Ogwu Orom eji iriọọn̄-inu igak eji. Kubọk ute okaan̄ ima, ikikpọ eji chieen̄ me lek. Isọkọ me lek, ikare nkeek kan̄ ibe eji esan̄a ibot me irak kan̄. (Jerimaya 10:23) Eya orọ, ubọk sọntiik gwun̄ okiweek mban eyi uga mè ute, otutuuk kiji miweek mban eyi Awaji (Asaya 48:17, 18) Mban onineen̄ echi Baibul okebinyi ire uche onan̄a me ubọk Awaji.—Fuk Timọti Eyi Òso Iba 3:16.

Ikan mè onineen̄ kè Jioba ikijeen̄ eji oniin̄ onwọnwọn ichit iluluk ugwem me mgbọ keyi mè ikijeen̄ eji ubọk eji ebekọt ibọkọ mkpukpe eyi ikakaan̄ge itata me mgbọ okup me isi. Eyi irere ibe ke Awaji orom eji, itat ibe eji ekesa me unwọọn̄ ekegọọk ntọ-ubọk kan̄.—Fuk Okwa Itọn̄ 19:7, 11; Ichichili 4:11.

Usini okpan okpan atikọ ikijeen̄ eji inu Awaji okiweek ibe eji erọ me esese esese irek. Usini ikan si ikup isa inyi okpọkpọ irek. (Ikan Òso Mgbọ Iba 22:8) Eji mesa unye nkeek kiji isa igobo itet ubọk eji ebesa onineen̄ Baibul irọ inu me okpọkpọ irek. (Urọk 2:10-12) Kubọk inu njeen̄, Baibul ijeen̄ ibe ke ugwem ire uche onan̄a me ubọk Awaji. Ire eji ekikeek onineen̄ ya, moban eji me ere ikwaan̄, me uwu mè mgbọ eji ekikọp uran̄. Ikirọ ifuna eji egwọk chieen̄ me lek mkpọ obosak eji unan me lek miya ire inan̄a me ubọk kiji isak ebi ufi ife unan me lek.—Fuk Ikwaan̄ Ebi Otuchieen̄ 17:28.

Jisọs ikpa inu ofolek ikan iba okup ufiak enenen. Eyi adasi ikpọk mbum ibot ibot ugwem ebilene​—irọriọọn Awaji, ima ọmọ, mè ikitọbọ ebum inyi ọmọ inan̄a me ichechieek. Eji  mekikeek inu ofolek ikan eyi adasi yi me otutuuk ntumu-mfieek kiji. (Urọk 3:6) Ebi ikisun̄ ikan yi me ejit mere unene Awaji, ikaan̄ ata ubelejit mè ugwem ikakaan̄ge itata.—Fuk Matiyu 22:36-38.

Ikan eyi oso iba mokọt iban eji me ikakaan̄ esuuk me lek ebi ufi ife. (Ebi Kọrint Eyi Adasi 13:​4-7) Oso ikan iba yi igọbọ igọgọọk akpat ukọt Awaji me ike ikisa irọ inu me lek ebi ene.—Fuk Matiyu 7:12; 22:39, 40.

Ikan echi Awaji ikijeen̄ ebi ototun̄ ukan̄ ubọk ebekọt isa me ima ikup me obọp ge. (Ebi Kọlọsi 3:12-14) Usem Awaji inyi ofifi onineen̄ okibem irek mbat olom​—ibe ke irek mbat olom ibobabia.—Fuk Ibebene 2:24.

Sa me ikekigọọk onineen̄ echi Baibul, eji mekọt ibem inu nkaan̄ mè ekiket kiji. Kubọk inu njeen̄, ebi ikibọkọ ene me ikwaan̄ ekima ebi ikisa atikọ irọ inu mè ebi ikitap efuuk me lek ikwaan̄. (Urọk 10:4, 26; Ebi Iburu 13:18) Usem Awaji ijeen̄ si ibe eji ekekaan̄ ujot owot me lek inu echi okup ufiak me ugwem mè eji ekemọnọ unene kiji me lek kan̄ ebene egak inu nkaan̄.—Fuk Matiyu 6:24, 25, 33; Timọti Eyi Adasi 6:8-10.

Ikekiluk igọọk ikan Awaji mobem ugwem kiji. (Urọk 14:30; 22:24, 25) Kubọk inu njeen̄, ikekiluk igọọk ikan Awaji obe ekakinwọ miin̄ isa mobem eji me lek uyọt uyọt orukan̄ mè mfiat. (Urọk 23:20) Jioba ichieek ibe eji ekenwọ miin̄, ire, me okekem. (Okwa Itọn̄ 104:15; Kọrint Eyi Adasi 6:10) Ikan Awaji ikisibi eji oruru sa me ijejeen̄ ubọk eji mekọtbe ibem irọrọ kiji mè nkeek kiji. (Okwa Itọn̄ 119:97-100) Ire, ata Ebi Eyi Karais kpekibak lek ikakaan̄ oruru isiki ibot inyi Awaji. Ema ekirọ ikeya isasa inyi Jioba umin.—Fuk Matiyu 5:14-16.