Kunsa liytʼirinakajj yatiñ munapjje

¿Khitis Belenar mä warawarar khitpachäna?

▪ Kimsa reyes magos ukanakaw jiskʼa Jesusan nasïwipar visittʼasipki ¿ukanak navidadan uñjirïtäti? Ukarjamajja, Jesusajj mä uywa uyunwa nasïna ukat Diosaw mä warawara uñstayäna ukhamat reyinakar ukhar irpañapataki sasaw sapjje. Ukat wawanakas uka reyinakan sutinakaps sum yatipjje: Melchor, Gaspar ukat Baltasar sasaw sapjje. Ukampis ¿Bibliarjamajj ukhamäpachati? janiwa. Walja toqetwa mayjtʼi.

Nayraqatjja, ¿khitinakapjjänsa uka kimsa jaqenakajja? Griego arut jaqokipat Bibliarjamajja, janiw reyinakapkänti, jan ukasti astrologonakapjjänwa sasaw qhanañchi. Mä arunjja kunas jutirin pasani uk yatjjatañatakisa ukat yatiyañatakisa warawaranakwa uñchʼukipjjerïna. Ukat qhawqha astrologonakapjjänsa ukat kuna sutinipjjansa ukanakjja janiw Bibliajj qhanañchkiti.

Ukatjja, ¿kunaratus Jesusar visittʼapjjänjja? Bibliarjamajja, Jesusajj janiw asu wawakänti ukat janirakiw mä uywa utans jikjjataskänti sasajj qhanañchkiti, kunattejj Mateo qellqerejj akham sänwa: “Utar mantasinsti wawampiru, María taykapampiruw jikjjatapjjäna” sasa (Mateo 2:11). Ukhamajja, visittʼirinak puripjjäna ukhajja, Jesusajj janiw asu wawajjänti jan ukasti jiltatajjänwa. Ukatjja, Joseyamp Mariampejj janiw mä uywa utan katoqapkänti jan ukasti mä utanwa katoqapjjäna.

Ukatsti ¿khitis uka warawarar astrologonak arktapjjañapatak uñstayäna? Jichhürunakanjja, Iglesia pʼeqtʼirinakajj Diosaw uka warawarar uñstayi sasaw yatichapjje. Ukampis ¿ukhamapachatï? Amuytʼañataki, uka warawarajj janiw Belén markar irpkänti. Jan ukasti Jerusalén markaruw irpäna ukanwa astrologonakajj Herodes sat reyir Jesusajj nasjjewa ukat juparakiw ‘judionakan reyipanejja’ sasin yatiyapjjäna. Ukatwa Herodesajj jiskʼa wawar wal uñisjjäna (Mateo 2:2). Ukhamajja, Jesusar visittʼkasinjja yatiyapjjetataw kawkhans jikjjatasi, kunatejj nayajj regalonak apañ munaraktwa sasaw Herodesajj säna. Ukatjja warawarajj kawkhantï Joseyamp Mariampejj jikjjatasipkänjja, ukaruw irpäna, cheqansa ukham astrologonakan lurapjjatapajj jan walipunïnwa, kunattejj Jesusajj jiwayataw uñjasispäna. Ukampis Jehová Diosaw Jesusar jan walinakat jarkʼaqäna. Ukat astrologonakajj Herodesar jan kun yatiyasaw sarjjapjjäna, ukham uñjasisinjja wal colertʼasïna. Ukat taqe Belenankir wawanakaru ukat uka jakʼankirinakaruw pä maran jan ukajj minusa nasitanakaruw jiwarayäna (Mateo 2:16).

Walja maranak qhepatjja, Jehová Diosajj Jesusat akham säna “Akawa munat Wawajajja, kawkïrirutejj nayajj ajllista ukajja” sasa (Mateo 3:17). Cheqansa Jesusan awkipajj wali munasiri ukat cheqapar luririwa. Ukat niyakejjay Jehová Diosajj leyiparjam jan wali lurir jaqenakar uñischinjja, ¿astrologonak Jesusar visittʼapjjañapatakejj ajllispänti? (Deuteronomio 18:10.) Ukat ¿Herodesan jukʼamp Jesusar uñisiñapataki ukat jiwayañapataki mä warawara toqnam astrologonakar irpaspanti? Ukhamarak ¿kawkhantï jiskʼa Jesujajj jikjjataskan ukjar irpaspänti, ukhamat Herodesar yatiyapjjañapataki?

Amuytʼañataki: mä ejército pʼeqtʼirejj taqe kuns yäpar lurir soldadoparuw uñisirinakapar ukar khiti. Ukat ¿soldadojar khithanïsktwa sasin uñisirinakapar yatiyaspati? ¡janiwa! Jehová Diosajj ukhamarakiw wali wakiskir luräw phoqhañapatakiw aka Oraqer Yoqapar khitanïna. Ukhamajj ¿kawkhantï jiskʼa Jesusajj jikjjataskäna uk Herodesar yatiyaspänti? ¡Janiwa!

Ukhamajja, ¿khitis uka warawara uñstaypachäna? Ukat ¿khitis Jesusar jiwayañ munäna, ukhamat aka Oraqen jan kuns phoqhañapataki? ¿khitis taqe jaqenakar pantjayasiyañ muni ukhamarak kʼarisiñsa, nuwasiñsa ukat jiwayasiñsa wiytaski? Cheqansa Jesús pachpaw qhan akham säna: Supayajj “jaqe jiwayiriwa” ukat ‘kʼarin awkiparakiwa’ sasa (Juan 8:44).