Israelitanakajj esclavöpjjänwa, egipcionakajj chʼama trabajonak lurapjjañapatakiw obligapjjäna. Ukatwa Jehová Diosajj Moisesampir Aaronampirojj faraonar akham sanipjjañapatak khitäna: ‘Markajarojj wasaran nayar adorapjjañapatak khitam’ sasa. Faraonajj jachʼa jachʼa tukusaw akham säna: ‘Kunsay Jehová Diosajj saskpan, janiw importkituti. Janiw israelitanakar khitkäti’ sasa. Ukatsti jukʼamp chʼama trabajonak lurapjjañapatakiw faraonajj obligäna. Ukampis Jehová Diosaw istʼasirïñ yatichañapäna. ¿Kunjamsa uk luräna? Tunka plaganakampiw Egipto markar castigäna. Jehová Diosajj Moisesar akham sänwa: ‘Faraonajj janiw istʼkituti. Qharüru alwajj Nilo jawirankaskaniwa. Ukar sarasajj akham sätawa: “Markajar jan khitatamatwa aka jawirajj wilar tukuni” sasa’. Ukatwa Moisesajj faraonan ukar saräna. Faraonajj Aaronaruw thujrupampi Nilo jawirar jawqʼantir uñjäna, umajj wilaruw tuküna. Ukatsti jawirajj thujsäjjänwa, janiw umtʼañjamäjjänti, chawllanakas jiwarjjänwa. Ukhampachas faraonajj janiw israelitanakar khitañ munkänti.

 Paqallqo urunakatjja, Diosajj wasitat Moisesarojj faraonar akham saniñapatak khitäna: ‘Markajar jan khitkätajja, Egiptorojj kʼayra jampʼatunakaw phoqantani’ sasa. Faraonajj janiw istʼkänti, ukatwa Aaronajj thujrup altor aytäna, markarusti kʼayra jampʼatunakaw phoqantäna. Utanakansa, platonakansa, ikiñansa, ¡taqe cheqanwa utjäna! Faraonajj Moisesar akham sänwa: ‘Aka castigo tukusjjañapatak Jehová Diosar ruwtʼam, israelitanakar khitjjäwa’ sasa. Diosajj uka mayitar istʼänwa, egipcionakajj jiwat kʼayra jampʼatunakjja montón montón apthapipjjäna, wal thujsarakïna. Ukampis faraonajj janirakikiw israelitanakar khitañ munkänti.

Jehová Diosajj akham sasaw Moisesar säna: ‘Aaronajj thujrupampi oraqer jawqʼantpan. Uka laqʼa polvojj jiskʼa mosquitonakaruw tukuni’ sasa. Jawqʼantäna ukhajja, cheqapuniw achusir jiskʼa mosquitonakajj taqe cheqan utj-jjäna. Yaqhep egipcionakajj faraonar akham sapjjänwa: ‘¡Aka castigojj Diosatwa juti!’ sasa. Ukhampachasa faraonajj janiw israelitanakar khitañ munkänti.