Aka revista liytʼirinakan jisktʼäwinakapa

¿“[Jehová] Tatitutakejj wali llakisiñawa, iyawsirinakapar jiwir uñjañajja” siski ukajj kamsañsa muni?

▪ Diosan amuytʼayataw Salmo qellqerejj akham qʼochüna: “[Jehová] Tatitutakejj wali llakisiñawa, iyawsirinakapar jiwir uñjañajja” sasa (Salmo 116:15). Taqe chuyma servirinakapan jakäwipajja, Jehová Diosatakejj wali askiwa ukat sapa mayniruw wal munasi. Ukampisa, uka textojj janiw mä jaqen jiwatapatak parlkiti.

Jiwatar imjjañataki arstʼäwinjja, janiw uka textojj jiwiritakïkaspas ukham liytʼasiñapäkiti, jiwañkamas Jehová Diosar taqe chuyma serviwaykchejja janipuniw liytʼasiñapäkiti. ¿Kunatsa? Uka textojj kamsañtï munki ukajj waljaw utji. Salmistajj kamsañsa munäna uk amuytʼañäni, jan jitheqtas servirinakapatï taqeni jiwapjjaspajja, Jehová Diosatakejj wali llakkañapunïspawa, ukatwa ukham pasañap jan munkiti, kunattejj sapa mayniruw wal munasi ukwa salmistajj sañ munäna (Sal. 72:14; 116:8 uñjjattʼäta).

Ukhamasti, Jehová Diosajj janipuniw servirinakapan tampacha jiwapjjañap ukhamak uñchʼukkaniti, ukwa Salmo 116:15 qellqatajj uñachtʼayistu. Jehová Diosan Qhanañchirinakapan sarnaqäwipas ukarakwa uñachtʼayistu. Wali tʼaqhesiyata ukat arknaqatpachas aguantapkäna ukaw Diosan jarkʼaqaskatap uñachtʼayistu.

Jehová Diosaw taqe chʼamanejja ukat kuntï amtki ukajj phoqhasipuniniwa. Ukatwa markapan taqpacha chhaqtañapjja janipun ukhamak uñchʼukkaniti. Diosan markapatï qʼal chhaqtaspajja, Diosat sipansa enemigonakapas jukʼamp chʼamanïpkaspa ukhamäspawa. Ukat Oraqpacha suma jaqenakampi phoqhantayañ Diosajj amtkäna ukas janiw phoqhaskaspati (Isa. 45:18; 55:10, 11). Yamas Diosan templop patiopanjja, mä arunjja, aka Oraqenjja janiw khitis yupaychjjaspati. Ukatjja, “machaq alajjpachampi” apnaqat suma chuyman jaqenakasa, mä arunjja, ‘machaq oraqes’ janirakiw utjkaspati (Apo. 21:1). Ukat Jesucristojj Waranqa Maranak Apnaqañapäki ukas janirakiw jan markapampejj phoqhaskaspati (Apo. 20:4, 5). Cheqas Diosan profecianakapajj taqpachapuniw phoqhasini.

Maysa toqetjja, enemigonakapan markap tukjapjjañap ukhamak uñchʼukispajja, janis suma Diosäkaspa ukat janis taqe chʼamanïkaspa ukhamwa amuyasispa. Ukat Taqe kunjjar Munañanïtapas qʼañuchataw uñjasirakispa. Jehová Diosajj Jupa pachpa respetasitapata ukat sutiparus respetatapatjja, janipuniw taqe chuyma servir markapar tukjaykaniti. Amuytʼañäni, Jehová Diosanjja janiw “kunatejj jan cheqapäki ukajj utjkiti”, ukhamasti taqe chuyma servir markaparojj arjjatakipuniniwa (Deu. 32:4; Gén. 18:25). Biblianjja akham sarakiwa: “Tatitusti sutipar munatap laykojja janiw apanukupkätamti” sasa (1 Sam. 12:22). Jehová “Tatitojj janiw markaparojj apanukkaniti, janirakiw jupankirinakarus jaytanukkaniti” (Sal. 94:14).

Diosan markapajj janipuniw kunäkipansa aka Oraqet chhaqtayatäkaniti, ¡uk yatiñajj walpun chʼamañchtʼistu! Ukhamasti, Jehová Diosar taqe chuyma serviskakiñäni, ukat Aruparus confiyarakiñäni, ukanjja akham siwa: “Jumar tukjañäkis uka armjja janiw khitis jichhakam lurkiti. Khitinakatejj jumar juchañchapkätam ukanakarojj amuktʼayätawa. Ukwa nayajj churta khitinakatejj nayar servipkitu ukanakarojja: ‘Atipjäwi’ Tatituw ukjja arsu” sasa (Isa. 54:17).

[22 janan qhanañchäwipa]

Diosajj janipuniw markaparojj tukjaykaniti