Jueces 10:1-18
10 Abimélec qhepatsti Isacar tribunkiri Tolá sat chachaw Israel markar salvañatak saytʼäna.+ Jupajj Efraín tribun qollunak toqenkir Samir markan jakäna, Pua chachan yoqapänwa, Dodó sat chachan allchhipa.
2 Tolá chachajj 23 maranakaw Israel markan juezapäna. Jiwjjepanjja Samir markanwa imtʼjjapjjäna.
3 Jupjjarusti Jaír sat galaadita chachaw saytʼäna, jupajj 22 maranakaw Israel markan juezapäna.
4 Jaír chachajj 30 asnonakat sarir 30 yoqanakanïnwa, jupanakajj 30 markanakanïpjjänwa, jichhürkamas uka markanakajj Havot-Jaír+ sutimpi uñtʼatäskakiwa. Uka markanakajj Galaad oraqenkarakiwa.
5 Ukatjja Jaír chachajj jiwjjänwa, Camón cheqaruw imtʼjjapjjarakïna.
6 Israelitanakajj mä kutimpiw kunatï Jehová Dios nayraqatan jan walïki uk lurapjjäna,+ jupanakajj Baal+ diosanakaru, Astoret idolonakaru, Aram* oraqen diosanakaparu, Sidón oraqen diosanakaparu, Moab+ oraqen diosanakaparu, ammonitanakan+ diosanakaparu, filisteonakan+ diosanakaparuw servipjjäna. Jupanakajj Jehová Diosar apanukupjjänwa, janirakiw jupar sirvjjapjjänti.
7 Ukatwa Jehová Diosajj israelitanakatak wal coleräna, jupanakarojj filisteonakana ukhamarak ammonitanakan amparanakaparuw katuyäna.*+
8 Jupanakaw uka marajj israelitanakar usuchjapjjäna, wal tʼaqesiyapjjarakïna. 18 maranakaw Jordán jawirat inti jalsu toqenkir taqe israelitanakar tʼaqesiyapjjäna, Galaad oraqenkir amorreonakan oraqepana.
9 Ammonitanakajj Jordán jawira paskatasajj Judá, Benjamín, Efraín tribunakampiw nuwasipjjarakïna, israelitanakasti walpun llakisipjjäna.
10 Ukatwa israelitanakajj yanaptʼayasiñatak Jehová Diosar artʼasipjjäna,+ akham sasa: “Nanakan Diosajay, jumarojj apanukupjjsmawa, Baal+ diosanakaruw servipjjarakta, ukhamatwa juma contra juchachasipjjta” sasa.
11 Ukampis Jehová Diosajj akham sasaw israelitanakar säna: “¿Janit nayajj salvapkayäsma, kunapachatï egipcionakasa,+ amorreonakasa,+ ammonitanakasa, filisteonakasa,+
12 sidonionakasa, amalequitanakasa, madianitanakas tʼaqesiyapkayätam ukhajja? Jumanakajj artʼasinipkayäta ukhajja, nayaw jupanakan amparapat salvapjjayäsma.
13 Ukampis jumanakajj apanukupjjestawa, yaqha diosanakaruw servipjjtajja.+ Ukatwa jumanakarojj wasitat jan salvapkämati.+
14 Ajllisipkta uka diosanakar yanap mayisir sarapjjam.+ Tʼaqesiñ tiemponakanjj uka diosanakamp salvayasipjjam”+ sasa.
15 Ukampis israelitanakajj akham sasaw Jehová Diosar sapjjäna: “Nanakajj juchachasipjjtwa. Kunatï jumatak walïki uk nanakamp luraskakim. Ukampis mirä amp suma, jichhürojj nanakar salvapjjakitaya” sasa.
16 Ukatjja israelitanakajj jupanak taypit yaqha markankir diosanak apanukupjjänwa, Jehová Diosaruw servipjjäna,+ ukatwa israelitanakan tʼaqesitap uñjasajj Diosajj chuymapan wal llakisïna.+
17 Tiempompejja ammonitanakajj+ guerran nuwasiñatak tantachtʼasisaw campamentop Galaad oraqen uttʼayasipjjäna. Ukatwa israelitanakajj tantachtʼasisin campamentop Mizpá oraqen uttʼayasipjjarakïna.
18 Galaad oraqenkir jaqenakasa principenakapasa akham sasaw jupanakkam sasipjjäna: “¿Khitis ammonitanak contra nuwasiñan pʼeqtʼistani?+ Jupajj Galaad oraqen taqe jakirinakan pʼeqtʼiripäpan” sasa.
