Siria markan Ben-Hadad reyipajj walja kutiw Israel contra saräna. Ukampis Eliseo profetaw Israelan reyipar uk yatiyirïna, ukhamat Israelan reyipajj qhespjjañapataki. Ukatwa Ben-Hadad reyejj Eliseor katuntañ amtäna. Dotán markan jakatap yatjjatasajja, mä ejercitoruw katuntanipjjañapatak khitäna.

Sirio soldadonakajj arumaw Dotán markar puripjjäna. Eliseon yanapiripajja markajj soldadonakampi muyuntatwa alwajj uñjäna, walpun sustjasïna. Jachʼatwa akham sarakïna: ‘¡Eliseo, jichhajj kamachañänisa!’ sasa. Eliseojj sarakïnwa: ‘Jupanakat sipansa, jiwasat saytʼasirinakajj jukʼampïpjjewa’ sasa. Ukhaw Jehová Diosajj Eliseon yanapiripar ejercitop uñjayäna, uka marka jakʼankir qollunakajj nakhaskir guerra carronakampi caballonakampi muyuntatänwa.

Sirio soldadonakajj Eliseor katuntañ munapjjäna ukhajja, Eliseojj Jehová Diosaruw yanaptʼa mayisïna. Ukatwa Diosajj soldadonakan amuyunakap chʼamaktʼayäna, jupanakajj janiw kawkinkapjjatapsa amuyasjjapjjänti. Eliseojj akham sarakïnwa: ‘Akajj janiw thaqapktas  uka markäkiti. Nayar arkapjjeta, thaqapkta uka jaqen ukaruw irpapjjäma’ sasa. Soldadonakajj iyaw sasaw Samaria markakam Eliseor arkapjjäna. Israelan reyipajj uka markanwa jakäna.

Puripjjäna ukhakiw sirio soldadonakajj kawkinkapjjes uk amuyasipjjäna. Israelan reyipasti ‘¿jupanakar jiwarayäti?’ sasaw Eliseor jisktʼäna. Niyakejjay uka soldadonakajj Eliseor katuntasin jan wal lurañ munapjjchïnjja, ¿Eliseojj jupanakat vengaspachänti? Janiwa. Antisas reyir akham sänwa: ‘Jan jiwarayamti. Manqtʼayasajj khitanukjjam’ sasa. Ukatwa Israelan reyipajj mä jachʼa manqʼäwi wakichäna, manqtʼayasajj utanakaparuw khitanukjjäna.