Adanampi Evampejj Edenankir jardinat mistupkäna uka qhepatjja, walja wawanakanipjjänwa. Nayrïr wawapajj Caín satänwa, jupajj yapu lurirïnwa. Payïr wawapajj Abel satarakïnwa, jupasti ovej awatirïnwa.

Mä urojj Cainampi Abel sat sullka jilapampiw Jehová Diosar ofrendanak loqtapjjäna. ¿Kunas mä ofrendajj uk yattati? Diosar churaski uka regalow ofrenda satajja. Abel chachan regalopaw Jehová Diosar kusisiyäna. Caín chachan regalopasti janiw kusisiykänti. Ukatwa Cainajj wal colerasïna. Diosasti jupar akham sänwa: ‘Colerataki sarnaqaskäta ukhajja, jan waliruw purtʼasïta’ sasa. Cainajj janiw Diosar istʼkänti.

 Antisas Abel sullka jilaparojj akham sänwa: “Pampar saraskañäni” sasa. Pampankasipkäna ukhajja, Cainajj Abel sullkaparuw nuwantasajj jiwayäna. ¿Kunjamsa Jehová Diosajj Cainar castigäna? Familiapatjja wali jayaruw apanuküna, janipuniw kuttʼaniñapäkänti.

¿Kunsa ukat yateqsna? Munañasarjam kunas jan phoqaskaspa ukhajja, inas colerassna. Uka colerasiñatejj chuymasan jiltaskakispa, jan ukajj colerataki mayninakajj uñjapjjestaspa ukhajja cambiañasawa. Jan jankʼaki pacienciasksna ukhajja, colerampiw atipayassna, jan waliruw purtʼasiraksna.

Abel chachajj Jehová Diosar wal munasïna, Diosar istʼasaw sarnaqarakïna. Jehová Diosajj janiw jupat armaskaniti, aka oraqe paraisor tukuyjjani ukhas jaktayaniwa.