Jueces 11:1-40
11 Jefté+ sat galaadita chachajja, guerran nuwasir chʼamani chachänwa, mä prostituta warmin yoqaparakïnwa. Jefté chachan awkipajj Galaad satänwa.
2 Ukampis Galaad chachajj warmipampejj wawanakanirakïnwa. Warmipan wawanakapajj jilsjjapjjäna ukhajja, Jefté chacharojj alisnukupjjänwa, akham sasa: “Jumajj yaqha mamanïtawa, janiw tatasat kuna oraqsa herenciat katoqkätati” sasa.
3 Ukatwa Jefté chachajj jilanakapat escapasajj Tob sat oraqer sarjjäna. Jan trabajoni chachanakaw jupamp mayachtʼasipjjäna, juparuw arkapjjarakïna.
4 Mä qhawqha tiempotjja, ammonitanakajj israelitanak contraw nuwasipjjäna.+
5 Ammonitanakajj israelitanak contra nuwasipjjäna ukhajja, Galaad oraqen ancianonakapajj jankʼakiw Jefté chachar Tob sat oraqet kuttʼayanjjañatak sarapjjäna.
6 Jupanakajj akham sasaw Jefté chachar sapjjäna: “Jutam, comandantet pʼeqtʼapjjeta, ukhamat ammonitanak contra nuwasiñasataki” sasa.
7 Ukampis Jefté chachajj Galaad oraqen ancianonakaparojj akham sänwa: “¿Janit jumanakajj nayar wal uñisisajj tatajan utapat alisnukunipkista?+ ¿Kunatsa jichhajj wali llakin uñjasisajj nayan ukar jutapjjta?” sasa.
8 Uk satasti Galaad oraqen ancianonakapajj Jefté chacharojj akham sapjjänwa: “Ukajj cheqäskapuniwa, ukampis jichhajj juman ukaruw jutapjjta. Jumatï nanakamp chik saräta, ammonitanak contra nuwasirakïta ukhajja, Galaad+ oraqen taqe jakirinakapjjaruw pʼeqtʼapjjetäta” sasa.
9 Ukatwa Jefté chachajj Galaad oraqen ancianonakaparojj akham säna: “Jumanakatï ammonitanak contra nuwasiñatak kuttʼayapjjetäta, Jehová Diosajj jupanakar atipjañatak yanaptʼarakitani ukhajja, ¡nayaw jumanakarojj pʼeqtʼapjjäma!” sasa.
10 Galaad oraqen ancianonakapajj Jefté chacharojj akham sapjjarakïnwa: “Janitï jumajj siskta ukarjam lurapkäjja, Jehová Diosay testigöpan” sasa.
11 Jefté chachasti Galaad oraqen ancianonakapampiw saräna, markankirinakasti juparojj pʼeqtʼirita, comandantet uttʼayapjjarakïna. Ukatsti Jefté chachajj Mizpá+ markanwa kuna amtarutï mantapkäna uk Jehová Dios nayraqatan mayamp arsüna.
12 Ukatsti Jefté chachajj jaqenakwa ammonitanakan+ reyipan ukar khitäna, akham sañataki: “¿Kunatsa oraqejan naya contra nuwasir jutta?” sasa.
13 Ammonitanakan reyipajj akham sasaw Jefté chachan jaqenakapar säna: “Egipto markat makatanisaw+ israelitanakajj oraqenakaj katuntasipjjäna, Arnón+ jawirat Jaboc jawirkama ukhamarak Jordán+ jawirkama, ukatwa nayajj jumamp nuwasir jutta. Jichhasti sumatak kuttʼayjjeta” sasa.
14 Ukampis Jefté chachajj wasitat ammonitanakan reyipan ukar jaqenak khitäna,
15 akham sapjjañapataki:
“Jefté chachajj akham siwa: ‘Israelitanakajj janiw moabitanakan+ oraqepsa ni ammonitanakan+ oraqepsa katuntapkänti,
16 israelitanakajj Egipto markat mistunisajj wasara oraqwa Mar Rojo+ qotakam sarapjjäna, Cadés+ oraqer puriñkama.
17 Ukatsti israelitanakajj Edom+ markan reyiparojj jaqenak khitapjjäna, akham sañataki: “Mirä amp suma, oraqem cheq pastʼayapjjeta” sasa. Ukampis Edom markan reyipajj janiw istʼkänti. Ukatjja Moab+ markan reyiparojj jaqenak khitapjjarakïnwa, jupajj janirakiw munkänti. Ukatwa israelitanakajj Cadés+ oraqen jakasipkakïna.
18 Wasara oraqen sarnaqapkäna ukhajja, janiw Edom+ oraqerusa ni Moab oraqerus taktʼapkänti. Jupanakajj Moab+ toqet inti jalsu toqeruw sarapjjäna, Arnón toqenwa campamento saytʼayasipjjarakïna. Arnón jawirajj Moab oraqen qorpapäkchïnsa, israelitanakajj janiw Moab+ oraqer mantapkänti.
19 ”’Ukatsti israelitanakajj Hesbón markan apnaqeri amorreonakan Sehón reyiparuw jaqenak khitapjjäna, akham sapjjañapataki: “Mirä amp suma, kawkirutï sarapjjañajäki ukar puriñatakejj oraqem cheqay pastʼayapjjeta”+ sasa.
20 Ukampis Sehón reyejj israelitanakat payachasïnwa, janiw oraqep pasaykänti, ukatwa Sehón reyejj markpachar tantachtʼäna, campamentop Jáhaz markan saytʼayasajj israelitanak contraw nuwasïna.+
21 Ukatsti Israelan Jehová Diosapajj Sehón reyirusa, markapan taqe jaqenakarus israelitanakan amparaparuw katuyäna, ukhamatwa jupanakajj atipjapjjäna, uksa toqen jakiri amorreonakan oraqenakapsa taqpach katuntasipjjäna.+
22 Ukhamwa israelitanakajj amorreonakan taqe oraqenakap katuntasipjjäna, Arnón jawirat Jaboc jawirkama, wasara pampat Jordán+ jawirkama.
23 ”’Israelan Jehová Diosapaw markap nayraqatat amorreonakar alisnuküna. Jichhajj ¿jumat israelitanakar alisnuküta?+
24 ¿Kuntï Kemós+ diosamajj katuntasiñamatak churktam uk janit katuntkta? Taqe khitinakarutï nanakan Jehová Diosajajj nanak nayraqatat alisnukki ukanakarojj alisnukupjjarakïwa.+
25 Kawkïritejj Moab oraqen reyipäki Zipor chachan yoqapäkaraki uka Balac+ chachat sipansa, ¿jukʼamp sumätati? ¿Balac reyejj israelitanak contrat saytʼäna, jan ukajj jupanak contrach nuwasïna?
26 Kunapachatï israelitanakajj Hesbón markansa, uka jakʼankir markanakapansa,+ Aroer markansa, uka jakʼankiri markanakapansa, Arnón jawir jakʼanakankiri taqe markanakapansa 300 maranaka jakapkäna uka tiemponjja, ¿kunatsa uka markanak kutirayasiñatak jan kuns lurapkayäta?+
27 Nayajj janiw juma contrajj juchachaskti, naya contra saytʼasisajj pantjastawa. Jehová Dios Jachʼa Juezay+ jichhürojj Israel markampiru Ammón markampirojj juzgpan’ sasa”.
28 Ukampis ammonitanakan reyipajja, kuna yatiyawtï Jefté chachajj apaykäna uk janiw istʼañ munkänti.
29 Jehová Diosan espiritupaw Jefté+ chachjjar jutäna, jupasti Galaad oraqenkir Mizpé markar sarañatakejj Galaad+ oraqempi ukhamaraki Manasés tribun oraqepamp pasäna, Galaad oraqenkir Mizpé markatjja ammonitanak contraw sararakïna.
30 Ukatsti Jefté chachajj Jehová Diosaruw mä promesa luräna,+ akham sasa: “Jumatï ammonitanakar atipjañ yanaptʼitätajja,
31 ammonitanakar atipjasin kuttʼankä ukhajj khititejj utajan punkupat nayar katoqer mistunkani ukajj jumatakïniwa, Jehová Dios Tata,+ juparojj nakhantayat ofrendjam loqtäma”+ sasa.
32 Ukatjja Jefté chachajj ammonitanak contra nuwasiriw saräna, Jehová Diosajj jupanakar atipjañwa yanaptʼarakïna.
33 Jupajj waljaniruw jiwarayäna, Aroer markat Minit markakamaw oraqenak katuntäna, 20 markanak katuntäna, Abel-Keramim cheqakama. Ukhamwa ammonitanakajj israelitanak nayraqatan atipjat uñjasipjjäna.
34 Qhepatjja Jefté chachajj Mizpá+ markaruw utapar kuttʼjjäna. ¡Jupar katoqerejj phuchapaw mistunïna, pandereta chholloqtʼayasisa, thoqtʼasisa! Jefté chachan phuchapajj jupa sapakïnwa. Jefté chachajj janiw yaqha yoqanïkänti ni yaqha phuchanïkänsa.
35 Phuchapar uñjasasti jupajj isip chʼiyjasïna, akham sasa: “¡Ay imill wawa! Wali llaktʼatapunïtwa, jumarurakis jayar apanuksmajjä. Jehová Diosarojj mä promesa lurtjja, uka arsutajat janiw qhepar kuttʼkiristi”+ sasa.
36 Phuchapasti akham sänwa: “Papitu, Jehová Diosarutï mä promesa lurstajja, kuntï arskta ukarjam nayamp luraskakim.+ Jehová Diosaw jumarojj ammonita enemigonakamat vengasiñ yanaptʼtamjja” sasa.
37 Ukatsti tataparojj akham sänwa: “Aka mayak mayiñ munsma: qollunak toqer khitakitaya, pä phajjsejj sapak jaytita, nayajj janejjay casaraskchïtejja, amiganakajamp jachiriw sarañ munta” sasa.
38 Tatapasti sarakïnwa: “Saraskakim” sasa. Tatapajj pä phajjsiw khitäna, phuchapasti janiw casarasiñapäjjänti, ukatwa amiganakapampejj qollunakar jachir saräna.
39 Pä phajjsi pasatatjja tatapan ukaruw kuttʼanïna, ukatsti awkipajj mä promesa lurkäna ukarjamaw phoqarakïna.+ Phuchapajj janiw mä chachampis ikthapkänti. Israel markansti aka costumbrew utjarakïna:
40 sapa maraw israelit tawaqonakajj Jefté sat galaadita chachan phuchapar chʼamañchtʼir sarapjjerïna, maranjja pusi urunaka.
