Римдеги христиандар олордыҥ калазындӧӧн Павелдиҥ келерин билип ийеле, кезиги ого удура бардылар. Акалар, ого јолугарга, 60 километрдеҥ ажыра јер ӧттилер. Мындый сӱӱш Павелге кандый камаанын экелди? «Олорды кӧрӧлӧ, Павел Кудайга алкыш јетирип, санаазы сергиди» деп Агару Бичикте айдылат (Ап.и 28:15). Јуундарды, јаҥжыкканы аайынча, Павел сергидип туратан. Је бу учуралда тӱрмеледип салганынаҥ улам, оныҥ бойына болуш керек болгон (2Кр 13:10).

Бистиҥ ӧйдӧ ака-эјелердиҥ бӱткенин тыҥыдарга, аймак кӧрӧӧчи јуундарга келип јат. Кудайдыҥ бастыра ишчилери чилеп, олор до кезикте кунугып, тыҥ арып эмезе та недеҥ де улам санааркагылап јат. Аймак кӧрӧӧчи ле оныҥ ӱйи слердиҥ јуунга келген тужында ийде-кӱч алып, олор до, сен де оморкоду алзын деп, сен нени эдер эдиҥ? (Рм 1:11, 12).

• Јарлаар иштиҥ туштажуларына келип тур. Аймак кӧрӧӧчи келген неделезинде јарчылардыҥ нени де божотпоско албаданып турганын кӧрӱп, тыҥ кӧдӱрӱҥи алат (1Фс 1:2, 3; 2:20). Ол слердиҥ јуунга келип јаткан айда, подсобный пионердиҥ ижин не албас? Сен оныҥ бойын эмезе ӱйин јарлаар ишке эмезе Агару Бичиктиҥ ӱредӱзине кычырып болорыҥ ба? Олорго башка-башка јарчыларла, ол тоодо јаҥы јарчыларла, анайда ок ченемели ас деп бодоп турган јарчыларла иштеерге јарап јат.

• Кӱндӱзек бол. Аймак кӧрӧӧчиге ле ӱйине јадатан јер берип эмезе ажанарга кычырып болорыҥ ба? Мынайып сен олорго сӱӱжиҥ кӧргӱзериҥ. Бу ла ок ӧйдӧ сеге јаан белетениш керек јок (Лк 10:38—42).

• Јӧптӧрди ле башкартуларды тузалан. Аймак кӧрӧӧчи бисти Иеговага оноҥ јакшы иштезин деп, сӱӱштӱ болужып јат. Кезикте ол кезем јӧп берет (1Кр 5:1—5). Бистер оныҥ берген башкартуларын белен кӱӱндӱ угуп турзаас, ого јакшы болот (Евр 13:17).

• Быйаныҥды кӧргӱзип тур. Аймак кӧрӧӧчиге ле ӱйине олордыҥ келгени сеге кандый болуш болгонын куучындап бер. Сен оны бойлорына айдар аргалу эмезе самара ба, открытка ба бердирип ийер аргалу (Кл 3:15).