Jueces 1:1-36
1 Josué chachan jiwjjepanjja,+ israelitanakajj akham sasaw Jehová Diosar jisktʼapjjäna:+ “¿Khitis nanakat cananeonakampi nuwasiñatak nayraqat sarani?” sasa.
2 Jehová Diosajj akham sasaw jupanakar säna: “Judá tribuw sarani.+ Jupanakan amparaparuw uka oraqe nayajj churaskta”* sasa.
3 Judá tribusti akham sasaw Simeón tribu jilaparojj säna: “Nanakar churat* oraqer sarañäni,+ cananeonak contra nuwasinipjjañäni. Ukatjja jumanakar churat oraqeruw sarapjjarakiñäni” sasa. Ukatwa Simeón tribujj jupanakamp saräna.
4 Judá tribujj saräna ukhajja, Jehová Diosajj jupanakan amparanakaparuw cananeonakarusa perizitanakarus katuyäna,+ ukhamatwa jupanakajj 10.000 chachanakar Bézec cheqan atipjapjjäna.
5 Cananeonakampiru+ perizitanakampiru+ atipjasipkäna ukhajja, jupanakajj Adoni-Bézec chacharuw Bézec cheqan jikjjatapjjäna, jupampiw nuwasipjjarakïna.
6 Adoni-Bézec chachajj escapkäna ukhajja, jupanakajj arktasaw katjapjjäna, ukatjja kayunakapata amparanakapat tayka lukʼananakapwa khuchurapjjäna.
7 Adoni-Bézec chachajj akham sänwa: “70 reyinakaw kayunakapata amparanakapat tayka lukʼananakap khuchuratäpjje, jupanakajj mesajat jalaqtir manqʼanak pallthapisipkaraki. Kunjamtï nayajj lurktjja, ukhamwa Diosajj lurarakitu” sasa. Uka qhepatjja Jerusalén markaruw apapjjäna,+ ukanwa jiwjjarakïna.
8 Judá tribunkir chachanakasti Jerusalén marka contraw nuwasipjjäna,+ uka marka katuntasajj espadampiw ukan jakirinakarojj jiwarayapjjäna, uka mark phichantapjjarakïnwa.
9 Ukatjja Judá tribunkir chachanakajj qollunak toqena, Négueb, Sefelá+ toqenakan jakir cananeonakamp nuwasiriw sarapjjäna.
10 Judá tribujj Hebrón markan jakir cananeonak contra nuwasir sarasajja, Sesái, Ahimán, Talmái+ chachanakaruw atipjapjjäna. (Nayrasti Hebrón markajj Quiryat-Arbá satänwa).
11 Uka cheqatjja, jupanakajj Debir markankirinak contraw nuwasir sarapjjäna.+ (Nayrasti Debir markajj Quiryat-Séfer satänwa).+
12 Ukatjja Caleb+ chachajj akham sasaw säna: “Khititejj Quiryat-Séfer marka atacasin katuntkani uka chacharojja, Acsá sat phuchajwa warmipäñapatak churäjja”+ sasa.
13 Caleb chachan Quenaz+ sat sullkïr jilapan Otniel+ yoqapaw uka marka katuntäna. Ukatwa jupajj Acsá sat phuchapar esposapäñapatak churjjäna.
14 Kunapachatï Acsá sat warmejj chachapan utapar sarkäna ukhajja, tatapat mä oraqe mayiñapatakiw chachapar säna. Ukatjja warmejj asnopat saraqäna.* Caleb chachasti phuchaparojj akham sasaw jisktʼarakïna: “¿Kuns munta?” sasa.
15 Phuchapasti juparojj sänwa: “Mirä amp suma, nayarojj mä bendicionay churita, jumajj aynach toqenjja* waña oraqe churistajja, jichhajj Gulot-Maim* oraqe churita” sasa. Ukatwa Caleb tatapajj Gulot Alto ukhamarak Gulot Bajo oraqenak churäna.
16 Moisesan quenita+ suegropat+ jutirinakajja, Judá tribunkirinakampiw palmeranakan markat*+ sarasajj Judá tribun wasara oraqepar makatapjjäna, Arad+ markat aynach toqeru.* Ukar sarasasti, jupanakajj ukankir jaqenakampiw jakapjjarakïna.+
17 Judá tribujj Simeón tribu jilapampiw saräna, Zefat markan jakir cananeonak contraw nuwasipjjäna, jupanakarojj qʼal tukjapjjäna.+ Uka markarusti Hormá*+ sutimpiw uchapjjarakïna.
18 Ukatsti Judá tribujj Gaza,+ Asquelón,+ Ecrón+ markanakwa oraqenakapamppach katuntäna.
19 Jehová Diosaw Judá tribumpïskäna, jupanakajj qollunak toqenkir oraqenak katuntapjjäna, ukampis guerran nuwasiñatak hierrot lurat jusinakani* carronakanïpjjatap*+ laykojja, vallen jakir jaqenakarojj janiw alisnukuñ puedipkänti.
20 Jupanakajj Moisesan arsutaparjamaw+ Caleb chacharojj Hebrón marka churapjjäna, jupasti uka markat Anac chachan kimsa yoqanakaparuw+ alisnuküna.
21 Ukampis Benjamín tribunkirinakajj janiw Jerusalén markan jakir jebuseonakarojj alisnukupkänti, ukatwa jebuseonakajj benjaminitanakamp chik Jerusalén markan jichhürkam jakasipki.+
22 Ukañkamasti José chachat jutirinakajj+ Betel marka contraw sarapjjäna, Jehová Diosajj jupanakampïskänwa.+
23 José chachat jutirinakajj Betel marka uñaqasipkäna. (Nayrajj Betel markan sutipajj Luz satänwa).+
24 Uñaqerinakasti markat mistunir mä chacharuw uñjapjjäna. Jupanakajj akham sasaw uka chachar sapjjäna: “Mirä amp suma, kunjamsa markar mantapjjerista ukay uñachtʼayapjjeta, nanakajj jumat khuyaptʼayasipjjämawa”* sasa.
25 Ukatwa uka chachajj kunjamsa markar mantapjjaspa uk jupanakar uñachtʼayäna, jupanakajj markankir jaqenakarojj espadampiw jiwarayapjjäna, ukampis uka chacharusa taqpach familiaparus antutjjapjjänwa.+
26 Uka chachajj hititanakan oraqeparuw sarjjäna, ukanwa mä marka saytʼayasajj Luz sutimp uchäna, jichhürkamas ukham sutinïskakiwa.
27 Manasés tribunkirinakajj janiw Bet-Seán marksa uka jakʼankir markanakapsa, Taanac+ marksa uka jakʼankir markanakapsa, Dor marksa uka jakʼankir markanakapsa, Ibleam marksa uka jakʼankir markanakapsa, Meguidó marksa uka jakʼankir markanakaps+ katuntapkänti. Cananeonakajj uka oraqenpun jakañ munapjjäna.
28 Israel markajj wali chʼamani markäjjäna ukhajja, cananeonakarojj chʼama tukuña trabajonak lurayapjjäna,+ ukampis janiw taqpachanir alisnukupkänti.+
29 Efraín tribunkirinakajj janirakiw Guézer markan jakir cananeonakarojj alisnukupkänti. Cananeonakajj jupanak taypinwa Guézer markan jakasipkakïna.+
30 Zabulón tribunkirinakajj janiw Quitrón, Nahalol+ markanakan jakirinakarojj alisnukupkänti. Cananeonakajj jupanak taypin jakasipkakïnwa, jupanakarojj chʼama tukuña trabajonak lurayapjjäna.+
31 Aser tribunkirinakajj janiw Akkó markan jakirinakarojj alisnukupkänti, janirakiw Sidón,+ Ahlab, Aczib,+ Helbá, Afic,+ Rehob+ markanakan jakirinakarus alisnukupkänti.
32 Aser tribunkirinakajj uka oraqenakan jakir cananeonakamp chik jakasipkakïnwa, jupanakar jan alisnukupjjatap layku.
33 Neftalí tribunkirinakajj janiw Bet-Semes, Bet-Anat+ markanakan jakirinakarojj alisnukupkänti, jupanakajj uka oraqenakan jakir cananeonakamp chikaw jakasipkakïna.+ Bet-Semes, Bet-Anat markanakan jakirinakajj jupanakatakiw chʼama tukuña trabajonak lurapjjäna.
34 Amorreonakajj qollunak toqenkir oraqenakanwa Dan tribunkirinakar jarkʼjjäsipjjäna, janirakiw valle toqerus saraqayapkänti.+
35 Amorreonakajj Heres qollunpun jakañ munapjjäna, Ayalón,+ Saalbim+ markanakansa ukhamaraki. Ukampis José chachat jutir wawanakapan chʼamapajj jiljjattäna ukhajja, jupanakarojj chʼama tukuñ trabajonak lurayapjjäna.
36 Amorreonakan oraqepan qorpapajja, Acrabim+ toqer makatki uka cheqata ukhamarak Sela cheqat alay toqerünwa.
Notanaka
^ Jan ukajja, “churjjta”.
^ Hebreo arunjja, “sorteot churat”.
^ Ukajja, “jupajj asnopankaskäna ukhaw amparap tʼajjllirasïna” sasaw jaqokipasirakispa.
^ Jan ukajja, “Négueb toqenjja; sur toqenjja”.
^ Ukajja, “uma jalsunaka” sañ muni.
^ Ukajja, Jericó markawa.
^ Jan ukajja, “sur toqeru”.
^ Ukajja, “qʼala tukjaña” sañ muni.
^ Jan ukajja, “segaderanakani”.
^ Hebreo arunjja, “hierrot lurat carronakanïpjjatap”.
^ Jan ukajja, “munasiñat jan jaytjasirïpjjatajwa uñachtʼayapjjäma”.
