Israelitanakajj wasarankasipkäna ukhajja, Coré, Datán, Abiram sat chachanakampi 250 chachanakampiw Moisés contra saytʼapjjäna. Jupar akham sapjjänwa: ‘¡Janiw jumanakar istʼañ munjjapjjsmati! ¿Kunatsa jumajj nanakar pʼeqtʼañama? ¿Kunatsa Aaronajj jachʼa jilïr sacerdotëñapa? Jehová Diosajj taqenimpïskiwa, janiw jumanakampikïkiti’ sasa. Jehová Diosarojj janiw ukajj gustkänti, jupa contras saytʼapkaspa ukhamänwa.

Moisesajj Coré chacharusa jupampïpkäna ukanakarusa akham sänwa: ‘Qharürojj tabernáculo carpar jutapjjam, inciensoni sankʼa apnaqañanak (braserillonak) apasinipjjarakim. Jehová Diosaw khitirus ajllisi uk uñachtʼayistani’ sasa.

Qhepürojj Coré chachasa 250 chachanakasa tabernaculoruw Moisesan ukar sarapjjäna. Sacerdotëpkaspas ukham incienso nakhayapjjäna. Ukatwa Diosajj Moisesampir Aaronampir säna: ‘Coré chachatsa jaqenakapatsa jitheqtapjjam’ sasa.

Coré chachajj tabernaculorus Moisesan ukar sarkchïnjja, Datán, Abiram chachanakampi familianakapampejj janiw sarañ munapkänti. Jehová Diosajj israelitanakar akham sänwa: ‘Coré, Datán, Abiram chachanakan carpanakapat jitheqtapjjam’ sasa. Jupanakajj jankʼakiw  jitheqtapjjäna. Datán, Abiram chachanakas familianakapas carpanakap anqanwa quedasipjjäna. Ukatsti oraqejj akatjamat jistʼartasaw Dios contra saytʼirinakar manqʼantäna. Tabernaculonsti, ninaw alajjpachat saraqanisajj Coré chacharusa 250 chachanakarusa jiwarayäna.

Jehová Diosajj Moisesar akham sänwa: ‘Taqpach tribunakan jilïrinakapajj thujrunakapwa apanipjjañapa. Sapa maynin thujruparuw sutip qellqantañama. Leví tribun thujruparojj Aaronan sutip qellqantäta. Ukatsti taqpach thujrunakwa tabernáculo carpar uchäta. Khitirutï nayajj ajllkä ukan thujrupajj panqaraniwa’ sasa.

Qhepürusti, Moisesajj taqpach thujrunak apsunisajj jilïrinakaruw uñachtʼayäna. Aaronan thujrupajj panqaraskänwa, almendranakaw poqoraskarakïna. Ukhamatwa Jehová Diosajj jilïr sacerdotet Aaronar ajllitap uñachtʼayäna.