraksna (Romanos 5:10, 12; 12:1, 2). Ukat familiaparakïsnawa (2 Corintios 6:18). ¿Ukatakejj kun lurañasas wakisi? Nayraqatjja, sapasakiw Jehová Diosar jakäwis mä mayisiw toqe katuyasiñasa, ukampejj munañap lurañ munataswa uñachtʼaytanjja. Ukjjarusti, taqen uñjkat umar bautisasisajja, Jehová Diosar jakäwis katuyasitas uñachtʼaytanjja. (Mateo 16:24 ukat 1 Pedro 4:2 liytʼäta.)

4. ¿Kunjamsa jumajj bautisasiñatak wakichtʼasisma?

Jehová Diosan Qhanañchirinakapaw Diosar jakʼachasiñ munapki ukanakarojj Bibliat yatichapjje. Ukat jumatï, Bibliat yateqäta, tantachäwinakar saräta ukhajja, Jehová Diosarojj jukʼampiw munasïta ukat iyawsäwimas chʼamañchasirakiniwa. Ukampisa, sum jakasiñatakisa ukat cheqpach cristianjam sarnaqañatakis yanaptʼarakïtamwa. Sañäni, munasirïñataki, Diosar taqe chuym confiyasirïñatakisa ukat Jehová Diosar wiñay loqtañatakis, yanaptʼarakïtamwa. (Juan 17:3 ukat Hebreos 10:24, 25 liytʼäta.)

Jukʼamp yatjjatañatakejja, ¿Kunsa Bibliax chiqpachapuni yatichi? aka libron 18 jaljap uñjjattʼäta, ukajj Jehová Diosan Qhanañchirinakapan luratawa.