01 УРОК
Агару Бичик меге канайып болужар?
Бу јӱрӱмде кажы ла кижи кезикте јӱрӱм ле ӧлӱм керегинде эмезе келер ӧй лӧ кӱчтер керегинде сананып јат. Је кӧп сабада улус акча-манат ла иш-тош јанынаҥ, анайда ок билезин канайып азыраары јанынаҥ санааркап јадылар. Бу сурактардыҥ карууларын кӧп улус Агару Бичиктеҥ табып алган. Анда јӱрӱмниҥ јаан учурлу да, јаан учурлу эмес те сурактарыныҥ каруулары бар. Слер канайып сананадаар, Агару Бичик слерге болужар ба?
1. Агару Бичик кандый сурактардыҥ карууларын берет?
Јӱрӱм кайдаҥ башталган? Јӱрӱмниҥ учуры неде? Бир де јаман неме этпеген улус нениҥ учун шыралап јат? Кижи божоп калза оныла не болот? Ӱзе улус амыр јадарга кӱӱнзейт, је нениҥ учун андый кӧп јуу-согуш болуп јат? Келер ӧйдӧ Јерле не болор? Мындый сурактар слерде де чыгып турган болор. Сурактар чыгып турганында бир де јаман неме јок. Канча миллион улус карууларды Агару Бичиктеҥ табып алган, слер де табып алараар.
2. Агару Бичик кижиге канайып болужат?
Бу бичиктиҥ јӧптӧри айыл-јуртту улуска, стресске табарткан улуска, анайда ок иш-тош јанынаҥ санааркап турган улуска болужат. Слер оноҥ до ӧскӧ сурактардыҥ карууларын Агару Бичикти ӱренетен интерактивный курстаҥ билип алараар. Анайып, «ончо Агару Бичик... тузалу» деп оҥдоп ийеригер (2 Тимофейге 3:16).
Бу бичик Агару Бичиктиҥ ордына белетелген бичик эмес. Карын бу бичик улусты Агару Бичикти ӱрензин деп кӱӱнзедерге белетелген. Оныҥ учун кажы ла урокто берилген ӱлгерлерди кычырып, билип алганаарла тӱҥдештирип туругар.
ТЕРЕҤЖИДЕ КӦРӰГЕР
Агару Бичик улуска канайып болушканын, оны канайып кычырза тузалу болорын, анайда ок оны оҥдоорго слерге кем-кем болушса, нениҥ учун јакшы болорын билип алыгар.
3. Агару Бичик јолды кӧргӱзип берер аргалу
Агару Бичик јакшы јарыдып турган фонарикке тӱҥей. Оныҥ учун ол биске кандый бир сурактарыстыҥ аайына чыгып аларга эмезе келер ӧйдӧ не болорын билип аларга болужар.
Сарын 119:105 кычырып, бу сурактарды шӱӱжип ийигер:
-
Бу сӧстӧрди бичиген кижи Агару Бичик керегинде нени айдат?
-
Агару Бичик керегинде слер нени сананып јадыгар?
4. Бистиҥ сурактарыстыҥ каруулары Агару Бичикте бар
Бир ӱй кижи канча јылдардыҥ туркунына табып болбой турган сурактарыныҥ карууларын Агару Бичиктеҥ табып алган. ВИДЕОНЫ кӧрӱп ийеле, бу сурактарды шӱӱжип ийигер:
-
Бу ӱй кижиде кандый сурактар болгон?
-
Агару Бичик ого канайып болушкан?
Агару Бичик бисти сурактардыҥ карууларын бедирезин деп кӱӱнзедет. Матфей 7:7 кычырып, бу суракты шӱӱжип ийигер:
-
Слер Агару Бичиктеҥ кандый сурактардыҥ карууларын табып аларга кӱӱнзейдеер?
5. Агару Бичикти јакшызынып кычырыгар
Кӧп улуска Агару Бичикти кычырарга јарап јат. Олор бу бичиктеҥ кӧп туза алат. ВИДЕОНЫ кӧрӱп ийеле, бу сурактарды шӱӱжип ийигер:
-
Бу видеодогы јииттерге кычырарга јарап јат па?
-
Је Агару Бичикти кычырарга олорго нениҥ учун јарап јат?
Агару Бичиктеги сӧстӧр токынал ла ижемји берет. Римдегилерге 15:4 кычырып, бу суракты шӱӱжип ийигер:
-
Агару Бичик слерди токынадып, келер ӧйгӧ ижемји берзин деп кӱӱнзейдеер бе?
6. Агару Бичикти оҥдоорго болуш керек
Агару Бичикти јаҥыскан кычырганына кӧрӧ, оны кемле-кемле кожо кычырып, шӱӱп сананза, тузазы канча киреге кӧп болот. Апостолдордыҥ ижи 8:26—31 кычырып, бу суракты шӱӱжип ийигер:
-
Агару Бичикти оҥдоорго биске не болужар? (30, 31 ӱлгерлерди кӧрӱгер.)
Эфиоп эр кижиге Кудайдыҥ Сӧзин болуш јогынаҥ оҥдоорго кӱч болгон. Анайып ла бӱгӱнги кӱнде слерге Агару Бичикти оҥдоорго болужатан кижи болзо јакшы болор эди
КЕЗИК УЛУС АЙДАТ: «Агару Бичикти бодоп ло ӧй ӧткӱрип не ӱренер?»
-
Слер нени айдар эдигер? Нениҥ учун?
ТӦС ШӰӰЛТЕЗИ
Агару Бичик кижиниҥ јӱрӱмине кажы ла јанынаҥ болужар аргалу. Бу бичик јӱрӱмниҥ јаан учурлу сурактарына каруулар берип јат. Анайда ок улуска ижемји де, токынал да берер аргалу.
Нени билип алдыгар?
-
Агару Бичик кажы ла кижиге не јанынаҥ болужар аргалу?
-
Агару Бичик кандый сурактардыҥ карууларын берет?
-
Слер Агару Бичиктеҥ нени билип аларга кӱӱнзейдеер?
ШИҤДЕЙТЕН МАТЕРИАЛ
Агару Бичик бӱгӱнги де кӱнде тузалу.
Бойын эш-кереги јок, уйан деп сананып турган кижиге Агару Бичик канайып болушканын кӧрӱп алыгар.
Агару Бичик билелӱ улуска канайып болужат деп билип алыгар.
«Билеге ырысту болорго болужатан 12 јӧп» («Ойгоныгар!», № 2 2018)
Јерле чыннаҥ ла кем башкарып турганы Агару Бичикте бичилип калган.
«Агару Бичикти нениҥ учун ӱренер керек?» (узун версиязы) (3:14)
Анайда ок слерге јараар болор
ЈААНТАЙЫН БЕРИЛИП ТУРГАН СУРАКТАР
Иегованыҥ Керечилериниҥ Агару Бичикти ӱренетен курсы канайып ӧдӧт?
Иегованыҥ Керечилеринде Агару Бичик неге ӱредип турганын билип аларга болужатан тузалу курс бар. Ӱредӱниҥ ӧйинде слер бойоордыҥ Агару Бичигерле тузаланар аргалу, анайда ок ӱредӱлерге бойоордыҥ билегерди ле најылараарды айдып алар аргалу.
